Kuputuka 50:1-26
50 Yosefwe alimbilile hali ise,+ kaha alilile nakumusweswenya.
2 Kufumaho Yosefwe alwezele vangamba jenyi, navimbuke mangana vomise+ chivimbi. Kaha vimbuke vomishile mujimba waIsalele.
3 Vambachile makumbi 40 nakumisa mujimba wenyi, mwomwo eyi yikiko yapwile tando yakumisa mijimba yavafu. Kaha vaEjipitu vamulilile makumbi 70.
4 Omu akumine makumbi akumulila, Yosefwe ambile kuli vaze vakuchipango* chaFwalo ngwenyi: “Kachi nge munangwivwila uselewa, mulwezenu Fwalo mazu ano ngwenu:
5 ‘Tata angushingishile+ ngwenyi: “Ami hikufwa.+ Mukangufunde mufuka yami+ yize ngwatotele mulifuchi lyaKanane.”+ Ngocho achingwitavise nguyenga, ngukafunde tata, kaha nangukakinduluka cheka.’”
6 Kaha Fwalo amukumbulwile ngwenyi: “Yako ukafunde iso nge omu akushingishile.”+
7 Yosefwe ayile nakufunda ise, kaha ayile navangamba jaFwalo vosena, navakulwane+ vakuchipango chaFwalo, navakulwane jalifuchi lyaEjipitu vosena,
8 navaze vakuzuvo yaYosefwe vosena, navandumbwenyi, navaze vakuzuvo yaise.+ Vana vavo, namautanga avo amikoko navapembe, namautanga avo avangombe vakiko kaha vasalile kungalila yaNgoshene.
9 Ayile hamwe navaka-matemba+ navaka-tuvalu, vapwile lizavu lyalinene chikuma.
10 Kahomu vahetele kuchizungwilo chaAtate chamungalila yaYotau, valilile chikuma jimbimbi. Kaha Yosefwe alilile ise makumbi 7.
11 Omu vatu vamulifuchi lize, vaKanane, vavamwene vali nakulila kuchizungwilo chaAtate, vambile ngwavo: “Echi chipeji chavaEjipitu chachinene.” Shikaho vavulukilile chihela chize ngwavo Avele-mizalaime,* chihela chize chatwama mungalila yaYotau.
12 Ngocho vana vaYakova valingile nge muze avalwezele sevo.+
13 Vamutwalile mulifuchi lyaKanane, kaha vamufunjile muwina wakusendeveka wakumavu akuMakapela, mavu akwakamwihi naMamele, aze Apalahama alanjile kuli Efwelone kaHete kupwa chihela chakufundangaho vafu.+
14 Kahomu Yosefwe alingile hanafundu lyehi ise, akindulukile kuEjipitu, navandumbwenyi, navosena vaze vayile nenyi nakufunda ise.
15 Omu vandumbwaYosefwe vamwene ngwavo sevo nafu lyehi, valyambile ngwavo: “Yosefwe pamo natukwachila koko, kaha mwatuhilwishila upi wosena uze twalingile kuli ikiye.”+
16 Ngocho vatumine mazu ano kuli Yosefwe ngwavo: “Shimbu kanda iso afwenga atulwezele ngwenyi:
17 ‘Mukambulula ngana kuli Yosefwe ngwenu: “Ngunakulombo ukonekele vandumbwove shili yavo namulonga vakuvulumwine hakukulinga mwamupi.”’ Ngocho jino, tunakulomba utukonekele etu vangamba jaKalunga kaiso hamulonga twakuvulumwine.” Kaha Yosefwe alilile hakwivwa mazu avo.
18 Vandumbwenyi navakiko vejile, kaha valifukwile kuli ikiye nakwamba ngwavo: “Etu tunapu nge tuvandungo jove.”+
19 Yosefwe avambile ngwenyi: “Kanda namwivwa womako. Ami yami Kalunga numba?
20 Numba tuhu mwasakile kungulinga mwamupi,+ oloze Kalunga ajinyine ngwenyi vyuma viwahe mangana alwile vatu vavavulu, nge omu ali nakulinga oholyapwa.+
21 Ngocho jino, kanda namwivwa womako. Enu navana venu nangumihananga vyakulya.”+ Yosefwe avavendejekele nakuvakokweza.
22 Yosefwe atwaminenga lika mulifuchi lyaEjipitu, hohamwe navaze vakuzuvo yaise. Kaha ayoyele myaka 110.
23 Amwene vana vaEfwalime+ vahachisemunwino chamuchitatu, navana vaMakile+ mwanaManase. Avalelele kutungi yenyi.*
24 Kutwala muze Yosefwe ambile kuli vandumbwenyi ngwenyi: “Ami hikufwa. Oloze Kalunga mwakamyalakana chikupu.+ Kaha mwakamilovola mulifuchi lino nakumitwala kulifuchi lize alishingile kuli Apalahama, nakuli Isaka, nakuli Yakova.”+
25 Yosefwe ashingishile vana vaIsalele ngwenyi: “Mukafumise vifuwa vyami kuno. Kalunga mwakamyalakana chikupu.”+
26 Kaha Yosefwe afwile omu apwile namyaka 110. Kaha vomishile+ mujimba wenyi, vamuhakile mukashau muEjipitu.
Kwinyikila Chamwishi
^ Chipwe “vakuzuvo.”
^ Ulumbunwiso, “Kulila ChavaEjipitu.”
^ Kulumbununa, Avamwene nge vana venyi nakuvalama mujila yakulipwila.
