Kuputuka 6:1-22
6 Jino omu vatu vaputukile kuvula hamavu, nakusema nawa vana vamapwevo,
2 vana vaKalunga wamuchano*+ vamwene jino vana vavatu vamapwevo ngwavo, vanawahe. Shikaho vaputukile kumbata mapwevo vosena vaze vasakwile vavene.
3 Ngocho Yehova ambile ngwenyi: “Shipilitu yami kayeshi kuvatalilila lika vatu chikokiko+ mwomwo ngwami vanapu hivatu vakwechi mijimba yanyama.* Ngocho, makumbi avo nawaheta kaha mumyaka 120.”+
4 Hamakumbi aze, nahamakumbi akavangijileho, hamavu hapwilenga vaNefwile.* Halwola kana, vana vaKalunga wamuchano valisavalilenga navana vavatu vamapwevo, kaha vasemene navo vana. Ava vana vapwile vindume vaze vapwileko kushikulu, vatu vapuho.
5 Ngocho Yehova amwene ngwenyi kuhuka chavatu chinatoho chikuma hamavu, ngwenyi vishinganyeka vyamichima yavo vinapunga lika vyavipi lwola lwosena.+
6 Yehova evwile kupihya* havatu vaze atengele hamavu, kaha alinyengele+ mumuchima wenyi.*
7 Ngocho Yehova ambile ngwenyi: “Nangunongesa vatu ngunatenge hamavu, navimuna, navaka-kuhalala hamavu, navyuma vyakutuka mwilu, mwomwo ngunevu kupihya hali ava ngunatenge.”
8 Oloze Nowa vamwivwililile uselewa kuli Yehova.
9 Ou ukiko mujimbu waNowa.
Nowa apwile mutu wakwoloka.+ Kaha atwaminenga chakuzeneka katenga* muli vaka-myaka yenyi.* Nowa atambukilenga naKalunga wamuchano.+
10 Kutwala muze, Nowa asemene vana vamalunga vatatu, Sheme, Hame, naYafwete.+
11 Kaha hamavu hapihile kumeso aKalunga wamuchano, kaha hosena hapwilenga ulyanyi lika.
12 Kalunga atalile hamavu, kaha amwene ngwenyi hanapihi,+ mwomwo vatu vosena hamavu valingilenga vyuma vyavipi.+
13 Ngocho Kalunga ambile kuli Nowa ngwenyi: “Ngunajinyi kunongesa vakwechi mijimba vosena, mwomwo vatu vanazalisa hamavu hosena naulyanyi lika. Shikaho nanguvanongesa namavu hamwe.+
14 Ngocho lipachile wato wamungofwele.+ Kaha kavatulemo tupete, nakuusalimba nalingongwe*+ mukachi nakuweluka.
15 Ukaupata ngana: Kusuhwa chawo chikahete mujikuvite* 300, muwihi wawo jikuvite 50, mukujindama chawo helu jikuvite 30.
16 Ukaseza lihanya lyakwingisa chehya muwato, kaha likapwe lyakweseka mukuvite yimwe kufuma kwilu. Kaha kahake chikolo chawato kuluhachi lwawo.+ Kaupate ukapwe nawalo waheshi nawalo wahakachi, nou wahelu.
17 “Nangukatuma livaji+ hamavu nakunongesa vakwechi mijimba vosena vaze vali nakuhwima chakuyoya* mwishi yalilu. Vyuma vili hamavu vyosena navikanonga.+
18 Oloze nangukushika lushiko, kaha naukengila muwato, navana vove vamalunga, napwevo lyove, namapwevo javana vove.+
19 Kaha kuvyuma vyakuyoya vyosena,+ ukambateko vivali vivali kumuyachi wavyo, chilunga nachihwevo, chilunga nachihwevo,+ nakuvingisa muwato mangana vikayovoke nayove hamwe.
20 Kaha nawa kuvyuma vyakutuka mwilu mwaya miyachi yavyo, nakuvimuna mwaya miyachi yavo, nakuli vaka-kuhalala hamavu vosena mwaya miyachi yavo, vivali vivali kumuyachi himuyachi vikengile mukachi muze mukapwa ove mangana vikayovoke.+
21 Kaha ukalikungulwile vyakulya+ vyamiyachi namiyachi, vikapwe kulya chove natunyama.”
22 Kaha Nowa alingile kweseka namuze vamulwezele kuli Kalunga. Alingile vene ngocho.+
Kwinyikila Chamwishi
^ Hanjikiso yachiHepeleu yize yalumbununa vangelo jaKalunga.
^ Chipwe pamo, “mwomwo veji kulinganga kweseka namwaya mijimba yavo.”
^ Kulumbununa pamo, “Vatu Vakutaluka Chikuma,” kulumbununa vaka-kulindumuna vakwavo. Tala Mukana waMazu.
^ Chipwe “alishonene.”
^ Chipwe “evwile kukola kumuchima wenyi.”
^ Chipwe “chuma chakumuhanyina mulonga.”
^ Hepe., “vaka-chisemunwino chenyi.”
^ Chipwe “namanenekela.”
^ Kuvite yimwe yapwile jisendimita 44.5. Tala Chihande B14.
^ Chipwe “vali nashipilitu yakuyoya.”