Kuputuka 7:1-24
7 Kufumaho Yehova ambile kuli Nowa ngwenyi: “Ingila muwato, navaze vakuzuvo yove vosena, mwomwo ove yove ngunamono kupwa wakwoloka muchisemunwino chino.+
2 Kutunyama vatoma vosena mbatako oku 7 oku 7,*+ chilunga nachihwevo, chilunga nachihwevo. Oloze kutunyama vamajilo mbatako vavali vavali kaha, chilunga nachihwevo, chilunga nachihwevo.
3 Kaha kuvyuma vyakutuka mwilu nawa, mbatako oku 7 oku 7,* chilunga nachihwevo, chilunga nachihwevo, mangana ulame mbuto yavo hamavu hosena.+
4 Mwomwo kunasale kaha makumbi 7, nangunokesa vula+ hamavu makumbi 40 namusana naufuku.+ Kaha vyuma vyakuyoya vyosena evi ngunatenge nanguvinongesa vyosena hamavu.”+
5 Ngocho Nowa alingile vyosena vize vamulwezele kuli Yehova.
6 Nowa apwile namyaka yakusemuka 600 omu lyejile livaji hamavu.+
7 Kaha Nowa napwevo lyenyi, navana venyi vamalunga, namapwevo javana venyi, vengilile muwato shimbu kanda livaji+ liputuke.
8 Kaha tunyama vatoma vosena, natunyama vamajilo vosena, navyuma vyakutuka mwilu vyosena, navyuma vyakutambuka hamavu vyosena,+
9 vyengilile vivali vivali muwato muze apwile Nowa, chilunga nachihwevo chilunga nachihwevo, ngana muze amulwezele Kalunga.
10 Kaha omu mwahichile aze makumbi 7, livaji lyejile hamavu.
11 Hamwaka uze ahetele Nowa myaka yakusemuka 600, hakakweji wamuchivali, halikumbi lyakusokesa 17 lyakakweji kana, tuselwoke vameya amavulu vosena vatuvikile, kaha vikolo vyameya mwilu vyasokolokele.+
12 Kaha vula yayinene yanokele hamavu makumbi 40 namusana naufuku.
13 Halikumbi vene lize, Nowa engilile muwato navana venyi vaSheme naHame naYafwete,+ napwevo lyenyi, namapwevo javana venyi vatatu.+
14 Vengilile muwato natunyama vamuchipapa vosena mwaya miyachi yavo, navimuna vosena mwaya miyachi yavo, natunyama vakuhalala hamavu vosena mwaya miyachi yavo, navyuma vyakutuka mwilu vyosena mwaya miyachi yavyo, natujila vosena, navyuma vyosena vikwechi mavava.
15 Kaha vyuma vyosenevi vikwechi kuhwima chakuyoya,* vyapwile nakwiza kuli Nowa muwato, vivali vivali.
16 Ngocho vyuma vyosena vikwechi mijimba, vyengililemo chilunga nachihwevo, chilunga nachihwevo, nge muze Nowa vamulwezele kuli Kalunga. Kufumaho Yehova asokele kuchikolo.
17 Livaji lyatwalileho lika nakufumika hamavu makumbi 40, kaha meya apwilenga lika nakuvula nakuzundula wato, kaha wazundukile jino helu lyamavu.
18 Meya azavukile nakutwalaho lika kuvula hamavu, kaha wato wafwapukile helu lyameya.
19 Meya azavukile chikuma hamavu, kaha jipili jajisuku josena jize japwile kwishi yalilu kwosena jajiminyine.+
20 Meya afwimbile helu lyajipili najikuvite* 15.
21 Ngocho vyuma vyakuyoya vyosena* vize vyatambukilenga hamavu vyanongele,+ vyuma vyakutuka mwilu, navimuna, natunyama vamuchipapa, navyuma vyakutambuka mumayongomena, navatu vosena.+
22 Vyuma vyakutunda vyosena vize vikwechi kuhwima chakuyoya,* vyafwile.+
23 Ngocho Kalunga anongesele vyuma vyakuyoya vyosena hamavu, navatu, natunyama, navyuma vyakuhalala hamavu, navyuma vyakutuka muutangatanga. Vyosena vavinongesele hamavu,+ oloze Nowa kaha navaze apwile navo muwato vakiko vayovokele.+
24 Kaha meya emanyine chicha hamavu hamakumbi 150.+
Kwinyikila Chamwishi
^ Chipwe pamo, “Kutunyama vatoma 14, vavali vavali.”
^ Chipwe pamo, “kuvyuma vyakutuka mwilu 14, vivali vivali.”
^ Chipwe “shipilitu yakuyoya.”
^ Kuvite yimwe yapwile jisendimita 44.5. Tala Chihande B14.
^ Hepe., “vyuma vikwechi mijimba vyosena.”
^ Chipwe “kuhwima chashipilitu yakuyoya.”
