Kuputuka 8:1-22
8 Kalunga alakanyine* Nowa natunyama vamuchipapa vosena, navimuna vosena vaze apwile navo muwato.+ Ahuhwishile peho hamavu, kaha meya aputukile kunyekumuka.
2 Tuselwoke vameya amavulu vosena, navikolo vyameya mwilu vavijikile, ngocho vula yavatukile.+
3 Jino meya apwile nakuya nakunyekumuka hamavu chikoki chikoki. Ngocho hakukuma chamakumbi 150, meya atepulukile.
4 Kaha hakakweji wakusokesa 7, halikumbi lyakusokesa 17 lyakakweji kana, wato watwamine hajipili jaAlalate.
5 Kaha meya apwile nakuya nakunyekumuka lika palanga nakukakweji wakusokesa 10. Kaha hakakweji vene ou wakusokesa 10, halikumbi lyatete, jisongo jajipili jalovokele.+
6 Omu mwahichile makumbi 40, Nowa asokolwele mulihanya+ lyawato lize asezele.
7 Kaha alowele likololo, ayile nakuhitangana kuweluka nakukindwojoka, palanga nomu omine meya hamavu.
8 Kufumaho, alowele cheka liyembe atale numba nge meya ananyekumuka lyehi hamavu.
9 Oloze uze liyembe kawanyine kwakuwilako,* kaha akindulukile kuwato, mwomwo hamavu hosena hapwile lika meya.+ Ngocho Nowa alowele livoko lyenyi nakumukwata, nakumwingisa muwato.
10 Avandaminyine makumbi eka 7, kaha alowele cheka uze liyembe muwato.
11 Omu akindulukile uze liyembe kuli ikiye nachingoloshi, amwene nambate lifwo lituta kumuvumbo wenyi lyakuhela kumulive. Ngocho Nowa atachikijile ngwenyi meya ananyekumuka lyehi hamavu.+
12 Kaha avandaminyine makumbi eka 7. Ngocho alowele uze liyembe, kaha kakindulukile cheka kuli ikiyeko.
13 Jino mumwaka wakusokesa 601+ wakuyoya chaNowa, hakakweji watete, halikumbi lyatete mukakweji kana, meya omine hamavu. Nowa atuvile mumulungu wawato, kaha amwene ngwenyi mavu ali nakuya nakuma.
14 Hakakweji wamuchivali, halikumbi lyakusokesa 27 lyakakweji kana, mavu omine chau.
15 Jino Kalunga ambile kuli Nowa ngwenyi:
16 “Lovoka muwato, napwevo lyove, navana vove vamalunga, namapwevo javo.+
17 Lovoka navyuma vyakuyoya vyosena mwaya miyachi yavyo,+ vyuma vyakutuka mwilu vyosena, natunyama vosena, navaka-kuhalala* hamavu vosena, mangana vaseme nakusemunwina, vavule chikuma hamavu.”+
18 Ngocho Nowa alovokele, navana venyi vamalunga,+ napwevo lyenyi, namapwevo javana venyi.
19 Kaha tunyama vosena, navaka-kuhalala hamavu vosena, navyuma vyakutuka mwilu vyosena, navyeshovyo vyeji kutambukanga hamavu, vyalovokele muwato mwaya miyachi yavyo.+
20 Jino Nowa amutungilile Yehova lijiko lyakulumbila,+ kaha kutunyama vosena vatoma, nakuvyuma vyakutuka mwilu vyosena vitoma,+ ambachileko vamwe nakuvalumba halijiko lyakulumbila+ kupwa wana wakulumba.
21 Kaha Yehova evwile livumba lyalupengopengo.* Ngocho, Yehova alyambile mumuchima wenyi ngwenyi: “Kangweshi kukangula* cheka mavu+ mwomwo yavatuko, mwomwo kujina chamumichima yavatu chinapu chachipi kufuma kuunyike wavo.+ Kaha kangweshi kukanongesa vaka-kuyoya vosena nge omu ngunalingiko.+
22 Kufuma vene lelo, hamavu nahakapwanga lika kukuva mbuto, nakwaha mbuto, nachishika naliyena, nangonde yavula nangonde yachishika, namusana naufuku.”+
Kwinyikila Chamwishi
^ Hepe., “anukile.”
^ Chipwe “kwakulyata mahinji enyiko.”
^ Chipwe “navaka-kutambuka mumayongomena.”
^ Chipwe “lyakusuulwisa; lyakwivwisa kuwaha.”
^ Chipwe “kukafungijikila vyuma vyavipi.”
