Kuputuka 9:1-29
9 Kalunga akiswile Nowa navana venyi vamalunga, kaha ambile kuli vakiko ngwenyi: “Semenunga muvule chikuma, muzalise hamavu.+
2 Kaha tunyama vosena, navyuma vyakutuka mwilu vyosena, navyuma vyosena vize vyeji kutambukanga hamavu, navaishi vamukalungalwiji vosena, navikamivwanga woma nakumichina. Kaha vyosena ngunavihake jino mumavoko enu.*+
3 Tunyama vakutambuka vakuyoya vosena, navapwanga kulya chenu.+ Ngunamihanevo ngana muze ngwamihanyine vyuma vituta vyakusoka hamavu.+
4 Oloze kamwatela kulya+ nyama namwono wayo hamweko, akiko manyinga ayo.+
5 Kaha nawa manyinga amyono yenu nangukawehula kuli weshowo mwakawamwanga. Nangukawehula kuli muka-kuyoya wosena mwakawamwanga. Kaha mwono wamutu nangukawihula kuli ndumbwenyi uze naujihi.+
6 Weshowo mwamwanga manyinga amutu, naikiye manyinga enyi navakawamwanga kuli mutu,+ mwomwo mutu vamutangile muchifwanyisa chaKalunga.+
7 Kahenu semenunga muvule chikuma, muzalise hamavu.”+
8 Jino Kalunga ambile kuli Nowa nakuli vana venyi ngwenyi:
9 “Nangumishika lushiko, navana venu vaze navakasemuka kulutwe,+
10 navyuma* vyakuyoya vyosena vize muli navyo hamwe, tujila, natunyama, navyuma vyakuyoya vyosena vyahamavu vize muli navyo, vyuma vyakuyoya vyahamavu vyosena+ vize vinalovoka muwato.
11 Shikaho, nangumishika lushiko ngwami: Kangweshi kukanongesa cheka vakwechi mijimba* vosena nameya alivaji chipwe kwenyeka cheka mavu nalivajiko.”+
12 Kalunga ambile cheka ngwenyi: “Echi chikiko chinjikizo chalushiko lwami luze nangulishika nayenu navyuma* vyakuyoya vyosena vize vili hamwe nayenu, chize nachipwangako lika nakuvisemunwino vyosena vyakulutwe.
13 Nanguhaka kongolo hamavwi, kaha mwapwanga chinjikizo chalushiko elu ngunalishiki navaka-mavu.
14 Heshoho nangunehela livwi helu lyamavu, nakongolo nawa mwasolokanga mulivwi.
15 Kaha nangwanukanga lushiko lwami ngwalishikile nayenu, navyuma vyakuyoya vyosena mwaya miyachi yavyo.* Ngocho meya kaweshi kukaneha cheka livaji lyakunongesa vakwechi mijimba vosenako.+
16 Kaha kongolo mwakasolokanga mulivwi, kahami nangukamumona nakwanukanga lushiko lwahaya myaka yosena luze ngunalishiki navyuma vyakuyoya vyosena mwaya miyachi yavyo* hano hamavu.”
17 Kalunga ambile cheka kuli Nowa ngwenyi: “Echi chikiko chinjikizo chalushiko luze ngunalishiki navakwechi mijimba vosena vahamavu.”+
18 Vana vaNowa vaze valovokele muwato vapwile Sheme, Hame, naYafwete.+ Kutwala muze, Hame asemene Kanane.+
19 Ava vatatu vakiko vapwile vana vaNowa, kaha kuli vakiko kukiko kwafumine vatu vosena hamavu vaze vatanjile kwosena.+
20 Jino Nowa aputukile mulimo waunjimi, kaha atumbile wande wamivinyo.
21 Omu anwine vinyo, apendele, kaha alizulile mumbalaka yenyi.
22 Hame ise yaKanane, amwene usonyi waise, kaha alwezele vandumbwenyi vavali vapwile kuweluka.
23 Kaha Sheme naYafwete vambachile lihina nakulihaka kuvifwiji vyavo nakutambuka ufutanyima. Ngocho vafwikile usonyi wasevo oku vanatale kweka, kaha kavamwene usonyi wasevoko.
24 Omu Nowa apendulukile kuvinyo vyenyi, atachikijile chuma alingile mwanenyi wakanyike kuli ikiye.
25 Ambile ngwenyi:“Kanane+ apwenga wakwangula.Apwenga ndungo wamokomoko kuli vandumbwenyi.”+
26 Ambile cheka ngwenyi:“Vamwalisenga Yehova, Kalunga kaSheme,Kaha Kanane apwenga ndungo kuli Sheme.+
27 Kalunga ahane Yafwete ngalila yayinene,Yafwete atwamenga mujimbalaka jaSheme.Kaha Kanane apwenga nawa ndungo kuli Yafwete.”
28 Omu lyakumine Livaji,+ Nowa atwamine nawa myaka 350.
29 Ngocho makumbi osena aze ayoyele Nowa ahetele mumyaka 950, kaha afwile.
Kwinyikila Chamwishi
^ Chipwe “ngunavihake mungolo jenu.”
^ Chipwe “namyono.”
^ Chipwe “vyuma vyakuyoya.”
^ Chipwe “namyono.”
^ Chipwe “namyono yakuyoya yosena yikwechi mijimba.”
^ Chipwe “namyono yakuyoya yosena yikwechi mijimba.”
