Kusoloka 1:1-20
1 Echi chikiko kusoloka chavyuma asolwele Yesu Kulishitu, chize vamuhanyine kuli Kalunga+ mangana alwekese vandungo jenyi+ vyuma vize vyatela kulingiwa kalinwaha. Atumine kangelo kenyi, kaha achisolwele navinjikizo kuli ndungo yenyi Yowano,+
2 uze ahanyine unjiho hamazu akufuma kuli Kalunga, nahaunjiho wakufuma kuli Yesu Kulishitu, havyuma vyosena vize amwene.
3 Awahilila mutu uze eji kutangilanga helu, navaze veji kwivwanga mazu aupolofweto uno, navaze veji kulamanga vyuma vasonekamo,+ mwomwo lwola vatongola luli hakamwihi.
4 Ami Yowano, nguli nakusonekela vikungulwilo+ 7 vili mungalila yaAja:
Kuli enu kupwenga likoji lyalinene nakuunda vyakufuma kuli “Uze apwako, uze apwileko, uze ali nakwiza,”+ vyakufuma nawa kuli vashipilitu+ 7 ava vali kulutwe lwalitanda lyenyi,
5 vyakufuma nawa kuli Yesu Kulishitu, “Chinjiho Wakushishika,”+ “twatwa kufuma kuvafu,”+ kaha nawa “Muka-kuyula vamyangana vahamavu.”+
Kuli uze atuzanga,+ uze atusokwele kujishili jetu namanyinga enyi,+
6 uze atulingishile tupwenga tuwangana,+ tuvapilishitu+ kuli Kalunga kenyi kaha nawa Ise, kupwenga upahu nangolo haya myaka yosena. Amene.
7 Talenu! Ali nakwiza namavwi,+ kaha meso osena nawakamumona, navaze nawa vamutuvile navakamumona. Miyachi yavatu vahamavu yosena nayikalyonyinga mwomwo yaikiye.+ Vyuma kana navikasoloka chikupu. Amene.
8 Yehova* Kalunga nambe ngwenyi: “Ami yami Alafwa, yami Omenga,*+ Uze apwako, uze apwileko, uze ali nakwiza, uze Wangolo Josena.”+
9 Ami ndumbwenu Yowano, ami mukwenu mutwazanyina muluyando,+ namuwangana,+ namulukakachila+ hakulikata naYesu,+ ngwapwile halitungu lize vavuluka ngwavo Patamu, mwomwo yakuhanjika vyaKalunga, nahakuhana unjiho wakuvuluka Yesu.
10 Hakunguhwimina nashipilitu, ngwapwile mulikumbi lyaMwata, kaha ngwevwile lizu lyakukanguka munyima yami, nge chivumo chaluneta
11 ngwalyo: “Evi naumona visoneke mumukanda wakuvunga, kaha uutume kuvikungulwilo 7 : kuEfwesu,+ nakuSumuna,+ nakuPelengamu,+ nakuTulachila,+ nakuSalete,+ nakuFwilatelefwa,+ nakuLauchiseya.”+
12 Jino ngwalumukile ngwami ngumone owo apwile nakuhanjika nayami. Kahomu ngwalumukile, ngwamwene vitumbikilo vyamanongo vyaulu 7,+
13 kaha mukachi kavize vitumbikilo vyamanongo mwapwile umwe wakufwana nge mwanamutu,+ navwale uvwalo wakuheta kuvilyachilo, navwale muhya waulu mutulo yenyi.
14 Kaha nawa mutwe wenyi najikambu jenyi vyapwile vitoma to nge wanda utoma, nge mbundu, kaha meso enyi apwile nge mulangi wakakahya,+
15 vilyachilo vyenyi vyafwanyine nge unengu wamwenemwene+ uze vanatomesa mulilungu, kaha lizu lyenyi lyapwile nge chivumo chameya amavulu.
16 Apwile navatanganyika 7 + mulivoko lyenyi lyachilyo, kaha mukanwa kenyi mwapwile nakulovoka poko yamukwale yayisuku yakuvambuka yauvela kuvali,+ kaha kumeso enyi kwamunyikile nge likumbi lize linamunyika zwalala.+
17 Omu ngwamumwene, ngwalimbukilile kumahinji enyi nge nguchivimbi.
Kaha angunangikile livoko lyenyi lyachilyo nakwamba ngwenyi: “Kanda nawivwa womako. Ami yami Wakulivanga+ kaha nawa Wakukuminyina,+
18 yami ou ayoya.+ Ngwafwile,+ kaha tala, ngwayoya haya myaka namyaka,+ kaha nguli najisapi jakufwa najeji jaFuka.*+
19 Ngocho soneka vyuma evi unamono, navyuma evi viliko, navyuma vize navisoloka kulutwe.
20 Kahomu mukiko vyalumbunukila vyuma vyajila vyakusweka vyakupandama kuvatanganyika 7 vaze unamono mulivoko lyami lyachilyo, navyevi vyavitumbikilo vyamanongo vyaulu 7 : Vatanganyika 7 vanapu vangelo vavikungulwilo 7, kaha vitumbikilo vyamanongo 7 vinapu vikungulwilo 7.+
Kwinyikila Chamwishi
^ Tala Chihande A5.
^ Chipwe “yami A, yami Z.” Alafwa yapwa sopelo yatete, kaha Omenga yapwa sopelo yamakumishilo kweseka nomu valikavangijila vasopelo vamuchiHelase.
^ Chipwe “jaHetese,” kulumbununa fuka yavatu vosena. Tala Mukana waMazu.
