Kusoloka 13:1-18
13 Kaha emanyine* hausekeseke wakukalungalwiji.
Jino ngwamwene chisuma+ mwakanduka mukalungalwiji,+ apwile najimbinga 10 namitwe 7. Haze hajimbinga jenyi hapwile michama* 10, kaha hamitwe yenyi hapwile majina akusaula Kalunga.
2 Jino uze chisuma ngwamwene afwanyine nge chisupa, oloze vilyachilo vyenyi vyapwile nge vize vyaulusu, kaha kanwa kenyi kapwile nge kanwa kandumba. Uze chazangombe+ ahanyine uze chisuma ngolo jenyi, nalitanda lyenyi, nawata waunene.+
3 Jino ngwamwene mutwe wenyi umwe unakusoloka nge vanaulemeka chikuma, oloze mbandu yenyi yakutwala kukufwa yakangukile,+ kaha vaka-mavu vosena vakavangijile uze chisuma oku vanalikomokela.
4 Kaha valemesele uze chazangombe mwomwo ahanyine wata wenyi kuli uze chisuma. Valemesele uze chisuma namazu ano ngwavo: “Iyaze afwana nge ou chisuma, iyaze mwahasa kulwa nenyi jita?”
5 Vamuhanyine kanwa kakuhanjika vyuma vyavinene, namazu akusaula Kalunga, kaha vamuhanyine wata wakuyula hatukweji 42.+
6 Alokolwele mukanwa kenyi namazu akusaula Kalunga,+ akusaula lijina lyenyi, nachihela chenyi atwama, navaze vatwama mwilu.+
7 Vamuhanyine ngolo jakulwa jita navaka-kujila nakuvafungulula,+ kaha vamuhanyine wata wakuyula vaka-miyachi yosena, navatu vosena, navaka-malimi osena, navaka-mafuchi osena.
8 Kaha vosena vaze vatwama hamavu navakamulemesa ikiye. Kufuma vene kukwala chihela chakaye, hamajina avo kaheshi limwe vasoneka mumukanda wakuvunga wakuyoya+ waMwanamukoko uze vajihileko.+
9 Kachi nge mutu ali namatwitwi, evwenga.+
10 Kachi nge mutu atela kuya muufunge, kaha mwaya muufunge. Kachi nge mutu mwajiha vakwavo napoko yamukwale,* naikiye vatela kumujiha napoko yamukwale.+ Aha hakiko vaka-kujila+ vasakiwa kupwa nalukakachila+ nalufwelelo.+
11 Jino ngwamwene chisuma mukwavo mwalovoka mumavu, apwile najimbinga jivali nge mwanamukoko, oloze aputukile kuhanjika nge chazangombe.+
12 Chisuma kana azachishile ngolo josena jachisuma+ uze watete oku uze chisuma watete ali nakumona. Kaha alingishile mavu navaze vatwamaho valemesenga uze chisuma watete, uze apwile nambandu yakutwala kukufwa yize yakangukile.+
13 Alingile vinjikizo vyavinene, nakulingisa kakahya kafume mwilu nakuholokela hamavu oku vatu vanakumona.
14 Ahungumwishile vaze vatwama hamavu, mwomwo yavinjikizo vize vamwitavishile kulinga kumeso achisuma, nakulweza vaze vatwama hamavu vatenge chifwanyisa+ chayauze chisuma vatwile mbandu napoko yamukwale, oloze himwayoya.+
15 Kaha vamwitavishile afutumwine kuhwima chakuyoya* muli chize chifwanyisa chayauze chisuma, mangana chifwanyisa kana chihanjike, nakujihisa vosena vaze navakana kulemesa chize chifwanyisa chayauze chisuma.
16 Kaha ashinjilile vatu vosena, ava vamokomoko navava vavalemu, navaka-luheto, navaka-kuhutwa, navatu vakulihehwa, navandungo, mangana ngwenyi vavasoneke katachikijilo hamavoko avo avilyo chipwe hajiholo javo,+
17 mangana ngwenyi kuzeneke kupwa mutu mwalanda chipwe kulanjisa, shina kuvanga uze ali nakatachikijilo, lijina+ lyachisuma, chipwe nambala yalijina lyenyi.+
18 Aha hakiko hasakiwa kupwa namangana: Ou anangakana alave nambala yayauze chisuma, mwomwo yikiko yinapu nambala yamutu, kaha nambala yacho yikiko 666.+
Kwinyikila Chamwishi
^ Kulumbununa, chazangombe.
^ Chipwe “hapwile jinguwa jawangana.”
^ Chipwe pamo, “Kachi nge mutu umwe vatela kumujiha napoko yamukwale.”
^ Chipwe “vamwitavishile ahane shipilitu.”
