Kusoloka 19:1-21
19 Kufumaho, ngwevwile vimwe vyevwakanyine nge lizu lyakukanguka lyaliyongomena lyalinene mwilu. Vambile ngwavo: “Mwalisenunga Ya.*+ Ulwilo naupahu nangolo vyapwa vyaKalunga ketu,
2 mwomwo kusopesa chenyi chapwa chamuchano, chakwoloka.+ Mwomwo nasopesa lyehi pwevo muka-kulinga ujila* chikuma, uze enyekelenga mavu naujila wenyi, kaha Kalunga nalingi sambanjinga kuli ou pwevo hamanyinga avandungo jenyi.”+
3 Hahaze vene vambile cheka kamuchivali ngwavo: “Mwalisenunga Ya.*+ Wishi wakuwema chayou pwevo weji kufwindasananga haya myaka namyaka.”+
4 Jino vaze vakulwane 24,+ navaze vaka-kuyoya+ vawana, valimbilile hamavu nakulemesa Kalunga uze atwama halitanda ngwavo: “Amene! Mwalisenunga Ya!”*+
5 Kaha nawa kulitanda lize kwafumine lizu ngwalyo: “Mwalisenunga Kalunga ketu, enu vandungo jenyi muvosena,+ enu mwamwivwa woma, enu vamokomoko nayenu vavalemu.”+
6 Kaha ngwevwile vimwe vyevwakanyine nge mazu aliyongomena lyalinene, nge chivumo chavimeya vyavivulu, nge chivumo chamikalateta yangolo. Vambile ngwavo: “Mwalisenunga Ya,*+ mwomwo Yehova* Kalunga ketu, ou Wangolo Josena,+ naputuka kuyula kupwa mwangana.+
7 Tuwahililenu, tukinyinyinenu nakumutohwesa, mwomwo chilika chaulo waMwanamukoko chinahete lyehi, kaha pwevo lyenyi naliwahisa lyehi.
8 Vanamwitavisa kuvwala lihina lyamwaza, likejima, lyakuzeneka majilo, mwomwo lihina eli lyamwaza lyemanyinako vilinga vyakwoloka vyavaka-kujila.”+
9 Uze kangelo angulwezele ngwenyi, “Soneka ngwove: Vawahilila vaze vanasanyika kukulya chachingoloshi kuchilika chaulo waMwanamukoko.”+ Angulwezele nawa ngwenyi: “Awa himazu amuchano aKalunga.”
10 Hakwivwa ngocho, ngwalimbilile hamavu kumahinji enyi mangana ngumulemese. Oloze ikiye angulwezele ngwenyi: “Zangama. Kanda ulinga chuma kanako.+ Ami ngumukwenu ndungo mutwazachila hamwe nayove, navandumbwove vaze vali namulimo wakwambulula unjiho hali Yesu.+ Lemesa Kalunga.+ Mwomwo kuhana unjiho hali Yesu chikiko chalingisa kupwenga upolofweto.”+
11 Jino ngwamwene mwilu munasokoloka, kahomu ngwatalile, ngwamwene kavalu utoma.+ Uze atwamineho vamuvulukile ngwavo, Wakushishika,+ Wamuchano,+ kaha eji kusopesanga nakulwanga jita mukwoloka.+
12 Meso enyi apwile nge mulangi wakakahya,+ hamutwe wenyi hapwile michama yayivulu.* Kaha apwile nalijina vasoneka lize kavatachikiza kuli mutu numba umweko shina ivene kaha.
13 Avwalile uvwalo wahelu uze wapwile namanyinga,* kaha vamuvulukile lijina lyenyi ngwavo, Lizu+ lyaKalunga.
14 Kaha nawa mazavu avaka-jita vamwilu vamukavile hatuvalu vatoma. Vavwalile mahina amwaza, atoma, akuzeneka majilo.
15 Mukanwa kenyi mwalovokele poko yamukwale+ yayisuku yakuvambuka yakujihisa vaka-mafuchi, kaha ikiye mwakafunganga nambwechi yafwelu.+ Mwalyatangila nawa muchikamwino chavinyo chautenu waKalunga Wangolo Josena.+
16 Hauvwalo wenyi wahelu, hatungi yenyi hapwile lijina vasoneka ngwavo, Mwangana wavamyangana, Mwata wavamyata.+
17 Ngwamwene nawa kangelo nemana halikumbi, kaha atambakanyine nalizu lyakukanguka kuli tujila vosena vaze veji kutukanga muutangatanga* ngwenyi: “Twayenu kuno, likungulwilenu kukulya chachingoloshi chaKalunga chachinene,+
18 mangana mulyenga nyama yavamyangana, nanyama yatupitau vamaswalale vavakulwane, nanyama yamalunga vangolo,+ nanyama yatuvalu, nayeyi yavaze vanatwameho,+ nanyama yavatu vosena, vatu vakulihehwa, navandungo, navatu vamokomoko, navava vavalemu.”
19 Jino ngwamwene uze chisuma navamyangana vahamavu namaswalale javo vanalikungulwila hamwe mangana valwenga jita nauze atwamine hakavalu namaswalale jenyi.+
20 Kaha vakwachile uze chisuma, hohamwe nauze kapolofweto wamakuli,+ uze alingilenga vinjikizo kumeso enyi, vize ahungumwishile navyo vaze vatambwile katachikijilo kayauze chisuma+ navaze valemeselenga chifwanyisa+ chenyi. Kaha vosena vavali vavambilile vavatonyi muchijiva chakakahya chize cheji kwenyanga nasulufulu.+
21 Oloze vakwavo vaze vasalileho vavajihile napoko yamukwale yayisuku yize yalovokele mukanwa kayauze atwamine hakavalu.+ Kaha tujila vosena vekuchile nanyama yavo.+
Kwinyikila Chamwishi
^ Chipwe “Haleluya!” “Ya” hilijina lyaYehova mukavatu.
^ MuchiHelase, por·neiʹa. Tala Mukana waMazu.
^ Chipwe “Haleluya!” “Ya” hilijina lyaYehova mukavatu.
^ Chipwe “Haleluya!” “Ya” hilijina lyaYehova mukavatu.
^ Chipwe “Haleluya!” “Ya” hilijina lyaYehova mukavatu.
^ Tala Chihande A5.
^ Chipwe “hapwile jinguwa jawangana jajivulu.”
^ Chipwe pamo, “uze wapwile wakusapwila manyinga.”
^ Chipwe “kutukanga halengelenge; kutukanga helu.”
