Kusoloka 2:1-29
2 “Sonekela kangelo+ kachikungulwilo chize chili kuEfwesu+ ngwove: Evi vikiko vyuma nahanjika ou akwata vatanganyika 7 mulivoko lyenyi lyachilyo, ou eji kutambwojokanga mukachi kavitumbikilo vyamanongo vyaulu 7 :+
2 ‘Ngunatachikiza vilinga vyove, namilimo yove, nalukakachila lwove, nomu unahono kwitavila vatu vavapi, nomu weji kwesekanga vaze valivuluka ngwavo vaposetolo,+ oloze kaveshi vaposetoloko, kaha unavamono ngwove vaka-kwonga.
3 Uli nakusolola nawa muchima walukakachila, kaha unakakachila mwomwo yalijina lyami,+ kawazeyeleko.+
4 Chipwe ngocho, ngunakuwane namulonga mwomwo unaseze zangi yize wapwile nayo hakavanga.
5 “‘Shikaho anuka kuze wafumine omu waholokele, kaha pihilila nakwalumuka+ ulinge cheka vilinga vize wapwile navyo hakavanga. Kuvanga upihilile nakwalumuka.+ Kachi nge kaweshi kulinga ngochoko, kaha nangwiza kuli ove nakufumisa chitumbikilo chove chalinongo+ muchihela chacho.
6 Oloze chuma chamwaza uli nakulinga shina chakuhunga vilinga vyakaliuka kakuhanduka kaNyikolaita,+ vize ngwahunga nayami.
7 Ou ali namatwitwi evwenga vyuma yili nakuhanjika shipilitu kuvikungulwilo:+ Ou mwafungulula,+ nangumwitavisa kulya kumutondo wakuyoya+ uze uli mupalachise yaKalunga.’
8 “Kaha sonekela kangelo kachikungulwilo chize chili kuSumuna ngwove: Evi vikiko vyuma nahanjika ‘ou Wakulivanga kaha nawa Wakukuminyina,’+ ou afwile, kaha ayoyele cheka:+
9 ‘Ngunatachikiza luyando lwove, nauhutu wove, oloze umuka-luheto,+ kaha ngunatachikiza nawa kusaula vali nakukusaula vatu vaze valivuluka ngwavo vaYuleya, oloze kaveshi vaYuleyako. Vatu kana vanapu sunangonga yaSatana+ kaha.
10 Kanda nawivwa woma vihuli vize naumonako.+ Tala! Liyavolo mwatwalaho lika nakumimbila enu vamwe mukamenga, mangana vamyeseke chikuma, kaha namumona luyando hamakumbi 10. Pwako uwakushishika palanga nakukufwa, kaha nangukakuhana muchama wakuyoya.+
11 Ou ali namatwitwi evwenga+ vyuma yili nakuhanjika shipilitu kuvikungulwilo: Ou mwafungulula,+ chikupu vene keshi kukamona kufwa chamuchivaliko.’+
12 “Sonekela kangelo kachikungulwilo chize chili kuPelengamu ngwove: Evi vikiko vyuma nahanjika uze ali napoko yamukwale yayisuku yakuvambuka yauvela kuvali:+
13 ‘Ngunatachikiza okwo uli nakutwama, kukiko vene kuli litanda lyaSatana, oloze ove chiutwalaho lika nakulinjilila kulijina lyami,+ kaha kawakanyine kungufwelelako,+ numba vene nahamakumbi achinjiho chami wakushishika,+ Andepa, ou vajihile+ okwo mwatwama, okwo atwama Satana.
14 “‘Chipwe ngocho ngunakuwane namulonga muvyuma vimwe vyavindende, mwomwo uli navamwe okwo vaze vali nakukavangiza kunangula chaMbalame,+ uze alwezele Mbalake+ kuhaka chimbunji chakuhukanyisa kumeso avana vaIsalele, mangana valyenga vyuma vyakuvatwila kumakombelo, nakulinga nawa ujila.*+
15 Nayove nawa uli navatu vamwe vaze vali nakukavangiza kunangula chakaliuka kakuhanduka kaNyikolaita.+
16 Shikaho pihilila nakwalumuka. Kachi nge kaweshi kulinga ngochoko, kaha nangwiza washi kuli ove nakulwa navo jita napoko yamukwale yayisuku yamukanwa kami.+
17 “‘Ou ali namatwitwi evwenga vyuma yili nakuhanjika shipilitu kuvikungulwilo:+ Ou mwafungulula+ nangumuhana mana+ amwe akusweka, kaha nangumuhana lilolwa litoma, kaha halilolwa kana vasonekaho lijina lyalihya lize kavatachikiza kumutu naumweko kuvanga ou kaha mwalitambula.’
18 “Sonekela kangelo kachikungulwilo chize chili kuTulachila+ ngwove: Evi vikiko vyuma nahanjika MwanaKalunga, ou ali nameso nge mulangi wakakahya,+ navilyachilo vyenyi nge unengu wamwaza:+
19 ‘Ngunatachikiza vilinga vyove, nazangi yove, nalufwelelo lwove, namulimo wove, nalukakachila lwove, nomu vilinga uli nakulinga oholyapwa vinavulu kuhambakana vize walingilenga hakavanga.
20 “‘Chipwe ngocho ngunakuwane namulonga, mwomwo unechelela Yezevele,+ pwevo uze eji kulivulukanga ngwenyi kapolofweto, kaha eji kunangulanga nakuhungumwisa vandungo jami mangana valinge ujila,*+ nakulya vyuma vyakuvatwila kumakombelo.
21 Ngwamuhanyine lwola mangana ngwami apihilile nakwalumuka, oloze keshi nakusaka kupihilila nakwalumuka aseze ujila* wenyiko.
22 Tala! Kalinwomu ngumunehele misongo yayinene, kaha vaka-kulinga nenyi ukoji nanguvanehela luyando lwalunene kachi nge kaveshi kupihilila nakwalumuka vaseze vilinga vyenyiko.
23 Kaha vana venyi nanguvajiha namusongo wachihita, ngocho vikungulwilo vyosena navitachikiza ngwavyo ami yami ngweji kutalatalanga muvishinganyeka* namumichima, kaha nangumihana mutu himutu kweseka navilinga vyenyi.+
24 “‘Oloze nangwamba kuli enu vakwavo muli kuTulachila, enu muvosena munazeneka kukavangiza kunangula kana, enu munahono kutachikiza vize vavuluka ngwavo “vyuma vyakujiminyina vyaSatana,”+ ngwami: Kangweshi kumitwika chiteli chekako.
25 Linjililenunga kuchuma ocho muli nacho palanga nomu nangwiza.+
26 Kahou mwafungulula nakukavangiza vilinga vyami palanga nakusongo, nangukamuhana ngolo jakuyula vaka-mafuchi,+
27 nganomu ngwajitambula lyehi nayami nawa kuli Tata, kaha mwakafunganga vatu nambwechi yafwelu,+ mangana vakavachike nge jindeho jaunonga.
28 Kaha nangumuhana nawa tanganyika wachimene.+
29 Ou ali namatwitwi evwenga vyuma yili nakuhanjika shipilitu kuvikungulwilo.’
Kwinyikila Chamwishi
^ Tala Mukana waMazu.
^ Tala Mukana waMazu.
^ MuchiHelase, por·neiʹa. Tala Mukana waMazu.
^ Hela., “mujiso.”
