Kusoloka 21:1-27
21 Jino ngwamwene melu amahya namavu amahya,+ mwomwo melu akulivanga namavu akulivanga vinafumuko lyehi,+ kaha kalungalwiji+ keshiko chekako.
2 Ngwamwene nawa nganda yajila, Yelusalema Yayihya, yapwile nakwiza hamavu kufuma mwilu muli Kalunga,+ yakulongesa lyehi nge mwenga uze vanawahishila lunga lyenyi.+
3 Ngocho ngwevwile lizu lyakukanguka lyakufuma kulitanda ngwalyo: “Talenu! Mbalaka yaKalunga yili navatu hamwe, kaha mwakatwamanga navo, vakiko navakapwanga vatu jenyi. Kaha ivene Kalunga mwakapwanga navakiko hamwe.+
4 Mwakahunda masoji osena kumeso avo,+ kufwa kacheshi kukapwako chekako,+ kaha nawa kakweshi kukapwa cheka kulishona, chipwe miteto, chipwe kukolako.+ Vyuma vyakulivanga vinafumuko lyehi.”
5 Kaha Uze atwamine halitanda+ ambile ngwenyi: “Tala! Nangulingisa vyuma vyosena kupwa vyavihya.”+ Ambile nawa ngwenyi: “Soneka, mwomwo mazu awa atela kuwafwelela,* kaha amuchano.”
6 Kaha ambile kuli ami ngwenyi: “Vinalingiwa lyehi! Ami yami Alafwa, yami Omenga,* yami maputukilo, yami makumishilo.+ Ou ali nalipwila, ami nangumuhana meya awana* akukaselwoke wameya akuyoya.+
7 Weshowo mwafungulula mwakaswana vyumevi. Nangukapwa nguKalunga kenyi, kaha ikiye mwakapwanga mwanami.
8 Oloze vaka-woma, navaze vazeneka lufwelelo,+ navaka-kulinga vyuma vyaunyengwe, navaka-kujiha vatu,+ navaka-ujila,*+ navaka-kupanda, navaka-kulemesa makombelo, navaka-kwonga+ vosena, navakapwa muchijiva chize chakwata kakahya nasulufulu.+ Echi chijiva chakakahya chikiko kufwa chamuchivali.”+
9 Umwe wavaze vangelo 7 vaze vapwile naviloso 7, vize vyapwile vyakuzala navipupu 7 vyamakumishilo,+ ejile nakwamba kuli ami ngwenyi: “Twaya, kaha nangukulwekesa mwenga, pwevo lyaMwanamukoko.”+
10 Ngocho angutwalile nangolo jashipilitu kupili yayinene yayisuku, kaha angulwekesele nganda yajila, Yelusalema, yize yapwile nakufuma mwilu kuli Kalunga,+
11 yize nawa yapwile naupahu waKalunga.+ Kumunyika chayo chafwanyine nge lilolwa lyandando yayinene chikuma, nge lilolwa lyayashipili, lyakuvyakuma nge kulusutalu.+
12 Yapwile nakembwe yayinene, yayisuku, kaha yapwile navikolo 12, navangelo 12 vaze vemanyineko, kaha havikolo kana vasonekeleho majina amiyachi 12 yavana vaIsalele.
13 Kumututuko kwapwile vikolo vitatu, kunote kwapwile vikolo vitatu, kusulo kwapwile vikolo vitatu, kaha kumulauko kwapwile vikolo vitatu.+
14 Kembwe yanganda nawa yapwile namalolwa 12 achihela chazuvo, kaha hamalolwa kana hapwile majina 12 avaposetolo+ jaMwanamukoko 12.
15 Jino uze apwile nakuhanjika kuli ami akwachile lihongo lyaulu lyakupimisa, mangana apime yize nganda, navikolo vyayo, nakembwe yayo.+
16 Nganda kana yapwile najimbango jiwana, kaha kusuhwa chayo chesekele hamwe nakutohwa chayo. Apimine yize nganda nalihongo, yapwile namashitandeya 12,000,* kusuhwa chayo, nakutohwa chayo, nakujindama chayo helu vyesekele hamwe.
17 Apimine nawa kembwe yayo, yapwile jikuvite 144,* kweseka namwaya kupima chavatu, chikiko kupima apimine uze kangelo.
18 Kembwe yayo vayitungile nayashipili,+ kaha nganda yapwile yaulu wakutomesa nge chitalilo.
19 Vihela vyakembwe yanganda kana, vyapwile vyakuwahisa namalolwa eka naeka andando yayinene: Chihela chatete chapwile chayashipili, chamuchivali chapwile chasafwila, chamuchitatu chapwile chakalekindone, chamuchiwana chapwile chalimelate,
20 chamuchitanu chapwile chasalandonu, chakusokesa 6 chapwile chasachiyu, chakusokesa 7 chapwile chakulusolite, chakusokesa 8 chapwile chambelelu, chakusokesa 9 chapwile chatopaze, chakusokesa 10 chapwile chakulusupalase, chakusokesa 11 chapwile chayashinde, chakusokesa 12 chapwile chalimetusuto.
21 Kaha nawa vize vikolo 12 vyapwile jipela 12. Chikolo hichikolo vachitungile napela yimwe yimwe. Kaha jila yayinene yamunganda yapwile yaulu wakutomesa nge chitalilo.
22 Munganda kana kangwamwenemo tembeleko, mwomwo Yehova* Kalunga Wangolo Josena+ naMwanamukoko vakiko tembele yayo.
23 Nganda kana kayeshi kusakiwa likumbi chipwe kakweji kuyimunyikilako, mwomwo upahu waKalunga wayimunyikila lyehi,+ kaha linongo lyayo Mwanamukoko.+
24 Vaka-mafuchi navakatambukanga muchehya chayo,+ kaha vamyangana vahamavu navakanehangamo upahu wavo.
25 Vikolo vyayo kaveshi kukavisoka namusanako, mwomwo muze kamweshi kukapwa ufukuko.+
26 Kaha upahu nakavumbi kavaka-mafuchi navakavinehangamo.+
27 Kaha muze kamweshi kukengila chuma chakujiluluka, chipwe weshowo eji kulinganga vyuma vyaunyengwe, vyakutangisako,+ shina vaze kaha vasoneka mumukanda wakuyoya waMwanamukoko vakiko navakengilamo.+
Kwinyikila Chamwishi
^ Chipwe “mazu awa anapu amwenemwene.”
^ Chipwe “yami A, yami Z.” Alafwa yapwa sopelo yatete, kaha Omenga yapwa sopelo yamakumishilo kweseka nomu valikavangijila vasopelo vamuchiHelase.
^ Chipwe “awana wakanyombo.”
^ Tala Mukana waMazu, “Ujila.”
^ Kafwe jikilomita 2,220. Shitandeya yimwe yapwile jimita 185. Tala Chihande B14.
^ Kafwe jimita 64. Tala Chihande B14.
^ Tala Chihande A5.
