Kusoloka 22:1-21
22 Angulwekesele nawa kalwiji wameya akuyoya,+ akukejima nge kulusutalu aze apwile nakufuma kulitanda lyaKalunga nalyeli lyaMwanamukoko,+
2 nakuhita hakachi kajila yayo yayinene. Kusali nasali yakalwiji kwapwile mitondo yakuyoya yize yeminenga mihako 12, yeminenga mihako kakweji hikakweji. Mafwo amitondo kana apwile akukisa vaka-mafuchi.+
3 Kaha kakweshi kukapwa cheka changu numba chimweko. Oloze litanda lyaKalunga nalyeli lyaMwanamukoko+ nalikapwanga munganda, kaha vandungo jenyi navakamuzachilanga mulimo wajila.
4 Navakamonanga kumeso enyi,+ kaha lijina lyenyi nalikapwanga hajiholo javo.+
5 Kaha nawa kakweshi kukapwa cheka ufukuko.+ Kaveshi kukasaka kumunyika chalinongoko, chipwe musana walikumbiko, mwomwo Yehova* Kalunga mwakavamunyikilanga,+ kaha navakapwanga vamyangana nakuyula haya myaka namyaka.+
6 Jino ambile kuli ami ngwenyi: “Mazu awa atela kuwafwelela,* kaha amuchano.+ Yehova* Kalunga uze ahwiminyine vapolofweto+ natumu kangelo kenyi mangana alwekese vandungo jenyi vyuma vize vyatela kulingiwa kalinwaha.
7 Tala! Nangwiza washiwashi.+ Awahilila ou ali nakulamanga mazu aupolofweto amumukanda uno wakuvunga.”+
8 Ami Yowano, ami yami vene ngwevwile nakumona vyumevi. Omu ngwavivwile nakuvimona, ngwalimbilile hamavu kumahinji ayauze kangelo uze angulwekesele vyumevi, mangana ngwami ngumulemese.
9 Oloze ikiye angulwezele ngwenyi: “Zangama. Kanda ulinga chuma kanako. Ami ngumukwenu ndungo mutwazachila hamwe nayove, navandumbwove vapolofweto, navaze vali nakulama mazu amumukanda uno wakuvunga. Lemesa Kalunga.”+
10 Kaha angulwezele nawa ngwenyi: “Kanda naulamika katachikijilo kumazu aupolofweto wamumukanda uno wakuvungako, mwomwo lwola vatongola luli kwakamwihi.
11 Muka-kuhenga atwaleho lika nakuhenga chenyi, kaha muka-majilo atwaleho lika namajilo enyi, oloze muka-kwoloka atwaleho lika nakwoloka chenyi, kaha muka-kujila atwaleho lika nakujila chenyi.
12 “‘Tala! Nangwiza washiwashi, kaha fweto ngweji kuhananga nguli nayo, mangana nguhane mutu himutu kweseka namulimo wenyi.+
13 Ami yami Alafwa, yami Omenga,*+ yami wakulivanga yami wakukuminyina, yami maputukilo yami makumishilo.
14 Vawahilila vaze navakosa vikuto vyavo,+ mangana vahase kupwa nalisesa lyakupandama kumutondo wakuyoya+ nakuhasa nawa kuhita muvikolo nakwingila munganda.+
15 Mwomwo kuweluka kuli vatuwa,* navaka-kupanda, navaka-ujila,* navaka-kujiha vatu, navaka-kulemesa makombelo, navosena vaze vasaka kwonga nakulinganga mwakwonga.’+
16 “‘Ami Yesu ngunatumu kangelo kami ahane unjiho kuli enu wakuvuluka vyumevi vyakukafwa vikungulwilo. Ami yami mwiji, muka-tanga yaNdavichi,+ ngutanganyika wachimene wakutamuka.’”+
17 Kaha shipilitu namwenga+ veji kwambanga ngwavo, “Twaya!” Weshowo ali nakwivwako nawa ambenga ngwenyi, “Twaya!” Kaha weshowo ali nalipwila ezenga,+ weshowo mwasaka, atambule meya akuyoya awana.+
18 “Nguli nakuhana unjiho kuli weshowo mwevwa mazu aupolofweto wamumukanda uno wakuvunga ngwami: Kachi nge mutu mwahakilako kuvyumevi,+ Kalunga mwamuhakilako vipupu vanasoneka mumukanda uno wakuvunga.+
19 Kaha kachi nge mutu mwafumisako kumazu amumukanda uno wakuvunga waupolofweto, Kalunga mwafumisa chazano chenyi kumitondo yakuyoya+ nakuchifumisa nawa munganda yajila,+ kweseka navyuma vize vasoneka mumukanda uno wakuvunga.
20 “Ou eji kuhananga unjiho wakuvuluka vyumevi nambe ngwenyi, ‘Eyo, nangwiza washiwashi.’”+
“Amene! Twaya, ove Mwata Yesu.”
21 Likoji lyalinene lyaMwata Yesu lipwenga navaka-kujila.
Kwinyikila Chamwishi
^ Tala Chihande A5.
^ Chipwe “Mazu awa anapu amwenemwene.”
^ Tala Chihande A5.
^ Chipwe “yami A, yami Z.” Alafwa yapwa sopelo yatete, kaha Omenga yapwa sopelo yamakumishilo kweseka nomu valikavangijila vasopelo vamuchiHelase.
^ Kulumbununa, vatu vaze veji kulinganga vyuma vyaunyengwe kumeso aKalunga.
^ Tala Mukana waMazu, “Ujila.”
