Kusoloka 5:1-14
5 Kaha ngwamwene mulivoko lyachilyo lyayaUze atwamine halitanda+ muli mukanda wakuvunga wakusoneka kusali nasali,* wakulamika tutachikijilo 7.
2 Jino ngwamwene kangelo wangolo mwavilika nalizu lyakukanguka ngwenyi: “Iyaze natemo kuvungulula ou mukanda wakuvunga nakulamuna tutachikijilo twawo?”
3 Oloze kakwapwile numba umwe mwilu, chipwe hamavu, chipwe mwishi yamavu, ahashile kuvungulula uze mukanda wakuvunga, chipwe kutalahoko.
4 Kaha ngwalilile chikuma mwomwo kavawanyine numba umwe atelemo kuvungulula uze mukanda wakuvunga chipwe kutalahoko.
5 Oloze umwe wavaze vakulwane ambile kuli ami ngwenyi: “Hola kulu, kanda naulilako. Tala! Ndumba wakumuyachi waYuta,+ mwiji+ waNdavichi,+ nafungulula lyehi,+ ngocho mwavungulula ou mukanda wakuvunga nakulamuna tutachikijilo twawo 7.”
6 Hakachi kalitanda lize, nahali vaze vaka-kuyoya vawana, nahakachi kavakulwane,+ ngwamwene hanemana mwanamukoko+ uze asolokele kwijiva nge wakujiha lyehi.+ Apwile najimbinga 7 nameso 7, kaha aze meso akiko vashipilitu jaKalunga 7 + ava vanatumu kumavu kwosena.
7 Hahaze vene aswenyeneko, atambwile uze mukanda wakuvunga kulivoko lyachilyo lyayaUze atwamine halitanda.+
8 Omu atambwile uze mukanda wakuvunga, vaze vaka-kuyoya vawana navaze vakulwane 24 + valimbilile hamavu kumeso aMwanamukoko, vosena vapwile natulyalya naviloso vyaulu vyakuzala navyuma vyalivumba lyamwaza. (Evi vyuma vyalivumba lyamwaza vyalumbununa kulomba chavaka-kujila.)+
9 Kaha vembilenga mwaso wauhya+ ngwavo: “Ove unatemo kutambula ou mukanda wakuvunga nakulamuna tutachikijilo twawo, mwomwo vakujihile, kaha namanyinga ove, wamulanjilile Kalunga vatu+ vakufuma kumiyachi yosena, nakumalimi osena, nakuvatu veka naveka, nakumafuchi osena.+
10 Wavalingishile kupwa wangana,+ kupwa vapilishitu kuli Kalunga,+ kaha navakapwanga vamyangana nakuyula mavu.”+
11 Jino ngwamwene nakwivwa lizu lyavangelo vavavulu vanajinguluka kulitanda navaze vaka-kuyoya navakulwane. Kuvula chavo vapwile mayongomena namayongomena namakombakaji namakombakaji,*+
12 kaha vapwile nakuhanjika nalizu lyakukanguka ngwavo: “Mwanamukoko uze vajihile+ natemo kutambula ngolo, naluheto, namangana, naundume, nakavumbi, naupahu, nakisu.”+
13 Kaha ngwevwile vyuma vyakuyoya vyosena vyamwilu, nahamavu, namwishi yamavu,+ namukalungalwiji navyuma vyosena vyatwamamo, navyamba ngwavyo: “Kuli Ou atwama halitanda,+ nakuli Mwanamukoko,+ kupwenga kisu, nakavumbi,+ naupahu, nangolo haya myaka namyaka.”+
14 Vaze vaka-kuyoya vawana vapwile nakwamba ngwavo: “Amene!” Kaha vaze vakulwane valimbilile hamavu nakulemesa Kalunga.
Kwinyikila Chamwishi
^ Hela., “wakusoneka mukachi nakuweluka.”
^ Chipwe “vapwile tununu natununu twatununu natununu.”
