Kusoloka 6:1-17
-
Mwanamukoko mwalamuna tutachikijilo twakulivanga 6 (1-17)
-
Muka-kufungulula ali hakavalu utoma (1, 2)
-
Muka-kutambuka hakavalu uchila nge kakahya mwafumisa kuunda hamavu (3, 4)
-
Muka-kutambukaha kavalu wilava mwaneha zala (5, 6)
-
Muka-kutambuka hakavalu utomonoka ikiye Kufwa (7, 8)
-
Vaze vajihile vali mwishi yalijiko lyakulumbila (9-11)
-
Mundenda waunene (12-17)
-
6 Jino ngwamwene omu Mwanamukoko+ alamwine katachikijilo kamwe hatutachikijilo 7,+ kaha ngwevwile umwe wavaze vaka-kuyoya+ vawana mwahanjika nalizu lize lyevwakanyine nge mukalateta ngwenyi: “Twaya!”
2 Kahomu ngwatalile, ngwamwene kavalu utoma.+ Uze atwamineho apwile nauta wamanana, kaha vamuhanyine muchama,+ ngocho ayile nakufungulula mangana akumise kufungulula chenyi.+
3 Omu alamwine katachikijilo kamuchivali, ngwevwile muka-kuyoya wamuchivali+ mwamba ngwenyi: “Twaya!”
4 Kwalovokele nawa kavalu uchila nge kakahya, kaha uze atwamineho vamuhanyine ngolo jakufumisa kuunda hamavu mangana vatu valijihe mwavomwavo. Vamuhanyine nawa poko yamukwale yayinene.+
5 Omu alamwine katachikijilo kamuchitatu,+ ngwevwile muka-kuyoya wamuchitatu+ mwamba ngwenyi: “Twaya!” Kahomu ngwatalile, ngwamwene kavalu wilava, kaha uze atwamineho apwile nachipezaliso mulivoko lyenyi.
6 Hakachi kavaze vaka-kuyoya vawana ngwevwileho lizu lyakwamba ngwavo: “Kwate* yimwe yatiliku, ndando yayo ndenali*+ yimwe, kaha jikwate jitatu jambale, ndando yajo ndenali yimwe. Kaha kanda nawenyeka maji amulive navinyoko.”+
7 Omu alamwine katachikijilo kamuchiwana, ngwevwile lizu lyamuka-kuyoya wamuchiwana+ nalyamba ngwalyo: “Twaya!”
8 Omu ngwatalile, ngwamwene kavalu utomonoka, kaha uze atwamineho lijina lyenyi ikiye Kufwa. Kaha Fuka* yapwile nakumukavangiza chikuma munyima. Jino vavahanyine wata hachihanda chimwe chakusokesa muvihanda viwana vyamavu, mangana vajihenga vatu napoko yamukwale yayisuku, nazala,+ namusongo wachihita, navisuma vahamavu.+
9 Omu alamwine katachikijilo kamuchitanu, ngwamwene mwishi yalijiko lyakulumbila+ muli myono*+ yavaze vajihile mwomwo yamazu aKalunga, kaha nawa mwomwo yaunjiho uze vahanyinenga.+
10 Vatambakanyine nalizu lyakukanguka ngwavo: “Ove Mwata Wakulitulaho, wajila, wamuchano,+ naukananga kusopesa vaze vatwama hamavu nakulinga sambanjinga hamanyinga etu palanga nakumwaka uka?”+
11 Vavahanyine mutu himutu chikuto chitoma,+ kaha vavalwezele vanoke hakatando kakandende palanga nomu navakaswa vakwavo vosena muvapwila vandungo, kaha nawa vandumbwavo, vaze vapwile kwakamwihi nakuvajiha nge muze vavajihile navakiko.+
12 Kaha ngwamwene omu alamwine katachikijilo kakusokesa 6. Kwapwile mundenda waunene, likumbi lyelavile wi nge chikeleyi chamangona,* kaha kakweji wosena alumukile kupwa nge manyinga,+
13 vatanganyika mwilu vahosomokelele hamavu nge omu mukuyu weji kuulumwinanga jikuyu jawo jajivisu hamavu hakulinyika napeho yangolo.
14 Lilu valivungile nge omu navavunga mukanda wakuvunga,+ kaha lyalelanganyine, jipili josena namatungu osena vavifumishile muvihela vyavyo.+
15 Jino vamyangana vahamavu, navilolo, natupitau twamaswalale vavakulwane, navaka-luheto, navaka-ngolo, navandungo vosena, navatu vakulihehwa vosena, vaswamine mumena akusendeveka namumalolwa akujipili.+
16 Kaha vapwilenga nakwamba kujipili nakumalolwa ngwavo: “Tushiukilenu,+ tuswekenu kumeso ayaUze atwama halitanda,+ nakuutenu waMwanamukoko,+
17 mwomwo likumbi lyalinene lyautenu wavo lineza,+ kaha iyaze mwahasa kwimana?”+
Kwinyikila Chamwishi
^ Tala Chihande B14.
^ Lumbongo lwapalata lwachichele lwavaLoma, luze lwapwile fweto yalikumbi limwe. Tala Chihande B14.
^ Chipwe “Hetese,” kulumbununa fuka yavatu vosena. Tala Mukana waMazu.
^ Pamo kutalisa kumanyinga avo aze vamwangilile halijiko lyakulumbila. Tala Mukana waMazu.
^ Pamo mangona avapembe.
