Kusoloka 9:1-21
9 Jino kangelo wamuchitanu embile luneta+ lwenyi. Kaha ngwamwene tanganyika uze aholokelele hamavu kufuma mwilu. Vamuhanyine sapi yakukanwa kawina wakuzeneka kukuma.+
2 Asokolwele kukanwa kawina uze wakuzeneka kukuma, kaha muwina kana mwafwinjile wishi, kwijiva nge wishi wakulilungu lyalinene, kaha likumbi lyelavile wi+ napeho nawa yelavile wi nauze wishi wamuwina.
3 Kaha muze muwishi mwalovokele vambimba nakuwila hamavu.+ Vavahanyine ngolo jojimwe nge jize vatwama najo tuvwanda vahamavu.
4 Kaha vavalwezele vazeneke kwenyeka vyuma vyakusoka hamavu, chipwe chuma chimwe chituta, chipwe mutondo umwe, shina vatu kaha vaze kaveshi nakatachikijilo kaKalunga hajiholo javoko.+
5 Kaha vaze vambimba kavavetavishile vajihe vatu kanako, oloze shina vavayanjise hatukweji vatanu, kaha kukola navakevwa hakuvayanjisa nachikapwa nge chize mwevwa mutu nge vanamusumu kuli kavwanda.+
6 Hamakumbi aze vatu navakasaka kufwa, oloze chikupu vene kaveshi kukachiwanako, kaha navakasakanga ngwavo vafwenga, oloze kufwa nachikavachinanga.
7 Vaze vambimba vafwanyine nge tuvalu vaze vanalongesa vayenga kujita.+ Kumitwe yavo kwapwile vimwe vyasolokele nge michama yaulu, kaha vihanga vyavo vyafwanyine nge vihanga vyavatu.
8 Vapwile najikambu nge jikambu jamapwevo. Kaha mazo avo apwile nge mazo avandumba.+
9 Vapwile navipwiko vyakukinga tulo vyakufwana nge vipwiko vyafwelu. Lushindo lwamavava avo lwapwile nge lushindo lwamatemba akukoka kutuvalu vavavulu vaze navalahila kujita.+
10 Vapwile nawa namikila namimunyi nge tuvwanda, kaha kumikila yavo kukiko kwatwama ngolo javo jakukolesanga vatu tukweji vatanu.+
11 Vatwama namwangana wavo, ikiye kangelo uze alama wina wakuzeneka kukuma.+ MuchiHepeleu lijina lyenyi ikiye Avatone,* kaha muchiHelase lijina lyenyi ikiye Apolyone.*
12 Lamba lyatete linahichi lyehi. Kaha ivwenu! Hanyima yavyumevi naheza cheka lamba+ mapapa kavali.
13 Kangelo wakusokesa 6 + embile luneta+ lwenyi. Kaha ngwevwile lizu lyakufuma kujimbinga jalijiko lyakulumbila lyaulu+ lize lili kumeso aKalunga,
14 nalihanjika kuli kangelo wakusokesa 6 uze apwile naluneta ngwalyo: “Kasununa vangelo vawana vaze vanakase kukalwiji wamunene Yufwalate.”+
15 Kaha vakasunwine vaze vangelo vawana, vaze valongesela lyehi ola, nalikumbi, nakakweji, namwaka, mangana vakajihe chimbwa chimwe chakusokesa muvimbwa vitatu vyavatu.
16 Kuvula chamaswalale vakutambukila hatuvalu vapwile mayongomena amayongomena avali,* kaha ngwevwile kuvula chavo.
17 Kaha omu mukiko mungwamwene vaze tuvalu muchakumwenesa, navaze vatwamineho: Vavwalile vipwiko vyakukinga tulo vize vyapwile naulombo uchila nge kakahya, nawou ushikima nge yashinde, nawou wausela nge sulufulu, kaha mitwe yavaze tuvalu yapwile nge mitwe yavandumba.+ Mutunwa twavo mwalovokelenga kakahya nawishi nasulufulu.
18 Kaha chimbwa chimwe chakusokesa muvimbwa vitatu vyavatu chafwile kuvipupu kanevi vitatu, kukakahya, nawishi, nasulufulu vize vyalovokelenga mutunwa twavo.
19 Mwomwo ngolo javaze tuvalu jatwama mutunwa twavo, nakumikila yavo, mwomwo mikila yavo yapwa nge manoka, kaha nawa yatwama namitwe, kaha evi vikiko vali nakulemeka navyo vatu.
20 Oloze vatu veka vakwavo vaze vazenekele kujiha navipupu kanevi, kavapihililile nakwalumuka nakuseza milimo yamavoko avoko, kavalitwaminyine kulemesa vandemone, namakombelo aulu, nawawa apalata, nawawa aunengu, nawawa amalolwa, nawawa avitondoko, aze kaweshi kumona, chipwe kwivwa, chipwe kutambukako.+
21 Kaha kavapihililile nakwalumuka nakulitwamina kujiha vatuko, chipwe kuseza vilinga vyavo vyakupanda, chipwe ujila* wavo, chipwe wiji wavoko.
Kwinyikila Chamwishi
^ Ulumbunwiso, “Muka-kunongesa.”
^ Ulumbunwiso, “Kunongesa.”
^ Chipwe “vapwile 20,000 kuyivulisa mapapa 10,000,” kulumbununa, 200,000,000.
^ MuchiHelase, por·neiʹa. Tala Mukana waMazu.
