Luka 1:1-80
1 Hakumona nge vavavulu vanesejeka lyehi kukungulula nakusoneka mijimbu yavyuma vize twetavila etu,+
2 nge muze vatulwezelevyo vaze vavimwene+ navaka-kuzata milimo yakwambulula mujimbu+ kufuma vene kukuputuka chavyumevi,
3 ngocho nayami nawa ngunachimono kupwa chakutamo kukusonekelavyo ove Teyofwilo+ wamulemu kweseka nomu muvyalikavila, mwomwo ngunahehwojola kanawa mwaya vyuma vyosena kufuma kuze vyaputukilile,
4 mangana ngwami utachikize kanawa shindakanyi yavyumovyo vanapunga nakukunangula namazu ahakanwa.+
5 Hamakumbi aHelote*+ amwangana wavaYuleya, kwapwile kapilishitu umwe, lijina lyenyi ikiye Zekaliya, wahalizavu lyaAviya.+ Pwevo lyenyi apwile umwe wavana vaAlone, lijina lyenyi ikiye Elizaveta.
6 Vosena vavali vapwile vakwoloka kumeso aKalunga, vatambukilenga mukulonga nge kutesa najishimbi najindongi jaYehova* josena.
7 Oloze kavapwile namwanako, mwomwo Elizaveta apwile mumba, kaha vosena vavali vapwile tushinakaji.
8 Jino omu apwile nakuzata mulimo waupilishitu hamakumbi aze lizavu lyavo+ lyazachilenga kumeso aKalunga,
9 lwola lwenyi lwahetele lwakwingila muchihela chaYehova*+ chajila mangana alumbe vyuma vyalivumba lyamwaza+ nge omu mwaya mulimo waupilishitu.
10 Kaha liyongomena lyavatu vosena vapwile nakulomba kuweluka haola yakulumba vyuma vyalivumba lyamwaza.
11 Jino kangelo kaYehova* asolokele kuli ikiye, emanyine kumutamba wachilyo walijiko lyakulumbila vyuma vyalivumba lyamwaza.
12 Omu Zekaliya amumwene, alizuzukilile, kaha evwile woma.
13 Oloze uze kangelo ambile kuli ikiye ngwenyi: “Ove Zekaliya kanda nawivwa womako, mwomwo kulembelela chove vanachivu. Pwevo lyove Elizaveta mwakakusemena mwana walunga, kaha ukamuluka lijina ngwove, Yowano.+
14 Naukawahililanga nakulisamba chikuma, kaha vatu vavavulu navakevwa kuwaha hakusemuka chenyi,+
15 mwomwo mwakapwanga wamulemu kumeso aYehova.*+ Oloze katela kukanwa vinyo chipwe wala wekako.+ Mwakazala nashipilitu yajila numba vene shimbu kanda asemuke,*+
16 kaha mwakakindulwisa vana vaIsalele vavavulu kuli Yehova* Kalunga kavo.+
17 Kaha nawa mwakatetekela kulutwe lwaKalunga nashipilitu ngana yaElija nangolo jenyi,+ mangana akakindulwise michima yamasevo kuli vana vavo,+ nakukafwa nawa vaka-kulikanga vapwenga namangana amwenemwene avaka-kwoloka, nakumulongesela Yehova* vatu mangana akavawane vakulizanga lyehi.”+
18 Zekaliya ambile kuli uze kangelo ngwenyi: “Vyuma muka navingulingisa ngufwelele mazu ove? Mwomwo ami ngukashinakaji, kaha pwevo lyami nawa nakulu lyehi chikuma.”
19 Uze kangelo amukumbulwile ngwenyi: “Ami yami Ngavalyele+ uze eji kwimananga kumeso aKalunga,+ kaha vangutumanga kwiza nakuhanjika nove, nakukwambulila ou mujimbu wamwaza.
20 Oloze tala, naupwanga ukamama, kaha kaweshi kuhanjikangako palanga nakulikumbi lize navikasoloka vyuma kana, mwomwo kawetavilile mazu amiko aze nawakatesamo halwola lwawo vawatongwela.”
21 Jino vatu vapwile lika nakuvandamina Zekaliya, kaha valikomokelele mwomwo ashimbwile chikuma muze muchihela chajila.
22 Omu alovokelemo kahashile kuhanjika kuli vakikoko, ngocho vatachikijile ngwavo namono chuma chakukomwesa* muze muchihela chajila. Azachishilenga jino mavoko hakuhanjika navo, apwile lika naumama.
23 Omu akumine makumbi enyi akuzata mulimo wajila,* ayile kwimbo lyenyi.
24 Jino omu mwahichile makumbi, puwenyi Elizaveta emichile lijimo, kaha kalisolwelenga kuvatuko hatukweji vatanu. Ambile ngwenyi:
25 “Omu mukiko nangulingi Yehova* hamakumbi awa. Nangwalakana nakungufumisa sonyi ngunevunga kuvatu.”+
26 Jino hakakweji wamuchitanu naumwe, kangelo Ngavalyele+ vamutumine kuli Kalunga ayenga kunganda yakuNgalileya vavuluka ngwavo Nazaleta,
27 kuli mwanapwevo uze kanda achilisavaleho lyehi nalunga,+ uze vahuhwile kuli Yosefwe, lunga wakutanga yaNdavichi. Lijina lyayauze mwanapwevo ikiye Maliya.+
28 Kahomu uze kangelo engilile muze apwile Maliya, ambile ngwenyi: “Mwoyo wove, ove vakisula, Yehova* ali nayove.”
29 Oloze ikiye alikomokelele chikuma hamazu ahanjikile, kaha aputukile kushinganyeka mwalumbunukilile kumeneka kanechi.
30 Ngocho uze kangelo ambile kuli ikiye ngwenyi: “Ove Maliya, kanda nawivwa womako, mwomwo Kalunga nakwivwila uselewa.
31 Nawimita lijimo, kaha naukasema mwana walunga,+ ukamuluka lijina ngwove, Yesu.+
32 Ou mwana mwakapwanga wamulemu,+ kaha navakamuvulukanga ngwavo, Mwana wayou Wakulitulaho Chikuma.+ Yehova* Kalunga mwakamuhana litanda lyakakuluka yenyi Ndavichi.+
33 Mwakapwanga Mwangana wavava vakuzuvo yaYakova haya myaka yosena, kaha Wangana wenyi kaweshi kukakumako.”+
34 Oloze Maliya ambile kuli uze kangelo ngwenyi: “Uno nachipwa ngachilihi ngocho, hakuwana nge ami kanda nguchilisavaleho lyehi nalunga?”+
35 Uze kangelo amukumbulwile ngwenyi: “Shipilitu yajila nayiza hali ove,+ kaha ngolo jayou Wakulitulaho Chikuma najitwama hali ove. Shikaho ou mwakasemuka navakamuvuluka ngwavo, wajila,+ MwanaKalunga.+
36 Kausoko kove Elizaveta uze vavulukilenga ngwavo mumba, naikiye nawa nemita lijimo lyamwana walunga muushinakaji wenyi. Uno jino hikakweji wakusokesa 6.
37 Kakweshi mazu aze nahanjika Kalunga nawahona kutesamoko.”+
38 Jino Maliya ambile ngwenyi: “Tala, ami ndungo yaYehova* wapwevo! Chipwenga vene ngocho kweseka namazu ove.” Hakwivwa ngocho, uze kangelo amusezele.
39 Ngocho Maliya akatukile hamakumbi aze, ayile washiwashi kungalila yajipili, kunganda yamuYuta.
40 Engilile muzuvo yaZekaliya nakumeneka Elizaveta.
41 Jino omu Elizaveta evwile Maliya mwamumeneka, kemba uze apwile mujimo lyenyi alyungunwine. Elizaveta azalile nashipilitu yajila,
42 kaha atambakanyine nalizu lyakukanguka ngwenyi: “Ove yove vakisula hali mapwevo vosena, kaha vakisula nawa shina mwanou mwakasemuka mujimo lyove!
43 Echi hikutokwa chikuma kungutambukila kuli naye yaMwata wami.
44 Mwomwo omu ngwevwanga lizu lyove lyakungumeneka, kemba nalyungununa mujimo lyami nakulisamba chikuma.
45 Awahilila nawa shina pwevo ou etavilanga, mwomwo vyuma vize vanamuvulukila kufuma kuli Yehova* navikatesamo.”
46 Maliya ambile ngwenyi: “Mwono* wami naumutohwesanga Yehova,*+
47 kaha shipilitu yami nayikinyinyinanga muli Mulwilo wami+ Kalunga,
48 mwomwo natale hali ami ndungo yenyi wapwevo+ uze ahona ulemu. Mwomwo kufuma vene oholili muvisemunwino vyosena navakangwambanga ngwavo nguwakuwahilila,+
49 mwomwo Uze ukwechi ngolo nangulingila vyuma vyavinene, kaha lijina lyenyi lyajila.+
50 Mwatetelanga vaze vamwivwa woma+ kuchisemunwino hichisemunwino.
51 Nazate vyuma vyangolo nalivoko lyenyi, kaha vaka-kulivwimba mumichima yavo+ navamwange lyehi mwamwa.
52 Nafumisa vatu vangolo hamatanda avo,+ kaha natohwesa vatu vakuhona ulemu.+
53 Vaze vali nazala navekuchisa navyuma vyamwaza,+ kaha nakindulwisa vaka-luheto mavokovoko.
54 Nakafwe ngamba yenyi Isalele, mwomwo nanuka lushiko lwenyi lwakutetela,+
55 nge muze ahanjikile kuli vakakuluka jetu ngwenyi mwakatetela Apalahama namuka-tanga* yenyi+ haya myaka yosena.”
56 Jino Maliya atwamine nenyi kafwe tukweji vatatu, kaha akindulukile kwimbo lyenyi.
57 Jino makumbi aElizaveta akusapuluka atelemo, kaha asemene mwana walunga.
58 Omu vakwavo vaze atungile navo navausoko wenyi vevwile ngwavo Yehova* namutetela chikuma, vawahililile nenyi hamwe.+
59 Kaha halikumbi lyakusokesa 8 vejile nakujihana uze mwana.+ Ngocho vasakile kumuluka lijina lyaise ngwavo, Zekaliya.
60 Oloze naye ambile ngwenyi: “Nduma! Lijina lyenyi Yowano.”
61 Hakwivwa ngocho, vambile kuli ikiye ngwavo: “Kakweshi kausoko kove umwe atwama nalijina kaneliko.”
62 Jino vehwile ise kuzachisa mavoko avalweze lijina asakile kuluka uze mwana.
63 Kaha alombele liliva lyakusonekaho, asonekeleho ngwenyi: “Lijina lyenyi ikiye Yowano.”+ Ngocho vosena valikomokelele.
64 Hahaze vene kanwa kenyi kalokolokele, lilimi lyenyi lyasovokele, kaha aputukile kuhanjika+ nakwalisa Kalunga.
65 Jino vatu vosena vaze vatungile navo vevwile woma, kaha vyuma vyosenevi vaputukile kuvihanjika mungalila yosena yajipili yaYuleya.
66 Ngocho vosena vaze vevwileko vavilaminyine mumichima yavo nakwamba ngwavo: “Ou mwana kana mwakapwa ngachilihi?” Mwomwo livoko lyaYehova* lyapwanga chikupu nenyi hamwe.
67 Jino ise Zekaliya azalile nashipilitu yajila, kaha apolofwetele ngwenyi:
68 “Vamwalisenga Yehova Kalunga kaIsalele,+ mwomwo nalakana vatu jenyi nakuvayovola.+
69 Natuzundwila lumbinga lwaulwilo*+ muzuvo yangamba yenyi+ Ndavichi,
70 nge muze ahanjikile kuhichila mutunwa twavapolofweto jenyi vajila vakushikulu+
71 vyakutulwila kuli vaka-kole jetu, nakumavoko avosena vaze vatuhunga,+
72 mangana atutetele nge muze ashikile vakakuluka jetu, kaha nanuka chivwasano chenyi chajila,+
73 lushingo luze alishingile kuli kakuluka yetu Apalahama,+
74 mangana kufuma hakutuyovola kumavoko avaka-kole jetu, akatuhane kutokwa chakumuzachilanga mulimo wajila chakuzeneka woma
75 nakushishika nakupwa vakwoloka kumeso enyi hamakumbi etu osena.
76 Oloze ove mwana wamundende, navakakuvulukanga ngwavo ukapolofweto kayou Wakulitulaho Chikuma, mwomwo naukatetekela kulutwe lwaYehova* nakumuwahishila jijila jenyi,+
77 nakuhana vatu jenyi chinyingi chakutachikiza ulwilo hakuvakonekela jishili javo,+
78 mwomwo yakeke yaKalunga ketu. Hakeke kaneyi hakiko vene natukamwena musana wakufuma mwilu nge uze wahakututuka chalikumbi,
79 nakumunyikila vaze vatwama muchihela chakwilava wi namumilima yakuneha kufwa,+ nakutalikisa mahinji etu mujila yakuunda.”
80 Kaha uze mwana akulile nakuzama mushipilitu, kaha apwilenga mupambo palanga nakulikumbi alisolwele hatoma kuli vaIsalele.
Kwinyikila Chamwishi
^ Tala Mukana waMazu.
^ Tala Chihande A5.
^ Tala Chihande A5.
^ Tala Chihande A5.
^ Chipwe “kufuma vene mujimo lyanaye.”
^ Tala Chihande A5.
^ Tala Chihande A5.
^ Tala Chihande A5.
^ Chipwe “namono chakumwenesa.”
^ Chipwe “mulimo wenyi wakuzachila vatu.”
^ Tala Chihande A5.
^ Tala Chihande A5.
^ Tala Chihande A5.
^ Tala Chihande A5.
^ Tala Chihande A5.
^ Tala Chihande A5.
^ Tala Mukana waMazu.
^ Hela., “nambuto.”
^ Tala Chihande A5.
^ Tala Chihande A5.
^ Chipwe “Natuzundwila mulwilo wangolo.” Tala Mukana waMazu, “Lumbinga.”
^ Tala Chihande A5.
