Luka 10:1-42
10 Omu vyakumine vyumevi, Mwata atongwele veka 70, kaha avatumine vavali vavali+ valivange kuya kujinganda josena nakuvihela vyosena kuze ayile naikiye usula.
2 Jino avalwezele ngwenyi: “Mulimo wakwaha unatoho, oloze vaka-kuzata vanapu vavandende. Shikaho mulombenu Mwenyamulimo wakwaha mangana atume vaka-kuzata vayenga mumulimo wenyi wakwaha.+
3 Yenunga. Ivwenu! Ami nguli nakumituma nge vana vamikoko mukachi katungunge.+
4 Kanda namumbata ngonga yajimbongoko, chipwe lipakumuna lyavyakulyako, chipwe mendeloko,+ kaha nawa kanda namulimeneka* namutu mujilako.
5 Mweshomwo muzuvo namwingila vangilenu kwamba ngwenu: ‘Muzuvo yino mupwenga kuunda.’+
6 Kachi nge kamweshi mutu asaka kuundako,* kaha nachihiluka cheka kuli enu vavene. Oloze nge mwali, kaha kuunda chenu nachitwama hali ikiye.
7 Ngocho twamenu muzuvo+ yize nakulya nakunwa vize navamihana,+ mwomwo muka-kuzata atela kumuhana fweto yenyi.+ Kaha kanda namukanungwojoka kujizuvoko.
8 “Kaha nawa mweshomwo munganda namwingila, kaha vakiko hinavamitambula, lyenu vyeshovyo navatumbika kumeso enu,
9 nakuka vaka-kuviza vaze valimo, kaha valwezenunga ngwenu: ‘Wangana waKalunga uneza kwakamwihi nayenu.’+
10 Oloze mweshomwo munganda namwingila, kaha hinavakana kumitambula, yenu mujijila jayo nakwamba ngwenu:
11 ‘Natumitotomwena lukungu lwamunganda yenu+ elu lunatukakachila kumahinji etu. Olozenyi tachikizenu ngwenu Wangana waKalunga uneza kwakamwihi.’
12 Nangumilweza ngwami, kuzangamisa navakazangamisa nganda kana+ halikumbi lize nachikatohwa chikuma kuhambakana chaSotome.
13 “Lamba kuli ove Kolajine! Lamba kuli ove Mbetesayita! Mwomwo kachi milimo yangolo yize vanalingila muli enu yikiko valingililile muTule naShitone, kachi vatu vamujinganda kana vapihililile nakwalumuka nakuvwala vikeleyi nakutwama muuto.+
14 Shikaho, kuzangamisa navakamizangamisa enu halikumbi lyakusopesa nachikatohwa chikuma kuhambakana chaTule naShitone.
15 Kaha ove nawa Kapelenau, kutala navakakuzezula mbwe nakwilu numba? Naukashikumuka muFuka.*
16 “Weshowo mwamivwilila enu nangwivwilila nayami nawa.+ Kaha weshowo mwamileununa enu nanguleununa nayami nawa. Kaha nawa, weshowo mwanguleununa ami naleununa nawa Uze angutumine.”+
17 Jino vaze 70 vahilukile nakuwahilila. Vambile ngwavo: “Ove Mwata, navandemone vanaliluula kuli etu hakuzachisa lijina lyove.”+
18 Hakwivwa ngocho, ambile kuli vakiko ngwenyi: “Nguli nakumona Satana naholoka lyehi+ nge muveso kufuma mwilu.
19 Talenu! Ngunamihane ngolo jakulyata manoka natuvwanda, nakuhonesa ngolo jamuka-kole josena,+ kaha chikupu vene kakweshi chuma nachikamilemekako.
20 Chipwe ngocho, kanda namuwahilila ngwenu vashipilitu vanaliluula kuli enuko, oloze wahililenu mwomwo majina enu vanawasoneka lyehi mwilu.”+
21 Haola vene yize, Yesu awahililile chikuma nashipilitu yajila nakwamba ngwenyi: “Ove Tata, Mwata wamelu namavu, ngunakwalisa kumeso avatu, mwomwo vyumevi unaviswekela vaka-mangana navaze vananguka,+ oloze unavisolola kuli vana vavandende. Ove Tata, mwomwo omu mukiko wevwila kuwaha.+
22 Vyuma vyosena vananguhanevyo kuli Tata, kaha kakweshi mutu amutachikiza Mwanako, shina Tata kaha. Kaha nawa kakweshi mutu amutachikiza Tatako, shina Mwana+ kaha, naweshowo nawa navazanga kumusolwelayo kuli Mwana.”+
23 Ngocho alumukilile kuli tumbaji twenyi nakuvalweza kupenge ngwenyi: “Awahilila meso aze ali nakumona vyuma muli nakumona enu.+
24 Mwomwo nangwamba kuli enu ngwami, vapolofweto navamyangana vavavulu vasakile kumona vyumevi muli nakumona enu, oloze kavavimweneko,+ vasakile kwivwa vyumevi muli nakwivwa enu, oloze kavavivwileko.”
25 Jino mutu umwe uze atachikijile chikuma Jishimbi ejile nakumweseka, ambile ngwenyi: “Ove Muka-kunangula, vyuma muka ngwatela kulinga mangana ngukaswane kuyoya chahaya myaka yosena?”+
26 Yesu ambile kuli ikiye ngwenyi: “MuJishimbi vasoneka ngwavo ika? Weji kutangangamo ika?”
27 Ikiye akumbulwile ngwenyi: “‘Zangenunga Yehova* Kalunga kenu namichima yenu yosena, namyono* yenu yosena, nangolo jenu josena, navishinganyeka vyenu vyosena,’+ ‘nakuzanga vakwenu nganomu mwalizanga enu vavene.’”+
28 Jino ambile kuli ikiye ngwenyi: “Unakumbulula mwakwoloka. Linganga lika ngocho, kaha naukatambula kuyoya.”+
29 Oloze uze mutu hakusaka alisolole ngwenyi wakwoloka,+ ehwile Yesu ngwenyi: “Uno iya chikupu napu mukwetu?”
30 Yesu akumbulwile ngwenyi: “Mutu umwe apwile nakufuma kuYelusalema nakushikumuka kuYeliko, kaha alitulukile navihwanga vaze vapukwile vyuma vyenyi nakumuveta, kaha vayile, vamusezele nalezumuka.
31 Jino kapilishitu umwe apwile nakushikumuka mujila yize, oloze omu amumwene amukondolokele.
32 NakaLevi nawa omu ahetele hachihela chize, hakumumona amukondolokele.
33 Oloze kaSamaliya+ umwe uze apwile nakuhita mujila yize, ahetele haze apwile uze mutu, kaha hakumumona amwivwilile keke.
34 Ngocho apandamine kuli ikiye, ahingunwinyine maji navinyo hajimbandu jenyi, kaha ajingileho. Amunyinyishile hakanyama kenyi nakumutwala kuzuvo yavangeji vakamulame.
35 Lichako ambachile jindenali* jivali, ajihanyine kuli mwenyazuvo nakwamba ngwenyi, ‘Mulame kanawa, kaha jeshojo jikwavo nauhakilaho, nangukakufwetajo omu nangukakinduluka.’
36 Jino iya hali ava vatatu unamono ngwove ikiye alilingishile kupwa mukwavo+ wayauze alitulukile navihwanga?”
37 Ikiye ambile ngwenyi: “Uze amutetelele.”+ Yesu ambile jino kuli ikiye ngwenyi: “Yako ukalingenga ngocho nayove nawa.”+
38 Jino omu vapwile nakuya, engilile mwimbo limwe. Kaha pwevo umwe atambwile Yesu kupwa ngeji yenyi muzuvo. Lijina lyenyi apwile ikiye Malita.+
39 Ou pwevo apwile nandumbwenyi wapwevo uze vavulukilenga ngwavo, Maliya. Maliya atwamine kumahinji aMwata nakwivwilila vyuma apwile nakuhanjika.*
40 Oloze Malita ahungukile namilimo yayivulu. Ngocho apandamine kuli ikiye nakwamba ngwenyi: “Ove Mwata, uno kawamwene omu nangwechelela ndumbwami nguzate milimo uka wamiko nyi? Shikaho mulweze ezenga angukafweko.”
41 Oloze Mwata amukumbulwile ngwenyi: “Ove Malita, ove Malita, unakulizakamina nakutanguka navyuma vyavivulu.
42 Vyuma vyavindende kaha vinakusakiwa, mokomoko chimwe kaha. Maliya nasakula chazano chamwaza,+ kaha kaveshi kukamutambulachoko.”
Kwinyikila Chamwishi
^ Chipwe “namulipakata mukasamba.”
^ Hela., “kamweshi mwanakuundako.”
^ Chipwe “muHetese,” kulumbununa fuka yavatu vosena. Tala Mukana waMazu.
^ Tala Mukana waMazu.
^ Tala Chihande A5.
^ Tala Chihande B14.
^ Hela., “nakwivwilila kumazu enyi.”
