Luka 13:1-35
-
Pihililenu nakwalumuka, chipwe kuminongesa (1-5)
-
Chifwanyisa chamukuyu wakuzeneka kwima mihako (6-9)
-
Pwevo wachitonji navamuka haSambata (10-17)
-
Chifwanyisa chalinona lyamusetale nachimbalwila (18-21)
-
Kwingila muchikolo chachindende chasaka kukilikita (22-30)
-
“Owo mumbwe” Helote (31-33)
-
Yesu mwalishona Yelusalema (34, 35)
13 Halwola luze, vatu vamwe vamulwezele chihande chavaka-Ngalileya vamwe vaze vakwechi manyinga avo aze Pilatu afutwile nawawa avimuna javo vakuvatula.
2 Ngocho Yesu ambile kuli vakiko ngwenyi: “Enu munashinganyeka ngwenu vaze vaka-Ngalileya hakuyanda ngachize vapwile vaka-shili chikuma kuhambakana vakwavo vaka-Ngalileya vosena tahi?
3 Nangumilweza ngwami, nduma. Oloze kuvanga mupihilile nakwalumuka, mokomoko nayenu nawa navakaminongesa muvosena.+
4 Kaha nawa vatu 18 vaze kashiukilile kaposhi kakuShilowame nakuvajiha, munashinganyeka ngwenu, vakiko vapwile vaka-shili chikuma kuhambakana vakwavo vosena vatwama muYelusalema tahi?
5 Nangumilweza ngwami, nduma. Oloze kuvanga mupihilile nakwalumuka, mokomoko muvosena navakaminongesa nge omu vanongele vakiko.”
6 Jino atwalileho nakuvalweza chifwanyisa chino ngwenyi: “Mutu umwe apwile namukuyu uze atumbile muwande wenyi wamivinyo. Kaha ayile nakutondako mihako, oloze kayiwanyineko.+
7 Jino ambile kuli muka-kuzata muwande wamivinyo ngwenyi, ‘Tala, ngunezanga nakutondatonda mihako kumukuyu uno hamyaka yitatu, oloze kuyiwananga nduma. Upakule! Ikaze nauzezekela mavu?’
8 Ikiye amukumbulwile ngwenyi, ‘Ove mwata, achiweche nawa mwaka umwe mangana nguchipululeko nakuhakako wilo.
9 Kachi nge kulutwe naukema mihako, kaha chamwaza. Oloze nge pimbi, kaha naukaupakula.’”+
10 Jino haSambata, Yesu apwile nakunangula vatu musunangonga yimwe.
11 Kaha mwapwile pwevo apwilenga nashipilitu wamupi uze amuvijishile* hamyaka 18. Ou pwevo azembamine chikuma, kahashilenga kwoloka chipwe chachindendeko.
12 Omu Yesu amumwene, amusanyikile nakwamba kuli ikiye ngwenyi: “Ove pwevo, unasokoka kukuviza chove.”+
13 Amunangikile mavoko enyi, kaha hahaze vene olokele nakuputuka kumutohwesa Kalunga.
14 Oloze muka-kutwaminyina musunangonga hakwivwa kupihya chikuma mwomwo Yesu okile mutu haSambata, ahanjikile kulizavu ngwenyi: “Kuli makumbi 6 aze vatu vatela kuzata milimo,+ shikaho twayenu vamyuke hamakumbi kana awa, keshi halikumbi lyaSambatako.”+
15 Oloze Mwata amukumbulwile ngwenyi: “Enu vaka-kulyonga,+ uno iya hali enu keshi kukasununa ngombe yenyi chipwe chimbulu chenyi muchipato nakumutwala akanwe meya+ haSambatako?
16 Kutala ou pwevo mwanaApalahama, ou vakashile kuli Satana hamyaka 18, katelele kumukasununa mukuli kaneyi halikumbi lyaSambatako numba?”
17 Omu ahanjikile vyumevi, vaka-kumwimanyina nakole vosena vaputukile kwivwa sonyi, oloze lize liyongomena lyosena lyevwile kuwaha havyuma vyaupahu vyosena vize alingile.+
18 Shikaho atwalileho lika nakwamba ngwenyi: “Uno Wangana waKalunga unafwane nge ika, kaha nanguwesekesa kuka?
19 Unafwane nge linona lyamusetale lize mutu ambachile nakutumba mulitepa lyenyi. Lyakulile nakupwa mutondo, kaha tujila vakutuka mwilu vejile nakutwamanga mumaswa avo kumitango yawo.”+
20 Kaha ambile cheka ngwenyi: “Wangana waKalunga nanguwesekesa kuka?
21 Unafwane nge chimbalwila chize pwevo ambachile nakuchingasana naunga wakutesa muvyesekelo vyavinene* vitatu, palanga nomu wafutunukile wosena.”+
22 Jino Yesu atambwojokelenga munganda hinganda namulimbo hilimbo nakunangula vatu oku ali nakuya ungeji wenyi kuYelusalema.
23 Jino mutu umwe ambile kuli ikiye ngwenyi: “Ove Mwata, uno ava navalwila vavandende kaha tahi?” Ikiye ambile kuli vakiko ngwenyi:
24 “Kilikitenu chikuma hakwingila muchikolo chachindende,+ mwomwo nangumilweza ngwami, vavavulu navakasaka kwingilamo, oloze kaveshi kukahasako.
25 Omu mwakalinga mwenyazuvo nakatuka lyehi nakusoka kuchikolo, enu namukemana kuweluka nakungongomweza kuchikolo nakwamba ngwenu, ‘Ove Mwata, tusokolweleko.’+ Oloze ikiye mwakamikumbulula ngwenyi: ‘Kangwatachikijile okwo munafumuko.’
26 Jino namukaputuka kwamba ngwenu, ‘Twalilenga, twanwinenga kumeso ove, kaha wanangwililenga mujijila jetu.’+
27 Oloze mwakamba kuli enu ngwenyi, ‘Kangwatachikijile okwo munafumuko. Fumenu kuli ami, enu vaka-kulinga vilinga vyakuhenga muvosena!’
28 Kwakuze vene kunamukapwanga nakulila nakulingenjunga kumazo omu namukamona Apalahama, naIsaka, naYakova navapolofweto vosena muWangana waKalunga, oku enu vanamimbili kuweluka.+
29 Kaha nawa, vatu navakafuma kumututuko nakumulauko, nakunote nakusulo nakwiza nakusendavala kumesa muWangana waKalunga.
30 Kaha vamwe vaze vakukuminyina navakapwa vakulivanga, kaha vamwe vaze vakulivanga navakapwa vakukuminyina.”+
31 Haola vene yize, vaFwaliseu vamwe vejile nakumulweza ngwavo: “Kuno fumako, yako kweka, mwomwo Helote ali nakusaka kukujiha.”
32 Kaha ambile kuli vakiko ngwenyi: “Yenu mukalweze owo mumbwe ngwenu, ‘Ivwa! Lelo nahamene nangulovola vandemone nakuka vatu, kaha halikumbi lyamuchitatu numbanyi ngukakumise.’
33 Oloze ngwatela kutambuka ungeji wami lelo nahamene nahamenyauze, mwomwo kapolofweto kavatela kumujihila kuweluka waYelusalemako.+
34 Ove Yelusalema, ove Yelusalema, ove muka-kujiha vapolofweto, ove muka-kwasa malolwa vaze vanatumu kuli ove.+ Ngwasakile mapapa kakavulu kukungulula vana vove nge omu chali eji kukungulwilanga vana venyi mumavava enyi. Oloze enu kamwasakileko.+
35 Talenu! Zuvo yenu vanamiselayo.+ Nangumilweza ngwami, chikupu vene kamweshi kungumona chekako palanga nomu namukamba ngwenu: ‘Vakisula ou mweza mulijina lyaYehova.’”*+
Kwinyikila Chamwishi
^ Chipwe “amutengwile.”
^ Hela., “muvyesekelo vyashiya.” Shiya yimwe yapwile jilita 7.33. Tala Chihande B14.
^ Tala Chihande A5.
