Luka 14:1-35
14 Kaha halwola lweka, omu engilile muzuvo yatwamina umwe wavaFwaliseu nakulya vyakulya haSambata, vapwile nakumutala chikuma.
2 Jino mutu umwe uze apwile namusongo walilupa-kuvova apwile kumeso enyi.
3 Ngocho Yesu ehwile vaze vatachikijile chikuma Jishimbi navaFwaliseu ngwenyi: “Uno vachitavisa kuka mutu haSambata tahi, nyi chiku?”+
4 Oloze vakiko vaholele kulu. Ngocho Yesu akwachile uze mutu, amukile nakumusuula ayenga.
5 Jino ambile kuli vakiko ngwenyi: “Iya hali enu, kachi nge mwanenyi chipwe ngombe yenyi naholokela muwina+ halikumbi lyaSambata, mwazeneka kumufumisamo washiwashi?”+
6 Kaha kavahashile kumukumbulula havyumeviko.
7 Omu Yesu amwene vatu vaze valanyine vali nakulisakwila vihela vyaulemu,+ avalwezele chifwanyisa ngwenyi:
8 “Kachi nge mutu nakulanye kuchifupawenga, kanda ukasendavala hachihela chaulemuko.+ Pamo nalanye nawa mutu wamulemu kuhambakana ove.
9 Kaha uze amilanyanga mweza nakwamba kuli ove ngwenyi, ‘Katuka, mangana ou asendavaleho.’ Kaha himukatukaho nasonyi nakuya nakusendavala kuchihela chakunyima.
10 Oloze nge vanakulanye, yako usendavale kuchihela chakunyima, mangana omu mweza mutu uze nakulanye akwambe ngwenyi, ‘Ove sepa lyami, yako kulutwe kuze.’ Kaha mupwa naulemu kumeso avakwenu vangeji vosena.+
11 Mwomwo weshowo mwalitohwesa ivene navakamwinyisa, kaha weshowo mwalinyisa ivene navakamutohwesa.”+
12 Kufumaho, ambile nawa kumutu uze amulanyine ngwenyi: “Omu nauwahisa kulya chahamulungu, chipwe chachingoloshi, kanda usanyika kaha masepa jove, chipwe vandumbwove, chipwe vausoko wove, chipwe vaka-luheto vaze walihata navoko. Mwomwo navakiko lwola lumwe navakakulanya nakukushishishilamo.
13 Oloze omu nauwahisa chiwanyino chakulya, lanyako vaka-kuhutwa, navaka-kumbilikita, navitonji, natupuputa,+
14 kaha mukapwa uwakuwahilila, mwomwo kaveshi navyuma vyakukushishishilamoko. Mwomwo navakakushishishilamo halwola lwakusanguka+ chavaka-kwoloka.”
15 Umwe hali vaze vakwavo vangeji hakwivwa vyumevi, ambile kuli ikiye ngwenyi: “Awahilila ou mwakalya vyakulya* muWangana waKalunga.”
16 Yesu ambile kuli ikiye ngwenyi: “Mutu umwe awahishile kulya chachingoloshi chachivulu,+ kaha alanyine vatu vavavulu.
17 Jino haola yakulya chachingoloshi, atumine ndungo yenyi akalweze vatu vaze alanyine ngwenyi, ‘Twayenu, mwomwo vyuma vyosena vinakumu lyehi kuwahisa.’
18 Oloze vosena vaputukile kuwana jijila jakulyongelamo.+ Watete ambile kuli ikiye ngwenyi, ‘Ngunalande wande, kaha ngwatela kuya nakuutala. Nguli nakukulomba ungukonekeleko.’
19 Weka ambile ngwenyi, ‘Ngunalande vangombe vakujitoka 10, kaha nguli nakuya nakuveseka. Nguli nakukulomba ungukonekeleko.’+
20 Weka nawa ambile ngwenyi, ‘Kalinwaha vene ngunambate pwevo, shikaho kangweshi kuhasa kwizako.’
21 Ngocho uze ndungo ejile, ambulwile vyumevi kuli kaka yenyi. Jino uze mwenyazuvo apihililile nakwamba kuli ndungo yenyi ngwenyi, ‘Yakonga washiwashi mumakulakula namujijila janganda, unehe vaka-kuhutwa, navaka-kumbilikita, natupuputa, navitonji.’
22 Omu hahichile shimbu, uze ndungo ambile ngwenyi, ‘Ove mwata, ngunalingi lyehi muze wambanga, oloze vihela kuvichili lika.’
23 Kaha kaka yenyi amwambile uze ndungo ngwenyi, ‘Yakonga mumikwakwa namujijila jajindende, ukakunyule vatu vezenga mangana zuvo yami yizale.+
24 Mwomwo nangumilweza ngwami, hamalunga vaze ngwalanyanga, naumwe wauchi mwamakila kukulya chami chachingoloshi.’”+
25 Jino mayongomena amanene apwile nakutambuka naYesu hamwe, kaha alumukile nakwamba kuli vakiko ngwenyi:
26 “Kachi nge mutu mweza kuli ami, oloze keshi kuhunga ise, nanaye, napuwenyi, navana venyi navandumbwenyi vamalunga navava vamapwevoko, numba vene kuhunga mwono wenyi,+ keshi kuhasa kupwa kambaji kamiko.+
27 Weshowo mwahona kumbata chitondo chenyi chakuyanjishila* nakungukavangiza, keshi kuhasa kupwa kambaji kamiko.+
28 Chakutalilaho, iya hali enu mwasaka kutunga kaposhi, mwazeneka chatete kutwama hamavu nakulava jimbongo jakutungisa, amone numba nge ali najimbongo jakukamanyisa?
29 Mokomoko nahase kwala kaha chihela, oloze mwahona kukamanyisa, kaha vosena vaze vapwanga nakumumona, vanahase kumusekeleka
30 ngwavo: ‘Ou mutu aputukanga kutunga, oloze kahashile kumanyisako.’
31 Mokomoko mwangana muka mwaya nakwasa jita namwangana mukwavo, mwazeneka chatete kutwama hamavu nakutwama punga, amone numba nge ikiye namaswalale jenyi 10,000 mwahasa kulwa nayauze mweza kuli ikiye namaswalale 20,000?
32 Kachi nge namono ngwenyi keshi kuhasa kulinga ngochoko, kaha mwatuma valuwa jenyi vakashimutwile vatwame mukuunda shimbu uze achili kwakusuku.
33 Chochimwe nawa, weshowo hali enu mwahona kuseza vyuma vyenyi vyosena, keshi kuhasa kupwa kambaji kamiko.+
34 “Mungwa wapwa vene wamwenemwene. Oloze kachi nge mungwa nausamuka, kaha ngolo jawo navajikindulwisa cheka naka?+
35 Kaweshi kutamo kuuhaka kumavu chipwe kuwiloko. Vatu veji kuumbilanga. Ou ali namatwitwi akwivwa evwilile.”+
