Luka 15:1-32
15 Jino vaka-kutambula mitelo vosena navaka-shili vapwile nakuungila kuli ikiye mangana vamwivwilile.+
2 Kaha vaFwaliseu navaka-kusoneka vapwile nakutatwoka ngwavo: “Ou mutu eji kwitavilanga vaka-shili nakulya navo hamwe.”
3 Jino avalwezele chifwanyisa chino ngwenyi:
4 “Mutu muka hali enu uze ali namikoko jenyi 100, kaha nge najimbalisa umwe, mwahona kuseza vaze 99 mupambo, nakuya nakutonda uze umwe najimbala palanga nomu mwamuwana?+
5 Kaha nge namuwane, mwamuveleka havifwiji vyenyi nakuwahilila.
6 Kahomu mwaheta kwimbo lyenyi mwasanyika masepa jenyi navaze alihata navo nakwamba kuli vakiko ngwenyi, ‘Wahililenu nayami, mwomwo ngunawane mukoko wami uze ajimbalanga.’+
7 Nangumilweza ngwami, chochimwe nawa mwilu mweji kupwanga kuwahilila chachinene hali muka-shili umwe uze mwapihilila nakwalumuka,+ kuhambakana hali vaka-kwoloka 99 vaze kaveshi nakusakiwa kupihilila nakwalumukako.
8 “Mokomoko pwevo muka ali najimbongo jachichele jandalakima* 10, kachi nge mwajimbalisa lumwe, mwahona kuwika linongo nakukomba muzuvo nakulutondatonda palanga nomu mwaluwana?
9 Kaha nge naluwane, mwasanyika masepa jenyi* navaze alihata navo, nakwamba ngwenyi, ‘Wahililenu nayami, mwomwo ngunawane lumbongo lwachichele lwandalakima* luze ngwajimbalisanga.’
10 Chochimwe nawa, nangumilweza ngwami, vangelo jaKalunga veji kuwahililanga hali muka-shili umwe uze mwapihilila nakwalumuka.”+
11 Jino ambile ngwenyi: “Mutu umwe apwile navana venyi vamalunga vavali.
12 Kaha wakanyike ambile kuli ise ngwenyi, ‘Ove tata, nguhaneko chazano chami oku kuvikumba.’ Ngocho sevo avapangilile vikumba vyenyi.
13 Omu mwahichile makumbi amandende, uze mwanenyi wakanyike akungulwile vikumba vyenyi vyosena nakuya kulifuchi lyeka lyakwakusuku. Kuheta kuze akenyekele vikumba vyenyi vyosena hakuhungukila muvilinga vyavipi.
14 Omu amanyishile vyosena, mulifuchi lize mwosena mwejile zala yakalombolombo yayinene, kaha aputukile kukalikiza.
15 Jino ayile nakulipanjika kuli mutu umwe wamulifuchi lize, kaha amutumine kuvipapa vyenyi akafunge vangulu.+
16 Kaha asakilenga kulya namakolongozo aze valilenga vangulu. Kaha kakwapwile mutu umwe amuhanyine vimweko.
17 “Omu aputukile kushinganyeka cheka kanawa, ambile ngwenyi, ‘Vatu jatata vakukumuna vavavulu vali nakulya chachivulu, oloze ami kuno nguli nakufwa zala.
18 Nangukatuka nguyenga kuli tata, kaha nangukamulweza ngwami: “Ove tata, ngunalingi shili kuli Kalunga* nakuli ove.
19 Kangwatelemo cheka kunguvuluka ngwove ngumwanoveko. Ngulingise ngupwenga nge nguumwe wavatu jove vakukumuna.”’
20 Ngocho akatukile nakuya kuli ise. Oloze shimbu apwile hahasuku, ise amumwene, amwivwilile keke, kaha amulahilile nakumupakata mukasamba,* kaha amusweswenyele.
21 Jino mwanenyi ambile kuli ikiye ngwenyi, ‘Ove tata, ngunalingi shili kuli Kalunga nakuli ove.+ Kangwatelemo cheka kunguvuluka ngwove ngumwanoveko.’
22 Oloze ise ambile kuli vandungo jenyi ngwenyi, ‘Anguhwisenuko! Nehenu chikuto chamwaza chikuma mumuvwikecho nakumuhaka kazeya kumunwe wenyi, nakumuvwika namendelo kumahinji.
23 Kaha nehenu uze mwanangombe wakununa, mujihenu, kaha tulyenu, tulivwisenu kuwaha,
24 mwomwo ou mwanami afwanga, oloze nayoyo cheka,+ ajimbalanga, oloze ngunamuwane.’ Kaha vaputukile kulivwisa kuwaha.
25 “Jino mwanenyi wamukulwane apwile kuwande. Kahomu apwile nakukinduluka, ahetele kwakamwihi nazuvo, kaha evwile vatu vali nakwimba visaji nakukina.
26 Ngocho asanyikile ngamba umwe nakumwihula amulweze vyuma vyapwile nakusoloka.
27 Kaha uze ngamba ambile kuli ikiye ngwenyi, ‘Ndumbwove neza, kaha iso najihi uze mwanangombe wakununa, mwomwo mwanenyi nakinduluka kuli ikiye wamukangule.’*
28 Oloze ikiye apihililile, kaha akanyine kwingila muzuvo. Jino ise alovokele nakuputuka kumulembelela.
29 Ikiye ambile kuli ise ngwenyi, ‘Achitale myaka kuvula ngunakuzachila, kaha kanda nguzombokengaho lyehi lushimbi lwove. Oloze kanda unguhaneho lyehi mwanapembe mangana ngulivwise kuwaha namasepa jami.
30 Oloze omu neza ou mwanove, ou akalile vikumba vyove namapwevo vaka-ujila, unamujihila mwanangombe wakununa.’
31 Jino ise ambile kuli ikiye ngwenyi, ‘Ove mwanami, ove unapunga lika nayami, kaha vyuma vyami vyosena vyapwa vyove.
32 Oloze chinatemo etu kulivwisa kuwaha nakusehelela, mwomwo ou ndumbwove afwanga, oloze nayoyo cheka, ajimbalanga, oloze ngunamuwane.’”
Kwinyikila Chamwishi
^ Tala Chihande B14.
^ Chipwe “masepa jenyi vamapwevo.”
^ Tala Chihande B14.
^ Hela., “kumelu.”
^ Hela., “nakukundamina hashingo yenyi.”
^ Chipwe “wamutonyi.”
