Luka 19:1-48
19 Jino Yesu engilile muYeliko, apwile nakuhitamo kaha.
2 Jino mwapwile lunga vavulukilenga ngwavo Zakeu. Ou lunga apwile mukulwane wavaka-kutambula mitelo, kaha nawa waluheto.
3 Ikiye asakile ngwenyi amone Yesu, oloze kahashileko mwomwo yaliyongomena, kaha ikiye nawa apwile wamwihi.
4 Ngocho alahilile kulutwe nakunyina kumusukumole* mangana amone Yesu, mwomwo kuze kukiko apwile nakuhichila Yesu.
5 Omu Yesu ahetele kuze, atalile kwilu nakwamba kuli ikiye ngwenyi: “Ove Zakeu, suluka washiwashi, mwomwo lelo ngwatela kutwama muzuvo yove.”
6 Hakwivwa ngocho, asulukile washiwashi, kaha awahililile kutambula Yesu kupwa ngeji yenyi.
7 Omu vatu vamwene chuma kana, vosena vatatwokele ngwavo: “Nayi nakutwama kuzuvo yamuka-shili.”+
8 Oloze Zakeu emanyine nakwamba kuli Mwata ngwenyi: “Tala! Ove Mwata, chimbwa chavikumba vyami nanguchihana vaka-kuhutwa, kaha weshowo ngwalyapwile nakumutambula chuma,* nangumushishishilamo viwana.”+
9 Hakwivwa ngocho, Yesu ambile kuli ikiye ngwenyi: “Likumbi lyalelo ulwilo uneza kuzuvo yino, mwomwo naikiye nawa apwa mwanaApalahama.
10 Mwomwo Mwanamutu ejile nakutondatonda vaze vajimbalile nakuvalwila.”+
11 Shimbu vapwile nakwivwilila kuvyumevi, ahanjikile nawa chifwanyisa chikwavo, mwomwo apwile kwakamwihi naYelusalema, kaha vapwile nakushinganyeka ngwavo Wangana waKalunga nausoloka hahaze vene.+
12 Shikaho ambile ngwenyi: “Mutu umwe wamulemu ayile kulifuchi lyapwile kwakusuku+ mangana akatambule ngolo jawangana nakukinduluka cheka.
13 Asanyikile vandungo jenyi 10, avahanyine jimina* 10 nakuvalweza ngwenyi, ‘Sekasanenunga palanga nomu nangukeza.’+
14 Oloze vaka-lifuchi lyenyi vamuhungile, kaha vatumine lizavu lyavaluwa vamukave vakambe ngwavo, ‘Etu katwasakile ou mutu apwenga mwangana wetuko.’
15 “Jino omu akindulukile, oku hanatambula lyehi ngolo jawangana,* ambile ngwenyi vamusanyikile vandungo vaze ahanyine jimbongo* mangana atachikize jingahi vanawanyinaho hakusekasana chavo.+
16 Jino watete ejile, kaha ambile ngwenyi, ‘Ove mwata, mina yove yinaseme jimina jikwavo 10.’+
17 Ngocho ambile kuli ikiye ngwenyi, ‘Wazachila, ove ndungo wamwaza! Hakuwana nge unalisolola kupwa uwakushishika hachuma chachindende chikuma, pwako nawata hajinganda 10.’+
18 Jino wamuchivali nawa ejile nakwamba ngwenyi, ‘Ove mwata, mina yove yinaseme jimina jikwavo jitanu.’+
19 Ikiye ambile kuli ou nawa ngwenyi, ‘Nayove nawa pwako nawata hajinganda jitanu.’
20 Oloze mukwavo nawa ejile nakwamba ngwenyi, ‘Ove mwata, waha mina yove, ngwayikashililile halihina nakuyisweka.
21 Ami ngunapunga nakukwivwa woma, mwomwo umutu wamukalu, weji kutambulanga ovyo wazenekele kutulika, kaha weji kwahanga ovyo wazenekele kukuva.’+
22 Kaha ambile kuli ikiye ngwenyi, ‘Ove ndungo wakuhuka, hamazu amukanwa kove hakiko vene nangukusopesela. Kumana watachikijile ngwove ngwapwa ngumutu wamukalu, ngwove ngweji kutambulanga ovyo ngwazenekele kutulika, nakwahanga ovyo ngwazenekele kukuva?+
23 Nyi ika wahonenene kutwala lumbongo lwami* kunyambaulu? Omu nguneza kachi ngunalutambula nasaku yalwo hamwe.’
24 “Ngocho ambile jino kuli vaze vemanyine kuze ngwenyi, ‘Mutambulenu oyo mina, yihanenu kuli ou ali najimina 10.’+
25 Oloze vambile kuli ikiye ngwavo, ‘Ove mwata, ali lyehi najimina 10!’—
26 ‘Nangwamba kuli enu ngwami, weshowo ali navyo, navamuwezelako vikwavo, oloze uze keshi navyoko, nachize ali nacho navamutambulacho.+
27 Kaha nawa, vaka-kole jami vaze kavasakile ngwavo ngupwenga ngumwangana wavo, vanehenu kuno muvajihile kumeso ami.’”
28 Omu Yesu amanyishile kuhanjika vyumevi, atetekeleleko nakuya kuYelusalema.
29 Kahomu ahetele kwakamwihi naMbetefwaje naMbetane hapili vavuluka ngwavo Pili yaMilive,+ atumine tumbaji vavali+
30 nakuvalweza ngwenyi: “Yenu mwimbo lize muli nakumona, kahomu namwingila namuwana livuvu lyachimbulu uze kanda vachinyinengaho lyehi kuli mutu vanamukase. Mukasununenu nakumuneha kuno.
31 Oloze nge mutu mwamihula ngwenyi: ‘Mwomwo ika muli nakumukasunwina?’ Enu ambenu ngwenu: ‘Mwata ali nakumusaka.’”
32 Ngocho vaze atumine vayile, kaha vamuwanyine nge muze avalwezele.+
33 Oloze omu vapwile nakukasununa uze livuvu lyachimbulu, venyayo vavehwile ngwavo: “Ika muli nakukasunwina ou livuvu lyachimbulu?”
34 Kaha vakumbulwile ngwavo: “Mwata ali nakumusaka.”
35 Ngocho vamunehele kuli Yesu, vahakile uvwalo wavo wahelu hali uze livuvu lyachimbulu, kaha vamunyinyishileho Yesu.+
36 Omu apwile nakuya, vatu vapwilenga nakwala uvwalo wavo wahelu mujila.+
37 Kahomu ahetele kwakamwihi najila yakumushikumuko waPili yaMilive, lizavu lyosena lyatumbaji twenyi vawahililile nakuputuka kumwalisa Kalunga namazu akukanguka hamilimo yangolo yosena yize vamwene,
38 ngwavo: “Vakisula Mwangana ou mweza mulijina lyaYehova.* Mwilu mupwenga kuunda, upahu nawa upwenga kuli ou atwama mwilu.”+
39 Oloze vaFwaliseu vamwe haze haliyongomena vambile kuli ikiye ngwavo: “Ove Muka-kunangula, vatenukile tumbaji twove.”+
40 Oloze akumbulwile ngwenyi: “Nangumilweza ngwami, ava nge navahola, kaha malolwa nawatambakana.”
41 Kahomu ahetele kwakamwihi, amwene yize nganda, kaha ayilililile+
42 ngwenyi: “Watelanga kutachikiza vyuma vyakuneha kuunda halikumbi lyalelo, oloze jino vanavisweke kuchina nauvimona nameso ove.+
43 Mwomwo kuli ove nakukeza makumbi aze vaka-kole jove navakatunga kembwe yavitondo vyakusongoloka jingulwishi ndo. Navakakuhaka muchingombela, nakukujingilika* kumitamba yosena.+
44 Navakakulindumwina hamavu+ navana vove vaze vali muli ove, kaha kaveshi kukaseza lilolwa limwe helu lyalikwavo muli oveko,+ mwomwo kawatachikizanga lwola lwakwiza nakukukekesako.”
45 Jino engilile mutembele nakuputuka kuhangamo vaze vapwile nakulanjisa+
46 nakwamba kuli vakiko ngwenyi: “Vasoneka ngwavo: ‘Zuvo yami nayikapwanga zuvo yakulombela,’+ oloze enu munayitenge kupwa nge wina wakuswama vihwanga.”+
47 Yesu anangwilenga vatu mutembele hakumbi hakumbi. Oloze vapilishitu vavakulwane, navaka-kusoneka, navatwamina javatu, vasakilenga ngwavo vamujihe.+
48 Oloze kavawanyine jila yakulingilamo ngochoko, mwomwo vatu vosena valinjilililenga lika kuli ikiye nakumwivwilila.+
Kwinyikila Chamwishi
^ Chipwe “kumusuwa.”
^ Chipwe “nakumutambula chuma hakumuvangijikila.”
^ Mina yavaHelase yimwe yapwile jingalamu 340, kaha yesekele hamwe najindalakima 100. Tala Chihande B14.
^ Chipwe “hanatambula lyehi wangana.”
^ Hela., “ahanyine palata.”
^ Hela., “kutwala palata yami.”
^ Tala Chihande A5.
^ Chipwe “nakukuyanjisa.”
