Luka 20:1-47
20 Likumbi limwe omu apwile nakunangula vatu mutembele nakuvilika mujimbu wamwaza, vapilishitu vavakulwane navaka-kusoneka, navakulwane vejile,
2 kaha vambile kuli ikiye ngwavo: “Tulweze, ngolo jakulinga vyuma kanevi unajiwane kulihi? Iya akuhana ngolo kaneji?”+
3 Ikiye avakumbulwile ngwenyi: “Nayami nawa nangumihula chihula chimwe, kaha ngulwezenu:
4 Uno lumbapachiso lwaYowano lwafumine mwilu tahi, nyi lwafumine kuli vatu?”
5 Ngocho valihanjikishile mwavomwavo ngwavo: “Kachi nge natwamba ngwetu, ‘Lwafumine mwilu,’ kaha mwamba ngwenyi, ‘Nyi ikaze mwahonene kumwitavila?’
6 Oloze nge natwamba ngwetu, ‘Lwafumine kuli vatu,’ kaha vatu vosena navatwasa malolwa, mwomwo vafwelela ngwavo Yowano apwile kapolofweto.”+
7 Ngocho vamukumbulwile ngwavo kavatachikijile okwo lwafumineko.
8 Kaha Yesu ambile kuli vakiko ngwenyi: “Nayami nawa kangweshi kumilweza okwo ngunawane ngolo jakulinga vyuma kaneviko.”
9 Jino aputukile kulweza vatu chifwanyisa chino ngwenyi: “Mutu umwe atumbile wande wamivinyo+ nakuuhana vaka-kulima, kaha ayile kulifuchi lyeka. Akashimbwileko chikuma.+
10 Omu yahetele ngonde yakwaha mihako, atumine ndungo yenyi kuli vaze vaka-kulima mangana vakamuhaneko mihako yimwe yamuwande. Oloze vaze vaka-kulima vamuvetele nakumuhilwisa mavokovoko.+
11 Kaha atumine cheka ndungo yenyi mukwavo. Naikiye vamuvetele, vamusawile nakumuhilwisa mavokovoko.
12 Kaha atumine cheka wamuchitatu, naikiye nawa vamulemekele nakumumbila kuweluka.
13 Hakumona ngocho, uze mwenyawande ambile ngwenyi, ‘Nangulinga ngachilihi? Nangutuma mwanami, ou ngwazanga.+ Ounyi pamo navakamuvumbika.’
14 Omu vaka-kulima vamumwene, valihanjikishile mwavomwavo ngwavo, ‘Ou ikiye swana. Tumujihenu, mangana uswana upwenga wetu.’
15 Ngocho vamumbilile kusali yauze wande wamivinyo, kaha vamujihile.+ Jino uze mwenyawande wamivinyo mwakavalinga muka?
16 Mwakeza nakujiha ava vaka-kulima nakuhana uze wande wamivinyo kuli veka.”
Vakiko hakwivwa ngocho, vambile ngwavo: “Chijilocho!”
17 Oloze ikiye avatalile nakwamba ngwenyi: “Nyi ano mazu vasoneka alumbunukila mulihi, akwamba ngwavo: ‘Lilolwa lize vakanyine vaka-kutunga linapu jino lilolwa lyalinene lyamumbango’?*+
18 Weshowo mwakaholokela halilolwa lize mwakasanyuka sanyusanyu.+ Kaha weshowo nalikaholokela, nalikamuchika.”
19 Jino vaka-kusoneka navapilishitu vavakulwane vasakile jino ngwavo vamukwate haola vene yize, mwomwo vatachikijile ngwavo chifwanyisa kanechi chatalishile kuli vakiko, oloze vevwile woma vatu.+
20 Kahomu vamwene vyuma alingilenga, vatumine vatu vaze vakumwine mukusweka vakalyonge kupwa nge vaka-kwoloka, mangana vamuwanyine katenga hamazu enyi,+ nakumuhana jino kufulumende namumavoko anguvulu.
21 Kaha vamwihwile ngwavo: “Ove Muka-kunangula, tunatachikiza ngwetu ove weji kuhanjikanga nakunangula mwakwoloka, kaha kaweshi kutala mutu kumesoko, oloze weji kunangulanga jila yaKalunga kweseka nomu mwaya muchano:
22 Uno vatwitavisa* kuhana Kesale mitelo tahi, nyi chiku?”
23 Oloze ikiye atachikijile kulunguluka chavo, kaha ambile kuli vakiko ngwenyi:
24 “Ngulwekesenu ndenali.* Uno ou mutwe namazu vasonekaho vyeya?” Vakiko vambile ngwavo: “VyaKesale.”
25 Kaha ambile kuli vakiko ngwenyi: “Hanenunga vyuma vyaKesale kuli Kesale,+ oloze vyuma vyaKalunga kuli Kalunga.”+
26 Ngocho kavahashile kumuwanyina katenga hamazu awa kumeso avatuko. Valikomokelele hamazu avakumbulwile, kaha vaholele kulu.
27 Oloze vaSatuse vamwe, vaze veji kwambanga ngwavo kusanguka kachatwamakoko,+ vejile nakumwihula+
28 ngwavo: “Ove Muka-kunangula, Mose atusonekelele ngwenyi: ‘Kachi nge mutu mwafwa nakuseza pwevo chakuzeneka mwana, kaha ndumbwenyi atela kumbata uze pwevo nakusemena uze ndumbwenyi vana.’+
29 Jino kwapwile malunga 7 vamujimo limwe. Watete ambachile pwevo, kaha afwile chakuzeneka vana.
30 Ngocho wamuchivali ambachile uze pwevo,
31 nou wamuchitatu nawa amumbachile. Omu mukiko chapwile kuli vosena vaze 7. Vosena vafwile, kaha kavasezele vanako.
32 Kukuminyinako, uze pwevo nawa afwile.
33 Ngocho hakusanguka, mwakapwa pwevo lyaumwe ulihi? Mwomwo vosena vaze 7 vamumbachile.”
34 Yesu ambile kuli vakiko ngwenyi: “Vana vakatwamino kamyaka yino* veji kumbata nakusomboka,
35 oloze vaze vatamo kukaswana katwamino kamyaka nayikezaho, vaze vatamo kukasanguka kuvafu, kaveshi kukambata chipwe kukasombokako.+
36 Chipwe kufwa kaveshi kukafwa chekako, mwomwo navakapwanga nge vangelo, kaha navakapwa nawa vana vaKalunga hakupwa vana vakusanguka kuvafu.
37 Oloze kutalisa kuchihande chavafu vaze navakasangula, naMose ahanjikileho mumujimbu wachiputa omu avulukile Yehova* ngwenyi, ‘Ikiye Kalunga kaApalahama, Kalunga kaIsaka, Kalunga kaYakova.’+
38 Ikiye kapwa Kalunga kavafuko, oloze wavava vavatonyi, mwomwo kuli ikiye vosena vavatonyi.”+
39 Kaha vaka-kusoneka vamwe vakumbulwile ngwavo: “Ove Muka-kunangula, unahanjika kanawa.”
40 Mwomwo kavahashile cheka kuhamuka nakumwihula chihula numba chimweko.
41 Ngocho ambile kuli vakiko ngwenyi: “Mwomwo ika veji kwambilanga ngwavo Kulishitu apwa mwanaNdavichi?+
42 Oloze ivene Ndavichi ahanjika mumukanda waJisamu ngwenyi: ‘Yehova* ambile kuli Mwata wami ngwenyi: “Twamanga kulivoko lyami lyachilyo
43 palanga nomu nangukahaka vaka-kole jove kupwa chitwamo chakulyata mahinji ove.”’+
44 Ndavichi amuvuluka ngwenyi, Mwata, kaha napu ngachilihi mwanenyi?”
45 Jino Yesu ambile kuli tumbaji oku vatu vosena vali nakwivwilila ngwenyi:
46 “Zangamenu navaka-kusoneka vaze vasaka kutambwojoka oku vanavwale vikuto nakusaka kuvamenejeka kuvilanjilo, nakusaka vitwamo vyakulutwe* mujisunangonga navihela vyaulemu chikuma kukulya chachingoloshi.+
47 Veji kulyanga vikumba vyavatuliwe vamapwevo, kaha veji kusuhwisanga kulomba chavo mangana vavamone kuvatu. Kusopesa chavo navakavasopesa nachikapwa chachinene.”
Kwinyikila Chamwishi
^ Hela., “linapu jino mutwe wamumbango yazuvo.”
^ Chipwe “Uno chakwoloka.”
^ Tala Chihande B14.
^ Tala Mukana waMazu.
^ Tala Chihande A5.
^ Tala Chihande A5.
^ Chipwe “vyamwaza.”
