Luka 23:1-56
23 Ngocho lizavu lyosena lyakatukile nakumutwala kuli Pilatu.+
2 Jino vaputukile kumuhana mulonga+ ngwavo: “Ou mutu twamuwananga ali nakulumbula lifuchi lyetu nakukanyisa vatu kutela mitelo kuli Kesale,+ kaha nawa ngwenyi ikiye Kulishitu, mwangana.”+
3 Jino Pilatu amwihwile ngwenyi: “Ove yove Mwangana wavaYuleya tahi?” Ikiye amukumbulwile ngwenyi: “Ove yove unambemo.”
4 Jino Pilatu ambile kuli vapilishitu vavakulwane nakumayongomena ngwenyi: “Ami ou mutu kangwamuwanyine namulongako.”+
5 Oloze vakiko vaputukile kutokomenyaho ngwavo: “Eji kusowangizanga vatu hakuvanangula muYuleya mwosena, kufuma kuNgalileya mbwe nakuno.”
6 Hakwivwa ngocho, Pilatu ehwile atachikize numba nge mutu kanou muka-Ngalileya.
7 Kahomu ejivile ngwenyi apwile wakungalila yaHelote,+ amutumine kuli Helote, uze apwile naikiye muYelusalema hamakumbi aze.
8 Jino omu Helote amwene Yesu, awahililile chikuma. Hamakumbi amavulu, asakilenga kachi amone Yesu mwomwo evwilenga vyuma vyavivulu hali ikiye,+ ngocho afwelelele ngwenyi mwamona chinjikizo chimwe chakufuma kuli Yesu.
9 Kaha aputukile kumwihula vihula vyavivulu, oloze ikiye kamukumbulwileko.+
10 Chipwe ngocho vapilishitu vavakulwane navaka-kusoneka vatwalileho lika nakukatwojwoka nakumuhana milonga oku vanapihilila.
11 Jino Helote namaswalale jenyi vamulumbilishile,+ kaha Helote amuhendele+ hakumuvwika uvwalo uvyakuma nakumukindulwisa cheka kuli Pilatu.
12 Kaha Helote naPilatu valikwachile jino usepa halikumbi vene lize, mwomwo vapwilenga nakole mukachi kavo kufuma vene kunyima.
13 Pilatu jino asanyikile vapilishitu vavakulwane navaka-kuyula navatu veka,
14 kaha ambile kuli vakiko ngwenyi: “Mwangunehelanga ou mutu ngwenu ali nakusowangiza vatu valikange. Jino ivwenu! Ngwamwihwojolanga kumeso enu, oloze kangwamuwananga namilonga muli nakumuhanako.+
15 NaHelote nawa kayiwanyineko, mwomwo namukindulwisa cheka kuli etu, ngocho kavulumwine mulonga numba umwe wakutela kufwilako.
16 Shikaho nangumuzangamisa+ nakumukasununa.”
17 *——
18 Oloze lizavu lyosena vazungumukile ngwavo: “Ou mujihe, oloze tukasunwine Mbalapa!”+
19 (Mutu kana vamuhakile mukamenga hamulonga wakufumbukila fulumende munganda yize, nou wakujiha vatu.)
20 Pilatu ahanjikile navo cheka, mwomwo asakile kukasununa Yesu.+
21 Jino vaputukile kutambakana ngwavo: “Mupapalile hachitondo! Mupapalile hachitondo!”+
22 Kaha ahanjikile kamuchitatu kuli vakiko ngwenyi: “Mwomwo ika? Chuma muka chachipi nalingi ou mutu? Ami kangwamuwanyine namulonga atela kufwilako. Shikaho nangumuzangamisa nakumukasununa.”
23 Oloze vatu vaputukile kutokomenyaho namazu akukanguka ngwavo vamupapalile hachitondo, kaha mazu avo amuhonesele.+
24 Ngocho Pilatu avatwile chihande kweseka namuze vasakile vatu.
25 Akasunwine mutu vasakile, uze apwile mukamenga hamulonga wakufumbukila fulumende nou wakujiha vatu, oloze Yesu amwechele vamulinge kweseka namuze mwayile michima yavo.
26 Jino omu vapwile nakutwala Yesu, vakwachile Shimona, mutu umwe wakuKulene uze apwile nakufuminyina mundandanda yimwe, kaha vamutwikile chitondo chakuyanjishila* mangana achimbate nakumukavangiza Yesu.+
27 Kaha kwapwile vatu vavavulu vapwile nakumukava hamwe kaha namapwevo vaze vapwile nakulyonyinga nakulila jimbimbi.
28 Yesu anyingulukile, atalile vaze mapwevo nakwamba ngwenyi: “Enu vana vaYelusalema vamapwevo, kanda namungulila amiko. Lilililenu enu vavene navana venu,+
29 mwomwo makumbi ali nakwiza omu vatu navakamba ngwavo, ‘Vawahilila vomba, namajimo aze kawasemene vanako, namavele aze kawamwishile vanako!’+
30 Jino navakaputuka kwamba kujipili jajinene ngwavo, ‘Tushiukilenu!’ Nakwamba kujipili jajindende nawa ngwavo, ‘Tufwikenu!’+
31 Kachi nge navalinga vyumevi shimbu mutondo uchili ututa, kaha nachikapwa ngachilihi nge mutondo unomu lyehi?”
32 Jino kwapwile vatu veka vavali vaze vapwile vihwanga. Navakiko nawa vapwile nakuvatwala vakavajihe hamwe naikiye.+
33 Kahomu vahetele kuchihela vavuluka ngwavo Chikola,+ kwakuze vene vamupapalilile hamwe navaze vihwanga havitondo, umwe kulivoko lyenyi lyachilyo kaha mukwavo kuchimoswe.+
34 Oloze Yesu apwile nakwamba ngwenyi: “Ove Tata, vakonekele, mwomwo kavatachikijile chuma vali nakulingako.” Jino vazachishile tutachikijilo hakusaka kulipangila uvwalo wenyi.+
35 Kaha vatu vemanyine nakutala. Oloze vaka-kuyula vapwile nakumbwatula nakwamba ngwavo: “Alwilile veka. Mwechenu alilwile ivene kachi nge ikiye Kulishitu yaKalunga, Ou Vasakula.”+
36 Namaswalale nawa vamuhendele, vapandamineko nakumuhana vinyo vingangamina+
37 nakwamba ngwavo: “Kachi nge ove yove Mwangana wavaYuleya, lilwile ove ivene.”
38 Kaha helu lyamutwe wenyi hapwile nawa mazu akusoneka ngwavo: “Ou Ikiye Mwangana WavaYuleya.”+
39 Oloze umwe wavaze vihwanga vapapalilile, aputukile kusaula Yesu+ ngwenyi: “Ove ngwetu yove Kulishitu? Lilwile ove ivene utulwile nayetu nawa.”
40 Oloze mukwavo amukumbulwile nakumutenukila ngwenyi: “Kumana ove kaweshi nakwivwa Kalunga woma hakumona omu vanakuzangamishila hamwe naikiyeko nyi?
41 Etu chinatemo kutuzangamisa, mwomwo tuli nakutambula evi vyatutela havyuma tunalingi, oloze ou mutu kalingile chuma chakuhengako.”
42 Kaha ambile ngwenyi: “Ove Yesu, kangwanuke omu naukengila muWangana wove.”+
43 Yesu ambile kuli ikiye ngwenyi: “Chamuchano vene nangukulweza lelo lino ngwami, naukapwa nayami muPalachise.”+
44 Jino yapwile ola yakusokesa 6,* oloze milima yafwikile lifuchi lize lyosena palanga nakuola yakusokesa 9,*+
45 mwomwo musana wechele kumunyika. Kaha lihina lyamuchihela chajila+ lyapulikile hakachi+ mbwe nakwishi.
46 Kaha Yesu atambakanyine nalizu lyakukanguka ngwenyi: “Ove Tata, nanguseza shipilitu yami+ mumavoko ove.” Omu akumishile kuhanjika ngocho, afwile.*+
47 Oloze kapitau kamaswalale hakumona vyuma vize vyasolokele, aputukile kutohwesa Kalunga ngwenyi: “Chikupu vene ou mutu apwanga wakwoloka.”+
48 Jino mayongomena aze akungulukilile kuze hakumona vyuma vize vyasolokele, vakindulukile kumembo avo oku vali nakuliveta hajitulo javo.
49 Vosena vaze valijivile nenyi, vemanyine hahasuku. Namapwevo nawa vaze vamukavile hakufuma kuNgalileya vapwile kuze nakutala vyuma vyosenevi.+
50 Kaha kwapwile lunga umwe wamwaza, wakwoloka+ uze apwile chilolo wamuZango yaKusopela yavaYuleya.* Lijina lyenyi apwile Yosefwe.
51 (Ou lunga kakundwijile vakwavo vilolo hapunga yavo nahavyuma valingileko.) Apwile wakuAlimateya, nganda yavaYuleya, kaha apwilenga nakuvandamina Wangana waKalunga.
52 Jino ou lunga ayile kuli Pilatu nakulomba mujimba waYesu.
53 Kaha aufumishile hachitondo+ nakuuvungila halihina lyamwaza, kaha ausavalikile muchimbumbe* chakutota mulilolwa,+ muze kanda vasavalikengamo lyehi mufu.
54 Jino eli lyapwile Likumbi lyaKulongesa Vyuma,+ kaha likumbi lyaSambata+ lyapwile hakamwihi.
55 Oloze mapwevo vaze vejile nenyi hakufuma kuNgalileya, vakavangijile munyima, kaha vamwene chize chimbumbe,* nomu vasavalikile mujimba wenyi,+
56 kaha vakindulukile vakawahise vyuma vyalivumba lyamwaza namaji alivumba. Oloze halikumbi lyaSambata+ vanokele kweseka nalushimbi.
Kwinyikila Chamwishi
^ Tala Chihande A3.
^ Tala Mukana waMazu.
^ Kafwe 12:00 yamusana.
^ Kafwe 15:00.
^ Chipwe “atulishile mwono wenyi.”
^ Chipwe “wamuSunendeline.”
^ Chipwe “muchimbumbe chakwanukila.”
^ Chipwe “chimbumbe chakwanukila.”
