Luka 24:1-53
24 Oloze halikumbi lyatete muchalumingo, vejile kuchimbumbe* oku vanambate vyuma vyalivumba lyamwaza vize vawahishile.+
2 Kaha vawanyine lize lilolwa vanalishindumunako lyehi kuze kuchimbumbe.*+
3 Omu vengililemo, kavawanyinemo mujimba waMwata Yesuko.+
4 Shimbu valikomokelele hachuma kana, vamwene malunga vavali vanavwale uvwalo uvyakuma vanemana kuli vakiko.
5 Vaze mapwevo valizuzukilile nawoma, kaha vatalile hamavu, ngocho vaze malunga vambile kuli vakiko ngwavo: “Ou wakuyoya namumutondela ngachilihi kuvafu?+
6 Kuno wauchiko, vanamusangula lyehi. Anukenu muze ahanjikile kuli enu shimbu apwile kuNgalileya
7 ngwenyi, Mwanamutu vatela kukamuhana mumavoko avaka-shili nakukamusukika hachitondo, oloze halikumbi lyamuchitatu mwakasanguka.”+
8 Ngocho vanukile mazu enyi,+
9 kaha vafumine kuze kuchimbumbe* nakuya nakwambulula vyuma vyosenevi kuli vaze 11, nakuli tumbaji vakwavo vosena.+
10 Mapwevo kana vapwile Maliya Mangatala, naYowana, naMaliya naye yaYakova. Namapwevo veka nawa vaze vapwile navo hamwe valwezele vaposetolo vyumevi.
11 Oloze vakiko vamwene vyuma vavalwezele kupwa vyamokomoko, kaha kavetavilile vaze mapwevoko.
12 Ngocho Petulu akatukile, alahilile kuchimbumbe.* Omu anonokelemo amwene kaha mahina aze vamujingile. Shikaho afumineko nakuya oku nalikomokela havyuma vize vyasolokele.
13 Kaha halikumbi vene lize, tumbaji vavali vapwile nakuya kulimbo vavuluka ngwavo, Emau, lize lyapwila kafwe jimayilo 7* kufuma kuYelusalema.
14 Vapwile nakushimutwila havyuma vyosena vize vyasolokele.
15 Jino omu vapwile nakushimutwila nakulihwojola havyumevi, Yesu apandamine kuli vakiko nakuputuka kutambuka navo,
16 oloze vakiko kavamutachikijileko.+
17 Jino ambile kuli vakiko ngwenyi: “Uno vyuma muka evi muli nakulihwojola omu muli nakutambuka mujila?” Kaha vemanyine oku vanahombo.
18 Jino Keleyopa, umwe hali vaze vavali amukumbulwile ngwenyi: “Uno unapu ungeji kaha nawa uli nakutwama uka wove muYelusalema numba uzeneke kutachikiza vyuma vinasoloka munganda kana hamakumbi anoko tahi?”*
19 Kaha avahulishile ngwenyi: “Vyuma mukovyo?” Vakiko vamukumbulwile ngwavo: “VyaYesu wakuNazaleta+ uze apwile kapolofweto wangolo kumeso aKalunga nakumeso avatu vosena+ muvyuma vize alingilenga navize ahanjikilenga.
20 Vapilishitu jetu vavakulwane navaka-kuyula vamutwalanga mangana vakamuhane mulonga wakumujiha,+ kaha vamupapalilanga hachitondo.
21 Oloze etu twafwelelanga ngwetu, ou mutu ikiye mwakasokola vaIsalele.+ Kaha nawa lelo linapu likumbi lyamuchitatu kufuma haze vyasolokanga vyumevi.
22 Mapwevo vamwe nawa vahali etu vatukomwesanga, mwomwo vayanga nachimenemene kuchimbumbe,*+
23 oloze kavawananga mujimba wenyiko. Omu vakindulukanga vambanga ngwavo vamonanga nawa chuma chakukomwesa. Vamonanga vangelo, vaze vavalwezanga ngwavo Yesu wamutonyi.
24 Jino vakwetu vamwe nawa vayanga kuchimbumbe,*+ kaha vawananga nge muze vambanga vaze mapwevo, oloze ikiye kavamumonangako.”
25 Ngocho Yesu ambile kuli vakiko ngwenyi: “Enunyi muvatu vakuhona mangana, vamichima yakushipwokela kwitavila vyuma vyosena vize vahanjikile vapolofweto.
26 Uno kachamutelanga Kulishitu kuhita muvihuli evi+ nakwingila muupahu wenyiko nyi?”+
27 Kaha avalumbunwinyine vyuma vyosena vize vahanjika hali ikiye muVisoneka vyosena, kuputukila vene kuMazu aMose naMazu aVapolofweto vosena.+
28 Kutwala muze, vahetele kwakamwihi nalimbo lize vapwile nakuya, jino ikiye alingile nge himwasaka kuhambakana.
29 Oloze vamushinjilile ngwavo: “Twama nayetu, mwomwo likumbi hinaliya nakulauka, kaha kunatoko lyehi.” Hakwivwa ngocho, ayile nakutwama navo.
30 Kahomu apwile nakulya navo vyakulya,* ambachile mbolo, ayikiswile, ayipuzwile nakuputuka kuvahanayo.+
31 Ngocho hameso avo hataunukile, kaha vamutachikijile kanawa. Oloze ikiye alelanganyine.+
32 Kaha valihanjikishile mwavomwavo ngwavo: “Uno katwapwanga nakwivwa hyangu kumichima yetuko omu apwanga nakuhanjika kuli etu mujila, nomu apwanga nakutulumbunwina Visoneka nyi?”
33 Kaha haola vene yize vakatukile nakukinduluka kuYelusalema. Vawanyine vaze 11 navaze vapwile navo vanakunguluka hamwe,
34 vali nakwamba ngwavo: “Chamuchano vene Mwata vanamusangula, kaha alisololanga kuli Shimona!”+
35 Jino navakiko vavahichililemo vyuma vize vyasolokanga mujila, nomu vamutachikizanga hakupuzula yize mbolo.+
36 Shimbu vapwile nakuhanjika vyumevi, Yesu ejile nakwimana mukachi kavo nakwamba kuli vakiko ngwenyi: “Kuunda chipwenga nayenu.”+
37 Oloze hakuwana nge vevwile woma nakulizuzukila, vapwile nakushinganyeka ngwavo vanamono shipilitu.
38 Ngocho Yesu ambile kuli vakiko ngwenyi: “Mwomwo ika muli nakwivwila woma, kaha muli nakukakasanyina ika mumichima yenu?
39 Talenu kumavoko ami nakuvilyachilo vyami mangana mutachikize ngwenu yami vene. Ngukwatenu mwivwenga, mwomwo shipilitu kayatwama nanyama navifuwa nge omu munangumono amiko.”
40 Kahomu ahanjikile ngocho, avalwekesele mavoko enyi navilyachilo vyenyi.
41 Oloze shimbu vapwile kanda vachitavile mwomwo yakuwahilila nakulikomokela, ambile kuli vakiko ngwenyi: “Muliko navyakulya vimwe hano tahi?”
42 Kaha vamuhanyine chihanda chaishi wakupepela,
43 ngocho achitambwile nakuchilila hameso avo.
44 Jino ambile kuli vakiko ngwenyi: “Awa akiko mazu ami ngwahanjikile kuli enu shimbu ngwapwile nayenu hamwe+ ngwami, vyuma vyosena vasoneka muJishimbi jaMose namuMazu aVapolofweto namuJisamu vyakutalisa kuli ami vyatela kutesamo.”+
45 Jino asokolwele vishinganyeka vyavo vamone kanawa mwalumbunukilile Visoneka,+
46 nakwamba kuli vakiko ngwenyi, “Omu mukiko vasoneka ngwavo: Kulishitu mwakahita muvihuli nakukasanguka cheka kuvafu halikumbi lyamuchitatu,+
47 kaha mulijina lyenyi mukiko navakambulwila vyakupihilila nakwalumuka chakukonekela jishili+ muli vaka-mafuchi osena,+ kuputukila vene kuYelusalema.+
48 Enu namukapwa muvinjiho havyuma kanevi.+
49 Kaha ivwenu, ami nangumitumina chuma chize ashikile Tata. Shikaho enu twamenunga muno munganda palanga nomu namukatambula ngolo jakufuma mwilu.”+
50 Jino avambachile nakuya navo mbwe nakuMbetane, kaha olwele mavoko enyi nakuvakisula.
51 Kahomu apwile nakuvakisula, ahandunukile kuli vakiko, azezukile nakuya mwilu.+
52 Ngocho valifukwile kuli ikiye, kaha vakindulukile kuYelusalema nakuwahilila chikuma.+
53 Kaha vapwilenga shimbu yosena mutembele nakwalisa Kalunga.+
Kwinyikila Chamwishi
^ Chipwe “kuchimbumbe chakwanukila.”
^ Chipwe “kuchimbumbe chakwanukila.”
^ Chipwe “kuchimbumbe chakwanukila.”
^ Chipwe “kuchimbumbe chakwanukila.”
^ Kafwe jikilomita 11. Hela., “mashitandeya 60.” Shitandeya yimwe yapwile jimita 185. Tala Chihande B14.
^ Chipwe pamo, “Yove kaha ngeji muYelusalema nazeneka kutachikiza nyi?”
^ Chipwe “kuchimbumbe chakwanukila.”
^ Chipwe “kuchimbumbe chakwanukila.”
^ Chipwe “Kahomu asendavalile navo kumesa.”
