Luka 4:1-44
4 Jino omu Yesu azalile nashipilitu yajila, afumine kuYotau, kaha shipilitu yamutwalile mupambo+
2 muze apwile makumbi 40 nakumweseka kuli Liyavolo.+ Kalilenga chuma nachimweko hamakumbi aze, ngocho omu akumine aze makumbi, evwile zala.
3 Kaha Liyavolo ambile kuli ikiye ngwenyi: “Kachi nge umwanaKalunga, amba lilolwa eli lyalumuke kupwa mbolo.”
4 Oloze Yesu amukumbulwile ngwenyi: “Vasoneka ngwavo, ‘Mutu keshi kuyoyela hambolo kahako.’”+
5 Ngocho Liyavolo amukandwishile hapili, jino mukapyapya kakandende kaha amulwekesele mawangana osena ahamavu.+
6 Jino Liyavolo ambile kuli ikiye ngwenyi: “Nangukuhana ngolo jakuyula mawangana osena awa naupahu wawo, mwomwo vanguhanajo ami,+ kaha ngweji kujihananga kuli weshowo nangusaka.
7 Shikaho nge ove naulifukula kuli ami, kaha ngolo kana najipwa jove.”
8 Yesu amukumbulwile ngwenyi: “Vasoneka ngwavo, ‘Lemesanga Yehova* Kalunga kove, ikiye kaha watela kuzachilanga mulimo wajila.’”+
9 Jino amutwalile nawa muYelusalema, amwimikile helu* lyatembele, kaha ambile kuli ikiye ngwenyi: “Kachi nge umwanaKalunga, limbile hamavu kufuma hano,+
10 mwomwo vasoneka ngwavo, ‘Mwakahana vangelo jenyi lushimbi kutalisa kuli ove mangana vakakukinge,’
11 kaha ‘Navakakuzundula namavoko avo mangana lihinji lyove likazeneke kuhukana kulilolwa.’”+
12 Yesu amukumbulwile ngwenyi: “Vamba ngwavo, ‘Kanda naukeseka Yehova* Kalunga koveko.’”+
13 Ngocho omu Liyavolo akumishile kumweseka vyeseko vyosena, amusezele nakuvandamina lwola lweka lwamwaza.+
14 Jino Yesu azalile nangolo jashipilitu nakukinduluka kuNgalileya.+ Kaha mujimbu wavyuma vyamwaza alingilenga watanjile mungalila yosena yize.
15 Aputukile cheka kunangula mujisunangonga javo, kaha vatu vosena vamuvumbikilenga.
16 Kaha ayile kuNazaleta+ kuze vamulelelele. Jino kweseka namuze alingilenga halikumbi lyaSambata, engilile musunangonga,+ kaha emanyine mangana atange.
17 Ngocho vamuhanyine mukanda wakuvunga wakapolofweto Isaya, atanduwile uze mukanda wakuvunga, kaha awanyine haze vasoneka ngwavo:
18 “Shipilitu yaYehova* yili hali ami mwomwo anguwavishile mangana nguvilike mujimbu wamwaza kuli vaka-kuhutwa. Angutumine nguvilike kuli vafunge mujimbu wakuvasokola, nakutonesa tupuputa, nakusokola vaze vanahombo,+
19 ngwambulule mwaka waYehova* wakwivwila vatu uselewa.”+
20 Omu akumishile, ajingile uze mukanda wakuvunga, aukindulwishile kuli muka-kuzata musunangonga, kaha atwamine. Ngocho vatu vosena vaze vapwile musunangonga vamushishikile.
21 Jino aputukile kwamba kuli vakiko ngwenyi: “Lelo echi chisoneka munevu ngana chinatesamo.”+
22 Vatu vosena vaputukile kuhanjika vyuma vyamwaza hali ikiye, nakulikomokela hamazu amwaza apwile nakulovoka mukanwa kenyi,+ kaha vapwile nakwamba ngwavo: “Ou kumana keshi mwanaYosefweko nyi?”+
23 Hakwivwa ngocho, ambile kuli vakiko ngwenyi: “Chikupu vene namungutela chishimo chino ngwenu, ‘Ove chimbuke, lyuke ove ivene. Vyuma tunevu vize vinasoloka kuKapelenau, vizate nakuno kungalila yakwimbo lyove nawa.’”+
24 Ngocho ambile ngwenyi: “Chamuchano vene nangumilweza ngwami, kakweshi kapolofweto navetavila mungalila yakwimbo lyenyiko.+
25 Nangumilweza mwamuchano ngwami: MuIsalele mwapwile vatuliwe vavavulu hamakumbi aElija halwola luze kwahonene kunoka vula myaka yitatu natukweji 6, kaha mulifuchi lize lyosena mwapwile zala yakalombolombo yayinene.+
26 Chipwe ngocho, Elija kavamutumine kuya kuli vaze mapwevoko, shina kuli pwevo watuliwe, wakunganda yaZalefwate, mulifuchi lyaShitone.+
27 Kaha nawa, muIsalele mwapwile vaka-mbumba vavavulu hamakumbi akapolofweto Elisha, oloze naumwe wauchi vatomesele,* shina uze Namane kaSulya kaha.”+
28 Jino vosena vaze vevwile vyuma kanevi musunangonga, vakwachile matoto,+
29 vakatukile, vamulowele mukapachapacha kuweluka wanganda nakumutwala kuze kwakumbolomoka kusongo yapili yize vatungilileho nganda yavo, mangana vakamwandumwine hamavu.
30 Oloze ikiye aselukile mukachi kavo, aliyililile kwenyi.+
31 Jino ashikumukile kuKapelenau, kunganda yamuNgalileya. Kaha apwile nakunangula vatu haSambata,+
32 ngocho valikomokelele mujila anangwililengamo,+ mwomwo apwile nakuhanjika nge mutu ukwechi ngolo.
33 Jino muze musunangonga mwapwile mutu uze apwile nashipilitu wamupi, kaha atambakanyine nalizu lyakukanguka+ ngwenyi:
34 “Ha! Ove Yesu wakuNazaleta,+ vyuma muka uli nakusaka kuli etu? Uno wezanga nakutunongesa tahi? Ngunakutachikiza kanawa, ove yove Ou Wajila waKalunga.”+
35 Oloze Yesu atenukilile uze shipilitu wamupi ngwenyi: “Hola kulu, lovoka muli ikiye.” Omu alingile uze ndemone nambili lyehi uze mutu hamavu mukachi kavo, alovokele muli ikiye chakuzeneka kumuvulumuna.
36 Hakumona chuma kana, vatu vosena valikomokelele nakuputuka kulihanjikisa mwavomwavo ngwavo: “Kuhanjika chamuyachi muka vene echi? Mwomwo ali nakwamba vashipilitu vavapi nalizu lyawata nangolo, kaha vali nakulovoka.”
37 Ngocho mujimbu wavyuma alingile watanjile kumitamba yosena yangalila yize.
38 Omu afumine musunangonga, akengilile muzuvo yaShimona. Jino nayewenu yaShimona apwile nakuviza musongo wachishika chachinene, kaha vamulembelelele Yesu mangana amukafwe.+
39 Ngocho apandamine kuli ikiye, ahanjikilile chize chishika, kaha chakumine. Hahaze vene akatukile nakuputuka kuvazachila.
40 Jino omu lyalingile likumbi hinaliya nakulauka, vosena vaze vapwile navatu vavijile misongo yeka nayeka vavanehele kuli ikiye. Ngocho apwile nakuvoka hakunangika mavoko enyi hali mutu himutu.+
41 Navandemone nawa vapwile nakulovoka muli vatu vavavulu nakuteta nakwamba ngwavo: “Ove uMwanaKalunga.”+ Avatenukilile, kaha ketavishile vandemone vahanjikeko+ mwomwo vamutachikijile ngwavo ikiye Kulishitu.+
42 Jino omu kwachele, Yesu alovokele nakuya kuchihela kwakuhona vatu.+ Oloze mayongomena aputukile kumutondatonda, kaha vamuwanyine kuze apwile. Vesekele kumuzezeka mangana ahone kuvaseza.
43 Oloze ambile kuli vakiko ngwenyi: “Ngwatela kwambulula mujimbu wamwaza waWangana waKalunga nakujinganda jeka nawa, mwomwo vikiko vene vangutuminyine.”+
44 Ngocho ayile nakwambulula mujisunangonga jamuYuleya.
Kwinyikila Chamwishi
^ Tala Chihande A5.
^ Chipwe “hachipato chahelu.”
^ Tala Chihande A5.
^ Tala Chihande A5.
^ Tala Chihande A5.
^ Chipwe “vokile.”
