Luka 6:1-49
-
Yesu ikiye “Mwata waSambata” (1-5)
-
Lunga wakusoseka livoko navamuka (6-11)
-
Vaposetolo 12 (12-16)
-
Yesu mwanangula vatu nakuvoka (17-19)
-
Kuwahilila nalamba (20-26)
-
Kuzanga vaka-kole (27-36)
-
Litwaminenu kusopesanga vakwenu (37-42)
-
Namuvatachikijila kumihako yavo (43-45)
-
Zuvo yakutunga kanawa; zuvo yakutungila hachihela chakuhona kukola (46-49)
6 Jino hasambata yimwe Yesu apwile nakuhita mumande atiliku, kaha tumbaji twenyi vapwile nakuhela tumitwe twatiliku+ nakutufwenya mumavoko avo+ nakulya.
2 VaFwaliseu vamwe hakumona chuma kana, vambile ngwavo: “Mwomwo ika muli nakulingila chuma chize kavetavisa kulinga haSambatako?”+
3 Oloze Yesu avakumbulwile ngwenyi: “Uno kanda mutangengaho lyehi muze alingile Ndavichi navatu vaze apwile navo omu vevwile zalako nyi?+
4 Engilile muzuvo yaKalunga nakutambula jize jimbolo jakutumbika kumeso aKalunga* nakulya, jimbolo jize kavetavisa mutu kulyako shina vapilishitu kaha. Ahanyine nawa jimwe kuli vaze apwile navo.”+
5 Jino ambile kuli vakiko ngwenyi: “Mwanamutu ikiye Mwata waSambata.”+
6 Hasambata yeka nawa,+ engilile musunangonga nakuputuka kunangula. Kaha awanyinemo lunga wakusoseka livoko lyachilyo.+
7 Vaka-kusoneka navaFwaliseu vapwile nakumutala vamone numba nge mwoka uze lunga haSambata mangana vawane jila yakumuhanyinamo mulonga.
8 Oloze ikiye ejivile vyuma vapwile nakushinganyeka,+ ngocho ambile kuli uze lunga wakusoseka livoko ngwenyi: “Katuka, imana hakachi.” Kaha akatukile, emanyine.
9 Jino Yesu ambile kuli vakiko ngwenyi: “Nangumihula enu vatu ngwami, Uno chimwe chilihi vetavisa kulinga haSambata, kulinga mwamwaza nyi kulinga mwamupi, kulwila mwono nyi kuunongesa?”+
10 Kahomu alingile hanavatale vosena, ambile kuli uze lunga ngwenyi: “Olola livoko lyove.” Uze lunga alingile vene ngocho, kaha livoko lyenyi lyalumukile cheka kupwa lyalambwe.
11 Oloze vakiko vapihililile chikuma, kaha vaputukile kulihanjikisa mwavomwavo vamone mwakulingila Yesu.
12 Jino likumbi limwe ayile kupili nakulomba,+ kaha alombele kuli Kalunga ufuku wosena.+
13 Omu kwachele, asanyikile tumbaji twenyi, kaha asakwileho 12 vaze alukile nawa ngwenyi vaposetolo.+
14 Vapwile ou Shimona uze alukile nawa ngwenyi, Petulu, nandumbwenyi Andelei, kaha naYakova, naYowano, naFwilipu,+ naMbalaTolomeu,
15 naMateu naTomase,+ naYakova mwanaAlefweu, naShimona uze vavulukilenga ngwavo, “uze watwima,”
16 naYuta mwanaYakova, naYuta Isakalyote, uze amusolwele kuli vaka-kole.
17 Jino ashikumukile navo hamwe nakuya nakwimana hachihela chakusalama. Kaha kuze kwapwile liyongomena lyalinene lyatumbaji twenyi, nalizavu lyalinene lyavatu veka vakuYuleya kwosena nakuYelusalema, nakuchikulo chakalungalwiji kuTule nakuShitone, vaze vejile nakumwivwilila nakusaka ngwavo avahindule kumisongo yavo.
18 Navaze nawa vapwile nakuyanjiwa navashipilitu vavapi vavokile.
19 Kaha lize liyongomena lyosena lyasakilenga ngwavo limutute, mwomwo ngolo japwilenga nakulovoka muli ikiye+ nakuhindula vosena.
20 Kaha atalile tumbaji twenyi nakuputuka kwamba ngwenyi:
“Mwawahilila enu vaka-kuhutwa, mwomwo Wangana waKalunga unapu wayenu.+
21 “Mwawahilila enu muli nakwivwa zala oholyapwa,+ mwomwo navakamikuchisa.
“Mwawahilila enu muli nakulila oholyapwa, mwomwo namukasehelela.+
22 “Mwawahilila enu, omu navamihunga kuli vatu,+ nakumihanga mukachi kavo,+ nakumisaula, nakupihisa majina enu* mwomwo yaMwanamutu.
23 Wahililenu halikumbi lize, lisambenu, mwomwo fweto yenu yinapu yayinene mwilu, mwomwo vyumevi vikiko vene vapwilenga nakulinga navakakuluka javo kuli vapolofweto.+
24 “Oloze lamba kuli enu vaka-luheto,+ mwomwo vyakumivendejeka navyo munavitambula lyehi vyosena.+
25 “Lamba kuli enu munekuta oholyapwa, mwomwo namukevwa zala.
“Lamba kuli enu muli nakusehelela oholyapwa, mwomwo namukalishona nakulila.+
26 “Lamba kuli enu, omu vatu vosena navahanjika vyuma vyamwaza hali enu,+ mwomwo omu mukiko navakakuluka javo valingile kuli vapolofweto vamakuli.
27 “Oloze aminyi nangwamba kuli enu muli nakwivwilila ngwami: Zangenunga lika vaka-kole jenu, nakulinga mwamwaza kuli vaze vamihunga,+
28 nakukisula vaze vali nakumyangula, nakulombelako vaze vali nakumisaula.+
29 Ou mwakuveta mbanda kulikili limwe, mwalumwine nalikwavo nawa, kahou mwakutambula uvwalo wove wahelu, kanda kumukanyisa kutambula nauvwalo wove wamukachiko.+
30 Weshowo mwakulomba muhane,+ kahou mwakutambula vikumba vyove, kanda ukamwihulavyo chekako.
31 “Kaha nawa, mweshomwo namusaka ngwenu vatu valinge kuli enu, nayenu nawa lingenu mwomumwe kuli vakiko.+
32 “Kachi nge namuzanganga kaha vaze vamizanga enu, kaha navamyalishila halihize? Mwomwo navaka-shili veji kuzanganga vaze vavazanga.+
33 Kachi nge namulinganga kaha mwamwaza kuli vaze veji kulinganga mwamwaza kuli enu, navamyalishila halihize? Mwomwo navaka-shili veji kulinganga mwomumwe.
34 Kaha nawa, kachi nge namulevanyisanga* vatu vaze munafwelela ngwenu navakakindulwisa cheka, kaha navamyalishila halihize?+ Mwomwo navaka-shili veji kulevanyisanga vakwavo vaka-shili mangana ngwavo vakatambule cheka nge muze vanahane.
35 Oloze zangenunga lika vaka-kole jenu, nakulinganga mwamwaza, nakulevanyisanga chakuzeneka kufwelela kutambula cheka,+ kaha fweto yenu nayikapwa yayinene, ngocho namukapwa muvana vayou Wakulitulaho Chikuma, mwomwo ikiye eji kusolwelanga likoji vaka-kuhona kusakwilila navaka-kuhuka.+
36 Shikaho pwenunga lika muvaka-kutetela nganomu apwa Senu muka-kutetela.+
37 “Kaha nawa, litwaminenu kusopesanga vakwenu, kaha nayenu kaveshi kukamisopesako.+ Litwaminenu kuhananga vatu milonga, kaha nayenu kaveshi kukamihana milongako. Konekelenunga lika vakwenu, kaha nayenu nawa navakamikonekela.+
38 Pwenunga muvaka-kuhana, kaha vatu navakamihana nayenu nawa.+ Navakahingunwina mujisweko jenu chesekelo chamwenemwene, chakujinda, chakunyukumuna, chakuzalilila. Mwomwo chesekelo chize muli nakwesekelanga nacho vakwenu, chikiko navakamyesekela nacho nayenu nawa.”
39 Jino avalwezele nawa chifwanyisa ngwenyi: “Kutala kapuputa nahase kutwaminyina mukwavo kapuputa nyi? Kutala vosena vavali kaveshi kuholokela muwinako tahi?+
40 Muka-kulinangula* kahambakana muka-kumunangulako, oloze weshowo vananangula mwakukupuka mwapwa ngana mwamuka-kumunangula.
41 Ikaze weji kutalilanga chiswaswa chili muliso lyandumbwove, oloze lisoko lili muliso lyove kaweshi kulimonako?+
42 Nawamba ngachilihize kuli ndumbwove ngwove, ‘Ove ndumbwami, ngwitavise ngukufumise chiswaswa chili muliso lyove,’ okunyi lisoko lili muliso lyove kawalimweneko? Ove muka-kulyonga! Vangila kulifumisa lisoko lili muliso lyove, numbanyi umone kanawa mwakufumishila chiswaswa chili muliso lyandumbwove.
43 “Kakweshi mutondo wamwenemwene weji kwimanga mihako yakupolako, kaha nawa kakweshi mutondo wakupola weji kwimanga mihako yamwenemweneko.+
44 Mwomwo mutondo himutondo veji kuutachikijilanga kumihako yawo.+ Chakutalilaho, vatu kaveshi kwaha jikuyu kumitondo yamingongako, chipwe kwaha mihako yamivinyo kumitondo yamingongako.
45 Mutu wamwaza eji kulovolanga vyuma vyamwaza kuluheto lwamwaza lwamumuchima wenyi, oloze mutu wamupi eji kulovolanga vyuma vyavipi kuluheto lwalupi lwamumuchima wenyi, mwomwo kanwa kenyi keji kuhanjikanga vyuma vinavulu mumuchima wenyi.+
46 “Nyi mwomwo ika mweji kungusanyikilanga ngwenu, ‘Ove Mwata! Ove Mwata!’ oloze kamweshi kulinga vyuma ngweji kuhanjikangako?+
47 Weshowo mweza kuli ami nakwivwa mazu ami nakuwakavangiza, nangumilweza ou nalifwane nenyi:+
48 Nalifwane nalunga uze apwile nakutunga zuvo, uze afulile chihela chakwalilaho zuvo nakuchikunamisa, kaha achalile halilolwa. Jino omu kwafumikile livaji, meya alivetele hazuvo yize, oloze kawahashile kuyinyikisako mwomwo vayitungile kanawa.+
49 Oloze weshowo mwevwa mazu ami nakuhona kuwakavangiza,+ nalifwane namutu uze atungile zuvo hamavu chakuzeneka kwala chihela. Meya alivetele hazuvo yize, kaha hahaze vene yashiukile, kaha kushiuka chazuvo yize chapihile chikuma.”
Kwinyikila Chamwishi
^ Chipwe “jimbolo jakuhana Kalunga.”
^ Hela., “nakukana majina enu ngwavo amapi.”
^ Kulumbununa, kulevanyisa chakuzeneka kutambwilaho saku.
^ Chipwe “Kambaji.”
