Lungungu 1:1-22
א [Aleph]*
1 Nganda yize yazalile navatu, yinasale yamupolongwa.+Nganda yize yapwile navatu vavavulu muli vaka-mafuchi,+ yinapu nge tuliwe.Nganda yize yapwilenga nge lisano mujingalila, vanayihane milimo yaundungo.+
ב [Beth]
2 Yili nakulila chikuma ufuku wosena,+ kaha masoji ali nakupwelumuka hamakili ayo.Naumwe kasendo kayo ali nakuyivendejeka wauchi.+Masepa jayo vosena vanayimbembejeka,+ vosena vanapu vaka-kole jayo.
ג [Gimel]
3 Yuta nayi muufunge,+ vanamukwate undungo kaha vali nakumuyanjisa chikuma.+Ali nakutwama muli vaka-mafuchi,+ kawanyine chihela chakunokelako.Vaka-kumuyanjisa vosena vanamukwate shimbu ali muvihuli.
ד [Daleth]
4 Jijila jakuya kuZeyone jili nakulishona, mwomwo naumwe wauchi ali nakuhitamo ayenga kuchiwanyino.+Vikolo vyayo vyosena vanavyenyeka,+ kaha vapilishitu jayo vali nakulishimwoka.Vajike jayo vamapwevo* vali nakulishona, kaha yikiko nawa yili nakulyonyinga.
ה [He]
5 Vaka-kole jayo vanapu jino vamyata* jayo, kaha vali nakutwama chakuzeneka kulizakamina.+Yehova nayilingisa yilyonyinge mwomwo yamilonga yayo yakuzombwojoka jishimbi.+Vana vayo vanayi muufunge kumeso avaka-kole.+
ו [Waw]
6 Ulangaji wamwanapwevo Zeyone unamufumu.+Vilolo jenyi vanapu nge tupaji vaze kavawanyine kwakulilako,Kaha vali nakutambuka oku vanazeye kumeso avaka-kuvahangasana.
ז [Zayin]
7 Omu Yelusalema apwile nakulyonyinga nakulumbwangila,Anukile vyuma vyandando yayinene vize apwilenga navyo kushikulu.+Omu vatu jenyi vavakwachile kuli vaka-kole javo, ikiye kapwile namuka-kumukafwako.+Jino vaka-kole jenyi vamumwene, kaha vamusehele* omu alindumukile.+
ח [Heth]
8 Yelusalema yinalingi shili yayinene.+Shikaho yinapwila chuma chakwivwisa unyengwe.
Vosena vaze vayivumbikilenga vali nakuyilumbilisa mwomwo vanamono usonyi wayo.+Yili nakulyonyinga,+ kaha yili nakukinduluka nasonyi.
ט [Teth]
9 Majilo ayo ali muvifunga vyayo.Kayashinganyekelenga vyakulutweko.+
Kulindumuka chayo chinapu chakukomwesa, kaha naumwe wauchi ali nakuyivendejeka.Ove Yehova, tala luyando lwami, mwomwo muka-kole wami nalitohwesa.+
י [Yod]
10 Vaka-kole jayo vanatambula luheto lwayo lwosena.+Yinamono vaka-mafuchi navengila muchihela chayo chajila,+Vaka-mafuchi vaze wambile ngwove kanda vakengila muchikungulwilo choveko.
כ [Kaph]
11 Vatu jayo vosena vali nakulishimwoka, vali nakutondatonda vyakulya.+Vyuma vyavo vyavilemu vali nakuvitambasana navyakulya mangana vayoye.*Ove Yehova, tala, ngunapu nge ngupwevo wamokomoko.*
ל [Lamed]
12 Enu muli nakuhita mujila, uno chinapu hichuma chachindende numba?Talenu mumone.Kakweshi vihuli vyeka vyavinene vyakuhambakana haliEvi nangumwenesa Yehova halikumbi lyautenu wenyiko.+
מ [Mem]
13 Natumu kakahya kufuma mwilu kezenga muvifuwa vyami,+ kaha kanavifungulula.Nangutela lyoji mangana mahinji ami afwengaho, kaha nangukanjikiza ngukinduluke kunyima.Nangulingisa ngupwenga nge pwevo uze vanaseze.Nguli nakwivwa kukola lwola lwosena.
נ [Nun]
14 Milonga yami yakuzombwojoka jishimbi nangukashililayo kwijiva nge toka.Nangukashililayo hashingo, kaha jinanguhu.Yehova nanguhane mumavoko avaze nanguzeneka kufungulula.+
ס [Samekh]
15 Yehova natapwojola vatu jami vangolo vosena.+Nasanyika lizavu lingunyemukile mangana linongese vakweze jami.+Yehova nalyatangila mwanaYuta wapwevo muchikamwino chavinyo.+
ע [Ayin]
16 Nguli nakulila mwomwo yavyumevi.+ Mumeso muli nakupwelumuka masoji.Vaka-kunguvendejeka, vaka-kunguhizumuna vali kwakusuku nayami.Vana vami vamalunga vanasale uka, mwomwo muka-kole wami nangufungulula.
פ [Pe]
17 Zeyone yinolola mavoko ayo.+ Kakweshi umwe wakuyivendejekako.Yehova nalweze vaka-kole jaYakova vosena vaze vanamujingilika vamunyemukile.+Yelusalema yinapu nge chuma chakwivwisa unyengwe.+
צ [Tsade]
18 Yehova apwa wakwoloka,+ oloze ami yami ngunalikange kujishimbi* jenyi.+Enu vatu veka naveka, ivwililenu, talenu vihuli vyami.Vajike jami vamapwevo* navakweze jami vanayi muufunge.+
ק [Qoph]
19 Ngunasanyika tusendo twami, oloze vanangumbembejeka.+Vapilishitu jami navakulwane jami vananongela munganda,Hakutondatonda vyakulya mangana vayoye.*+
ר [Resh]
20 Ove Yehova, tala, nguli muluyando lwalunene.Mujimo* lyami muli nakunyota.Muchima wami uli nakulyonyinga mwomwo ngunalikange chikuma.+Poko yamukwale yili nakujiha vatu kuweluka,+ kaha mujizuvo nawa vatu vali nakufwa.
ש [Shin]
21 Vatu vanevu kulishimwoka chami. Kakweshi umwe neza nakunguvendejekako.Vaka-kole jami vosena vanevu lupi lunanguwane.Vanawahilila mwomwo ove yove unangunehelalwo.+Oloze omu naukaneha likumbi lize wavilikile,+ natukalifwana.+
ת [Taw]
22 Upi wavo wosena usoloke kumeso ove, kaha vazangamise+Nge omu unanguzangamisa ami mwomwo yamilonga yami yakuzombwojoka jishimbi.Kulishimwoka chami chinatoho, kaha muchima wami uli nakuviza.
Kwinyikila Chamwishi
^ Kapetulu 1 nakuheta ku 4 japwa jingungu jize vasoneka kweseka nomu valikavangijila vasopelo vamuchiHepeleu.
^ Chipwe “Vana jayo vamapwevo.”
^ Hepe., “vanapu jino mitwe.”
^ Chipwe “valisambile.”
^ Ou pwevo nemanyinako Yelusalema.
^ Chipwe “valame myono yavo.”
^ Chipwe “Vana vami vamapwevo.”
^ Hepe., “kukanwa.”
^ Chipwe “valame myono yavo.”
^ Hepe., “Mijingwa.”