Lungungu 5:1-22
5 Ove Yehova, anuka vyuma vinatusolokela.Tala omu tunasauka.+
2 Uswana wetu vanauhane kuli vatu veka, jizuvo jetu vanajihane kuli vaka-mafuchi eka.+
3 Tunapu tuvanginga, katweshi namasetuko. Manetu nawa vanapu vatuliwe.+
4 Meya najikunyi tuli nakuvilanda najimbongo.+
5 Vaze vali nakutuhangasana kalinwomu vatukwate.Tunazeye, kavatwechelele tunokeko.+
6 Tunapendamina hali vaEjipitu+ navaAsulya+ mangana vatuhane vyakulya tulyenga.
7 Vakakuluka jetu vaze valingile shili vafwa lyehi, oloze etu yetu tuli nakuyanda hashili yavo.
8 Vangamba jetu vakiko vali nakutuyula. Naumwe wauchi mwatupululula mumavoko avo.
9 Mupambo muli poko yamukwale, ngocho tuli nakuhaka myono yetu muponde hakuya nakutondatonda vyakulya.+
10 Tuli nakulichikimina nazala, kaha mijimba yetu yinazumu nge lilungu lyakakahya.+
11 Mapwevo jetu muZeyone vanavasaula,* navana vamapwevo mujinganda jamuYuta nawa.+
12 Vilolo vavakashile kulivoko limwe limwe nakuvazezeleka kwilu,+ kaha vatu kavavumbikile vakulwaneko.+
13 Vakweze vanavatwiki malolwa akuchekela unga, kaha vanyike vamalunga vali nakulimbwojoka namikuta yayinene yajikunyi.
14 Vakulwane kaveshi nakutwama cheka kuvikolo vyangandako.+ Vakweze kaveshi nakwimba cheka myaso yavoko.+
15 Katweshi nakuwahilila chekako. Tuli nakulishona mukutela kukinyinyina.+
16 Michama yinaholoka kumitwe yetu. Lamba kuli etu mwomwo tunalingi shili.
17 Michima yetu yili nakuviza mwomwo yavyumevi.+Meso etu anafuvalala mwomwo yavyuma kana.+
18 Pili yaZeyone vanayinongesa,+ ngocho vamyumbwe vali nakutambwojokaho.
19 Ove Yehova, nautwamanga halitanda lyove haya myaka yosena.Litanda lyove nalipwangako lika hachisemunwino hichisemunwino.+
20 Ikaze unatuvulyamina haya myaka yosena? Ikaze unatusuvilila halwola lwalusuku?+
21 Ove Yehova, tukindulwise, kaha natukinduluka kuli ove+ namichima yetu yosena.Vyuma vyosena vipwenga nge muze vyapwile kumakumbi akunyima.+
22 Oloze ove unatukane.Hanga unatukwachila matoto.+
Kwinyikila Chamwishi
^ Chipwe “vanavapiki.”
