Lushimbi lwamuchivali 1:1-46
1 Awa akiko mazu ahanjikile Mose kuli vaIsalele vosena mungalila yaYotau mupambo, mulikundu kwakulitalasana naSufwe, hakachi kaPalane, naTofwele, naLavane, naHazelote, naNji-zahave.
2 Yapwa tunda yamakumbi 11 kufuma kuHoleve nakuheta kuKateshe-mbalaneya+ kuzachisa jila yaPili yaSeile.
3 Mumwaka wakusokesa 40+ kufuma hakusokola vaIsalele muundungo, mukakweji wakusokesa 11, halikumbi lyakulivanga, Mose alwezele vaIsalele* vyuma vyosena vize vamulwezele kuli Yehova.
4 Avalwezele mazu awa omu alingile hanafungulula lyehi Shihone+ mwangana wavaAmole uze atwaminenga kuHeshevone, naOnge+ mwangana waMbashane uze atwaminenga kuAshatalote, kuEtelei.+
5 Mose aputukile kulumbununa Jishimbi+ eji mungalila yaYotau mulifuchi lyaMowave, ngwenyi:
6 “Yehova Kalunga ketu atulwezele kuHoleve ngwenyi, ‘Munashimbula chikuma muno mungalila yajipili.+
7 Katukenu muyenga kungalila yajipili yavaAmole,+ nakuvihela vyahatako vyosena muAlava,+ mungalila yajipili, kuShefwela, kuNengeve, nakungenge yakalungalwiji,+ mulifuchi lyavaKanane, nakuLevanone*+ swi nakukalwiji wamunene Yufwalate.+
8 Talenu! Ngunamihane lifuchi eli lipwenga lyenu. Yenu mukahete lifuchi lize Yehova alishingile kuhana kuli vakakuluka jenu, vaApalahama, naIsaka,+ naYakova+ navana* vavo.’+
9 “Ami ngwamilwezele halwola luze ngwami, ‘Kangweshi kuhasa kumitetekela uka wamiko.+
10 Yehova Kalunga kenu namivulisa, lelo lino munavulu chikuma nge vatanganyika vamwilu.+
11 Yehova Kalunga kavakakuluka jenu amivulise chikumakuma,+ amikisule nganomu amishikile.+
12 Nanguhasa kulemuwa ngachilihi maukalu enu ukawami, nomu mweji kukokojolanga?+
13 Sakulenu malunga vakuzangama, vamangana, vakunangakana vakumiyachi yenu, kaha nanguvatongola vapwenga vatwamina jenu.’+
14 Kahenu mwangwambile ngwenu, ‘Vyuma unatulweze kulinga vyamwaza.’
15 Ngocho ngwatongwele vatwamina vakumiyachi yenu, malunga vamangana, vakunangakana mangana vamitwaminyine, tupitau twamakombakaji, natupitau twamakulukaji, natupitau twamakumi atanu, natupitau twamakumi, vakulwane vakumiyachi yenu.+
16 “Kaha ngwalwezele vaka-kumiyula ngwami, ‘Kachi nge muli vandumbwenu munepuka chihande, muyulenga mwakwoloka+ mutu nandumbwenyi chipwe vamwiza vaze vali navo.+
17 Kanda namukatala kumeso hakusopesa vatuko.+ Mukevwilila kumutu wamokomoko nayou wamulemu.+ Kanda namukevwa woma wavatuko,+ mwomwo kusopesa chinapu chaKalunga.+ Kachi nge mulonga unamikaluhwila kuusopa, kaha mukaunehe kuli ami mangana ngukausope.’+
18 Halwola luze, ngwamilwezele vyuma vize mwatela kulinga.
19 “Kaha twakatukile kuHoleve, twapulasanyine mupambo+ yayinene yakwivwisa woma yize mwalimwenenene enu vavene hakuya kungalila yajipili yavaAmole+ nge muze ahanjikile Yehova Kalunga ketu. Kutwala muze twahetele kuKateshe-mbalaneya.+
20 Jino ngwambile kuli enu ngwami, ‘Munahete kungalila yajipili yavaAmole yize mwatuhana Yehova Kalunga ketu.
21 Talenu! Yehova Kalunga kenu namihane lifuchi. Katukenu, yenunga mulihete, nge muze Yehova Kalunga kenu alwezele vakakuluka jenu.+ Kanda namwivwa woma chipwe kulizakaminako.’
22 “Oloze enu muvosena mwapandamine kuli ami nakwamba ngwenu, ‘Tutumenu malunga kulutwe lwetu vakasondwese lifuchi, kaha vakakinduluke kuli etu, vakatulweze jila twatela kuya, najinganda natuya nakuwana.’+
23 Vyuma mwahanjikile vyawahile, kaha ngwasakwile malunga 12, umwe umwe kumuyachi.+
24 Vakatukile, vayile kungalila yajipili+ nakuheta kuChinema* chaEshekole, kaha vasondwesele lifuchi.
25 Vambachile mihako yimwe yamulifuchi kana, vayinehele kuli etu nakutulweza ngwavo, ‘Lifuchi mwatuhana Yehova Kalunga ketu linapu lyamwaza.’+
26 Oloze mwakanyine kuya mulifuchi kana, mwalikangile kumazu aYehova Kalunga kenu.+
27 Mwatatwokelenga mujimbalaka jenu ngwenu, ‘Yehova atuhungile, shikaho atulowele muEjipitu nakutuhana mumavoko avaAmole, mangana vatunongese.
28 Kuchihela mukaze natuya? Vandumbwetu vatuhombesele*+ hakwamba ngwavo: “Vatu kana vangolo, vakutaluka kutuhambakanetu, kaha jinganda javo jajinene, jikembwe javo nawa jaheta mwilu.+ Twakamonanga navana vaAnake+ kuze.”’
29 “Kaha ngwamyambile ngwami, ‘Kanda namulizuzukila chipwe kuvevwa womako.+
30 Yehova Kalunga kenu mwaya kulutwe lwenu, ikiye mwamyashila jita+ nge muze alingile muEjipitu kumeso enu.+
31 Kaha mupambo nawa mwalimwenenene enu vavene omu Yehova Kalunga kenu amivelekele ngana muze chisemi eji kuvelekanga mwanenyi, nakwiza nenu palanga nomu mwahetele kuchihela chino.’
32 Chamokomoko navyumevi, enu kamwafwelelele Yehova Kalunga kenu,+
33 uze ayile kulutwe lwenu nakusondwesa chihela chakutungila chilombo chenuko. Naufuku amitwaminyinyine nakakahya mangana mumone jila mwatela kuya, kaha namusana amitwaminyinyine nalivwi.+
34 “Yehova evwilenga vyuma mwahanjikilenga, ngocho akwachile matoto nakulishinga ngwenyi,+
35 ‘Hali ava malunga vamuchisemunwino chino chachipi, kaheshi umwe mwakamona lifuchi lyamwaza lize ngwalishingile kuhana kuli vakakuluka jenuko,+
36 kuvanga Kaleve mwanaYefune kaha. Ikiye mwakamona lifuchi kana, kaha lifuchi eli nalyate nangukalihana kuli ikiye nakuli vana venyi, mwomwo nakavangiza Yehova namuchima wenyi wosena.+
37 (Yehova angukwachilile matoto nayami nawa mwomwo yayenu. Ambile ngwenyi, “Nayove nawa kaweshi kukengilamoko.+
38 Yoshuwa mwanaNune uze eji kwimananga kumeso ove+ ikiye mwakengila mulifuchi kana.+ Muzamikise,*+ mwomwo ikiye mwatwaminyina vaIsalele vaswane lifuchi.”)
39 Kaha vana venu vaze mwambile ngwenu navakejiva kulimbachilavo,+ ava kavatachikiza kuwaha nakupihyako, vakiko navakengilamo. Kaha nangukavahanalyo vakalihete.+
40 Oloze enu mingulukenu muyenga mupambo kuzachisa jila yakuKalungalwiji Uchila.’+
41 “Kahenu mwangwambile ngwenu, ‘Tunalingi shili kuli Yehova. Ngocho natuya jino nakulwa jita nge muze atulwezele Yehova Kalunga ketu.’ Kaha mutu himutu apakachile vitwa vyenyi vyajita. Enu mwashinganyekele ngwenu chachashi kukanduka kupili.+
42 Oloze Yehova ambile kuli ami ngwenyi, ‘Valweze ngwove: “Kanda namukanduka kupili nakulwa jitako, mwomwo kangweshi kupwa nayenuko.+ Kachi nge namukanduka, kaha navamifungulula kuli vaka-kole jenu.”’
43 Ami ngwahanjikile kuli enu, oloze kamwangwivwililileko. Mwalikangile kumazu aYehova, mwakandukile kupili mukazamuzamu kenu.
44 Kaha vaAmole vaze vatwaminenga kupili yize vejile nakumiwana, vamihangasanyine kwijiva nge hivapuka. Kaha vamimwangilile kuSeile swi nakuHoloma.
45 Kufumaho mwakindulukile nakulila kumeso aYehova, oloze Yehova kamivwililile chipwe kumyalakanako.
46 Shikaho mwatwaminyine kuKateshe makumbi amavulu chikuma.
Kwinyikila Chamwishi
^ Hepe., “vana vaIsalele.”
^ Pamo ngalila yajipili yaLevanone.
^ Hepe., “nambuto.”
^ Chipwe “kuMwanakalwiji.”
^ Hepe., “valingishile michima yetu yiyengunuke.”
^ Chipwe pamo, “Kalunga namujikijisa.”
