Lushimbi lwamuchivali 10:1-22
10 “Jino Yehova ambile kuli ami ngwenyi, ‘Songa cheka malolwa avali akuya muuhanda nge aze akavanga,+ ukanduke kuno kupili nguli. Usonga nawa chikasha chamutondo.
2 Kaha nangusonekaho mazu aze apwile hamalolwa akavanga wachikile. Awa malolwa kana uwahaka muchikasha.’
3 Ngocho, ngwasongele chikasha chamutondo wamukesha, namalolwa avali akuya muuhanda nge aze akavanga. Kaha ngwakandukile kupili namalolwa avali mumavoko ami.+
4 Asonekeleho mazu nge aze asonekele hakavanga,+ Jishimbi Likumi*+ jize Yehova ahanjikile kuli enu kupili mukakahya+ halikumbi lize mwalikungulwile.+ Kufumaho Yehova anguhanyinejo.
5 Kaha ngwashikumukile kufuma kuze kupili,+ ngwahakile aze malolwa muchikasha chize ngwasongele, muze ali noholyapwa, nganomu angulwezele Yehova.
6 “Jino vaIsalele vakatukile kuMbelote Mbene-yakane, vayile kuMosela. Oku kukiko akafwililile Alone, kaha vamufunjile.+ Mwanenyi Eleyaza amushishile+ nakuputuka kuzata mulimo waupilishitu.
7 Kufuma kuze, vayile kuNgutungota, kaha kufuma kuNgutungota vayile kuYotovata,+ kulifuchi lyavana vatulwiji vameya.
8 “Jino Yehova asakwile muyachi waLevi+ vambatenga chikasha chalushiko lwaYehova,+ vemanenga kumeso aYehova mangana vamuzachilenga, vakisulenga vatu halijina lyenyi+ nge omu vali nakulinga noholyapwa.
9 Shikaho vaLevi kaveshi nachazano chipwe uswana muli vandumbwavoko. Yehova ikiye uswana wavo nge muze ahanjikile Yehova Kalunga kenu kuli vakiko.+
10 Ami ngwatwamine kuze kupili makumbi 40 namusana naufuku+ nge muze ngwalingile hakavanga, kaha Yehova angwivwililile nahalwola kanelu nawa.+ Ngocho Yehova kasakile kuminongesako.
11 Kaha Yehova ambile kuli ami ngwenyi, ‘Yako utwaminyine vatu mangana vakahete lifuchi lize ngwalishingile kuhana kuli vakakuluka javo.’+
12 “Shikaho enu vaIsalele, vyuma muka ali nakusaka Yehova Kalunga kenu kuli enu?+ Yehova Kalunga kenu ali nakusaka kumwivwa woma,+ nakutambukanga mujijila jenyi josena,+ nakumuzanganga, nakumuzachila Yehova Kalunga kenu namichima yenu yosena namyono* yenu yosena,+
13 nakulamanga jishimbi jaYehova najindongi jize nguli nakumilweza likumbi lyalelo mangana mumonenga kuwaha.+
14 Talenu! Melu anapu aYehova Kalunga kenu, namavu navyuma vyosena vize vyatwamaho.+
15 Yehova apandamine kuli vakakuluka jenu nakuvazanga, kaha nasakula enu vana vavo havatu veka naveka vosena,+ nge omu chili oholyapwa.
16 Ngocho tomesenu* michima yenu,+ litwaminenu kupwa vakunjinjavala.*+
17 Mwomwo Yehova Kalunga kenu ikiye Kalunga katulunga,+ ikiye Mwata wavamyata, Kalunga wamunene, wangolo, wakwivwisa woma, uze keshi kutala vatu kumesoko,+ kaha nawa keshi kutambula maswekezako.
18 Eji kulinganga mwachiyulo kuli vana vakuzeneka masevo* navatuliwe.+ Azanga vamwiza,+ kaha eji kuvahananga kulya nauvwalo.
19 Nayenu nawa zangenunga vamwiza mwomwo mwapwile muvamwiza mulifuchi lyaEjipitu.+
20 “Mwivwenunga Yehova Kalunga kenu woma, nakumuzachilanga ikiye,+ mulinjililenga kuli ikiye, nakulishinga halijina lyenyi.
21 Mumwalisenga ikiye.+ Napu Kalunga kenu, uze namilingila vyuma vyosena evi vyavinene, vyakwivwisa woma evi munalimwena nameso enu.+
22 Omu vakakuluka jenu vayile kuEjipitu vapwile vatu* 70,+ oloze oholili Yehova Kalunga kenu namivulisa nge vatanganyika vamwilu.+
Kwinyikila Chamwishi
^ Hepe., “Mazu Likumi.” Vawavuluka nawa ngwavo Mukana waJishimbi.
^ Tala Mukana waMazu.
^ Hepe., “engenu mivumbo.”
^ Hepe., “kanda namukakamisa jishingo jenu chekako.”
^ Chipwe “kuli vanginga.”
^ Chipwe “myono.”
