Lushimbi lwamuchivali 11:1-32
11 “Zangenunga Yehova Kalunga kenu,+ lamenunga lika vize namilweze, najishimbi jenyi, namazu enyi akuyula.
2 Tachikizenu ngwenu lelo nanguhanjika kuli enu, keshi nge kuli vana venu vaze kavatachikijile chipwe kumona kuzangamisa chaYehova Kalunga kenu,+ naunene wenyi,+ nalivoko lyenyi lyaundume,+ lyangoloko.
3 Vana venu kavamwene vinjikizo navilinga vyenyi vize alingile kuli Fwalo mwangana waEjipitu, nakulifuchi lyenyi lyosenako,+
4 chipwe vize alingile kumaswalale vaEjipitu, nakutuvalu twaFwalo, nakumatemba enyi avaka-jita aze vafwikile kumeya aKalungalwiji Uchila omu vapwile nakumihangasana, vaze Yehova anongesele ndolokoto.+
5 Kaha nawa kavamwene vyuma namilingila mupambo palanga nomu mumunahete kuchihela chinoko,
6 novyo alingile kuli Ndatane naAvilame, vana vaElyave mwanaLuvene omu mavu asamine nakuvamina, navaze vakujizuvo javo, najimbalaka javo, naweshowo avakundwijile kumeso avaIsalele vosena.+
7 Munalimwena nameso enu vyuma vyavinene vyosena nalingi Yehova.
8 “Lamenunga jishimbi josena nangumihana likumbi lyalelo, mangana mukwate ngolo nakuzauka muyenga mulifuchi lize namuheta,
9 mangana nawa mutwamenga myaka yayivulu+ mulifuchi lize Yehova alishingile kuhana kuli vakakuluka jenu nakuli vana vavo,+ lifuchi lyakumbwambumuka mavele nauchi.+
10 “Lifuchi muli nakuya nakuheta kalyeshi nge lifuchi lyaEjipitu lize munafumuko, muze mwazachilenga nangolo hakutumba jimbuto nakujitukumwina meya kwijiva nge litepa lyavisakwola.
11 Oloze lifuchi lize namuzauka mangana mukalihete, linapu lifuchi lyajipili navinema.+ Lyeji kunwanga meya avula yamwilu.+
12 Hilifuchi lize Yehova Kalunga kenu eji kulamanga. Meso aYehova Kalunga kenu ali halifuchi kaneli shimbu yosena, kufuma kukuputuka chamwaka swi nakusongo yamwaka.
13 “Kachi nge namwononokanga jishimbi jize nguli nakumilweza likumbi lyalelo, nakuzanga Yehova Kalunga kenu, nakumuzachilanga namichima yenu yosena namyono* yenu yosena,+
14 kaha mwakamihana vula mulifuchi lyenu halwola lwayo, vula yakulivanga navula yakukuminyina. Kaha namukaha jimbuto jenu, navinyo vyavihya, namaji.+
15 Kaha nangukasokesa vyuma vituta muvipapa vyenu mangana vimuna jenu vakalye. Kahenu nawa namukalya nakwikuta.+
16 Lilamenunga kuchina michima yenu nayikamizondola nakumihungumwisa, kaha namukaputuka kulemesa tulunga veka nakulifukula kuli vakiko.+
17 Kachi nge kamweshi kulilamako, kaha Yehova mwakamikwachila matoto, nakusoka vikolo vyamelu mangana vula yikazeneke kunoka.+ Ngocho mavu kaweshi kukasoka jimbutoko, kaha namukafwa washi mulifuchi lyamwaza lize mwamihana Yehova.+
18 “Lamenunga mazu osena awa mumichima yenu namumyono* yenu, akasenu kumavoko enu apwenga akumyanukisa, muwakashile hajiholo jenu.*+
19 Anangulenunga vana venu, muwahanjikenga hakutwama mujizuvo jenu, nahakutambuka mujila, nahakusavala, nahakuhinduka.+
20 Asonekenu havipamba nahavikolo vyajizuvo jenu,
21 mangana enu navana venu mukatwame myaka yayivulu+ mulifuchi lize alishingile Yehova Kalunga kenu kuhana kuli vakakuluka jenu.+ Namukatwamamo myaka yayivulu nge omu lilu lyatwama helu lyamavu.
22 “Kachi nge namulamanga jishimbi nguli nakumilweza, jakuzanganga Yehova Kalunga kenu,+ nakutambukanga mujijila jenyi nakulinjilila kuli ikiye,+
23 Yehova mwakahanga vaka-mafuchi vosena kumeso enu,+ kaha namukafungulula vaka-mafuchi vakumihambakanenu kuvula nangolo.+
24 Cheshocho chihela namukalyata mahinji enu nachikapwa chenu.+ Ngiza yenu nayikaputukila mupambo nakuheta kuLevanone, kaha nawa nayikafuma kuKalwiji Yufwalate swi nakukalungalwiji wakumulauko.*+
25 Kakweshi mutu mwakamimanyina nakoleko.+ Yehova Kalunga kenu mwakalingisa vatu vosena mulifuchi lize namukatambuka+ vakamichikime nakumivwa woma, nge muze amishikile.
26 “Talenu! Likumbi lyalelo nanguhaka kisu nachangu kumeso enu.+
27 Navakamikisula kachi nge namwivwililanga mujishimbi jaYehova Kalunga kenu jize nangumihana likumbi lyalelo.+
28 Navakamyangula kachi nge namukakana kwivwilila jishimbi jaYehova Kalunga kenu,+ nakupyapumuka mujila eyi nguli nakumilweza likumbi lyalelo, nakukava tulunga veka vaze kamwatachikijileko.
29 “Omu Yehova Kalunga kenu mwamingisa mulifuchi lize namuya nakuheta, kakisulenu vatu kuPili yaNgelize, nakwangula nawa vatu kuPili yaEvale.+
30 Eji jipili jatwama musali yaYotau kumulauko, mulifuchi lyavaKanane vaze vatwama muAlava, kuze kwakulitalasana naNgilingale kwakamwihi namitondo yayinene yaMole.+
31 Namuzauka Yotau nakwingila mulifuchi lize namihane Yehova Kalunga kenu.+ Omu namuliheta nakutwamamo,
32 kalamenunga jindongi josena namazu akuyula nguli nakumilweza likumbi lyalelo.+
Kwinyikila Chamwishi
^ Tala Mukana waMazu.
^ Hepe., “muwakashile mukachi kameso enu.”
^ Tala Mukana waMazu.
^ Kulumbununa, Kalungalwiji Wamunene, waMendetelenya.
