Lushimbi lwamuchivali 12:1-32
12 “Eji jikiko jindongi namazu akuyula vize namukalama hamakumbi osena namuyoyanga mulifuchi lize mwamihana Yehova Kalunga kavakakuluka jenu mangana mulihete.
2 Mukenyeka vihela vyosena vyavaka-mafuchi vaze namukahanga, vize veji kulemeselanga tulunga twavo,+ numba vipwa hajipili jajisuku, chipwe hamilundu, chipwe mwishi yamitondo yakujika mafwo.
3 Mukapuzula majiko avo akulumbila, nakuchika jipanda javo+ jajila jamalolwa, nakwocha jipanda javo jajila jamitondo.* Mukavatwojola tulunga twavo+ nakujimbangana majina avo kuvihela kana.+
4 “Kanda namukalemesa Yehova Kalunga kenu nge muze veji kulemesanga tulunga twavoko.+
5 Oloze katondenu Yehova Kalunga kenu kweshokwo mwakasakula vakavulukilengako lijina lyenyi, kuze mwakatwamanga mungalila yamiyachi yenu yosena.+
6 Kuze kukiko namukatwalanga mawana enu akulumba,+ navimuna jenu vakuvatula, navyakusokesa mumakumi,+ namawana enu eka,+ namawana enu alushiko, namawana enu akulisakila,+ navatwatwa vavangombe jenu, navatwatwa vamikoko jenu.+
7 Enu navaze vakuzuvo yenu mukalile kulya kuze, kumeso aYehova Kalunga kenu.+ Kaha mukawahilile hamilimo yenu yosena+ mwomwo Yehova Kalunga kenu namikisula.
8 “Kanda namukalinga nge omu tuli nakulinga oholyapwako, mutu himutu ali nakulinga vyuma vize namono ngwenyi vyakwoloka,
9 mwomwo kanda muchihete kuchihela chakunokela,+ kuuswana wenu mwamihana Yehova Kalunga kenu.
10 Omu namuzauka Yotau+ nakwingila mulifuchi lize Yehova Kalunga kenu mwamihana mulihete, mwakamilingisa mukatwame mukuunda chakuzeneka kumizungisa kuli vaka-kole jenu vosena vaze vanamijingilika, kaha namukapwa vakukingiwa.+
11 Kuze mwakasakula Yehova Kalunga kenu vakavulukilengako lijina lyenyi,+ kukiko namukaneha vyuma vyosena vize ngunamilweze, mawana enu akulumba, navimuna jenu vakuvatula, navyakusokesa mumakumi,+ namawana enu eka, namawana enu aze namukashika kuhana Yehova.
12 Namukawahililanga kumeso aYehova Kalunga kenu,+ navana venu vamalunga navava vamapwevo, navandungo jenu vamalunga navava vamapwevo, navaLevi vaze vali nakutwama mujinganda* jenu, mwomwo vakiko kaveshi nachazano chipwe uswana muli enuko.+
13 Lilamenunga kuchina namukalumbila mawana enu akulumba kuchihela cheka namukamona.+
14 Mukalumbila mawana enu akulumba kuchihela mwakasakula Yehova chakungalila yamiyachi yenu, kaha kuchihela kana kukiko namukalingilanga vyuma vyosenevi nguli nakumilweza.+
15 “Kachi nge namukasaka kulya nyama, kajihenu tuhu vimuna jenu nakulya nyama yavo,+ kweseka nomu namikisula Yehova Kalunga kenu mujinganda jenu josena.* Namutu uze napihi nauze natomo nahase kulyako nge omu mweji kulyanga kayi chipwe kapaji.
16 Oloze kanda namukalya manyingako.+ Mukawamwange hamavu nge meya.+
17 Kanda kukalila vyakusokesa mumakumi vyamanona enu mujinganda jenuko,* chipwe vinyo vyenu vyavihya, chipwe maji, chipwe vatwatwa vavangombe jenu, chipwe vatwatwa vamikoko jenu,+ chipwe mawana enu alushiko aze namulishika, chipwe mawana enu akulisakila, chipwe mawana enu ekako.
18 Oloze mukavilile kumeso aYehova Kalunga kenu kuchihela chize mwakasakula Yehova Kalunga kenu,+ nayenu, navana venu vamalunga navava vamapwevo, navandungo jenu vamalunga navava vamapwevo, navaLevi vaze vali nakutwama mujinganda* jenu. Kaha mukawahilile kumeso aYehova Kalunga kenu hamilimo yenu yosena.
19 Kanda namukavulyama vaLevi+ hamakumbi enu osena aze namukatwamanga mulifuchiko.
20 “Omu Yehova Kalunga kenu mwakalinga hanatohwesa lyehi ngalila yenu+ nge omu namishiki,+ kaha hinamwamba ngwenu, ‘Natusaka kulya nyama,’ mwomwo muli nachipepa chakulya nyama, kalyenu tuhu nyama.+
21 Kachi nge chihela chize mwakasakula Yehova Kalunga kenu kukapwe lijina lyenyi+ chili kwakusuku, kaha vangombe jenu vamwe namikoko jenu vamwe vaze namihane Yehova kavajihilenu tuhu mujinganda* jenu nakuvalya heshoho munasakila, ngana muze ngunamilweze.
22 Mukavalye nge muze mweji kulyanga kayi chipwe kapaji.+ Namutu uze napihi nauze natomo nahase tuhu kulyako.
23 Kanda namukalya manyingako,+ mwomwo manyinga akiko vene mwono.+ Ngocho kanda namukalya mwono nanyama hamweko.
24 Kanda namukawalyako, oloze mukawamwange hamavu nganomu mweji kumwanganga meya.+
25 Kanda namukawalyako mangana vyuma vikamiwahilenga, navana venu vaze navakeza munyima yenu, mwomwo munalingi mwakwoloka kumeso aYehova.
26 Omu namukaya kuchihela chize mwakasakula Yehova, mukatwale kaha vyuma vyenu vyajila, namawana enu alushiko.
27 Kaha nyama namanyinga avimuna vamawana enu akulumba,+ mukavilumba halijiko lyakulumbila lyaYehova Kalunga kenu. Kaha manyinga avimuna jenu vakuvatula mukawamwangile kulijiko lyakulumbila+ lyaYehova Kalunga kenu, oloze nyama mukayilye.
28 “Lamenunga mazu osena ngunamilweze mangana vyuma vimiwahilenga, navana venu vaze navakeza munyima yenu, mwomwo munalingi mwamwaza, mwakwoloka kumeso aYehova Kalunga kenu.
29 “Omu Yehova Kalunga kenu mwakanongesa vatu vamulifuchi lize namukatambula+ nakutwamangamo,
30 kalilamenu kuchina namukakavangiza jijila javo omu navakalinga hivanavanongesa lyehi. Kanda namukehula vyatulunga twavo ngwenu, ‘Ava vaka-mafuchi vazachililenga ngachilihi tulunga twavo? Nayetu mukiko vene munatulinga.’+
31 Kanda namukalinga ngocho kuli Yehova Kalunga kenuko, mwomwo vyuma vyaunyengwe, vize ahunga Yehova, vikiko vanalingilanga tulunga twavo. Vanalumbunga navana vavo vamalunga navava vamapwevo hakakahya kutulunga twavo.+
32 Mulamenga mazu osena awa ngunamilweze.+ Kanda namukawezelako chipwe kufumisakoko.+
Kwinyikila Chamwishi
^ Tala Mukana waMazu.
^ Hepe., “muvikolo.”
^ Hepe., “mukachi kavikolo vyenu vyosena.”
^ Hepe., “mukachi kavikolo vyenu.”
^ Hepe., “muvikolo.”
^ Hepe., “muvikolo.”
