Lushimbi lwamuchivali 13:1-18
-
Mwakuzangamishila vaka-kumuzamukila Kalunga (1-18)
13 “Kachi nge muli enu namukakatuka kapolofweto, chipwe muka-kwambulula vyakulutwe kuhichila muvilota, kaha himwamilweza chinjikizo chipwe chuma chakukomwesa,
2 kachi nge chinjikizo chipwe chuma chakukomwesa chize mwakamilweza nachikatesamo, kaha himwamba ngwenyi, ‘Tukavenunga tulunga veka, vaze munazeneka kutachikiza, nakuvazachila,’
3 kanda namukevwilila mazu ayauze kapolofweto, chipwe ayauze muka-kulota vilotako,+ mwomwo Yehova Kalunga kenu ali nakumyeseka+ mangana atachikize numba nge munazange Yehova Kalunga kenu namichima yenu yosena, namyono* yenu yosena.+
4 Mukavangizenu Yehova Kalunga kenu, mwivwenunga woma, nakulama jishimbi jenyi, mwivwililenga mulizu lyenyi, muzachilenunga ikiye kaha, nakulinjilila kuli ikiye.+
5 Uze kapolofweto, chipwe uze muka-kulota vilota vakamujihe,+ mwomwo azondolanga vatu valikange kuli Yehova Kalunga kenu uze amilowele mulifuchi lyaEjipitu, uze nawa amisokwele muzuvo yaundungo. Mutu kanou wakuhuka kamufumisenu mukachi kenu mwomwo namipyapumuna mujila yize amilwezele Yehova Kalunga kenu mutambukengamo.+
6 “Kachi nge hali vandumbwenu, vana vamanenu, chipwe hali vana venu vamalunga, chipwe vana venu vamapwevo, chipwe mapwevo jenu mwazanga, chipwe masepa jenu,* nahapwa umwe mwamizondola kwaukawenu nakwamba ngwenyi, ‘Tuyenu tuzachile tulunga veka,’+ vaze mwazenekele kutachikiza enu navakakuluka jenu,
7 tulunga twavatu vaze vanamijingilika, kufuma kusongo yalifuchi mbwe nakusongo yikwavo numba vapwa hakamwihi nayenu chipwe hahasuku nayenu,
8 kanda namukamwitavilako, chipwe kumwivwilila,+ chipwe kumwivwila keke, chipwe kumutetela, chipwe kumukingako.
9 Oloze kamujihenu.+ Enu mukalivange kumwasa malolwa numbanyi vatu vosena vakamwase malolwa nakumujiha.+
10 Kamwasenu malolwa nakumujiha+ mwomwo asakanga kumizondola museze Yehova Kalunga kenu, uze amilowele mulifuchi lyaEjipitu, muzuvo yaundungo.
11 Ngocho vaIsalele vosena vaze navakachivwa navakevwa woma, kaha kaveshi kukalinga cheka chuma chachipi chakufwana ngana mukachi kenuko.+
12 “Kachi nge namukevwa vatu navahanjika mujinganda jenu jize mwamihana Yehova Kalunga kenu ngwavo,
13 ‘Muli enu muli tuvihu vaze vanazondola vatu vamujinganda jenu, ngwavo: “Tuyenu tuzachile tulunga veka,” vaze kamwatachikijileko,’
14 kaha katalenu hachihande kanechi, mukachihehwojole kanawa.+ Kachi nge namukawana ngwavo chuma kanechi chaunyengwe chamuchano vene chinalingiwa muli enu,
15 kajihenu vatu vamunganda kana najipoko jamikwale.+ Kanongesenu nanganda kana navyuma vyosena vilimo, navimuna javo.+
16 Vize namukapukula kavikungulwilenu hakachi kuchihela chasanga. Kaha nganda kana kayochenu nakakahya. Vize vyuma vyakupukula vikapwe wana wakuhana kuli Yehova Kalunga kenu. Nganda kana nayikasala malala. Kaveshi kukayitungulula chekako.
17 Kaha havyuma vize vyakutela kunonga,+ kanda namukambataho chuma numba chimweko, mangana Yehova akapeule utenu wenyi hali enu nakumivwila keke, akamitetele, nakumivulisa ngana muze alishingile kuli vakakuluka jenu.+
18 Shikaho ononokenunga* Yehova Kalunga kenu hakulamanga jishimbi eji nguli nakumilweza likumbi lyalelo mangana mulingenga mwakwoloka kumeso aYehova Kalunga.+
Kwinyikila Chamwishi
^ Tala Mukana waMazu.
^ Chipwe “masepa jenu vaze vanapu nge myono yenu.”
^ Chipwe “ivwililenunga mulizu.”
