Lushimbi lwamuchivali 14:1-29
14 “Enu munapu muvana vaYehova Kalunga kenu. Kanda mukalichata jichatoko,+ chipwe kuliteula jikambu jakujiholo jenu mwomwo yakufwisako.+
2 Enu munapu muvatu vajila+ kuli Yehova Kalunga kenu, kaha Yehova namisakula mupwenga muvatu jenyi vakulipwila* havatu veka naveka vosena vali hano hamavu.+
3 “Kanda mukalya vyuma vyaunyengweko.+
4 Ava vakiko tunyama vaze namulyanga:+ ngombe, namukoko, napembe,
5 nakapaji, nakayi, nachila, napembe wamuchipapa, nasonge, namukoko wamuchipapa, namukoko wakujipili.
6 Munahase kulya tuhu tunyama vajisende jakuchangunuka jakupula mukachi vaze nawa veji kuukulanga nakutafunya cheka.
7 Oloze kanda mukalya tunyama vakuukula nakutafunya kahako, chipwe vaze vali najisende jakuchangunuka kahako. Tunyama kana shina: ngamela, nambwanda, naseji-mutumba mwomwo veji kuukulanga nakutafunya kaha, oloze kavatwama najisende jakuchangunukako. Vanapu vavapi kuli enu.+
8 Nangulu nawa, mwomwo atwama najisende jakuchangunuka kaha, oloze keshi kuukula nakutafunyako. Napu wamupi kuli enu. Kanda mukalya nyama yatunyama kanava chipwe kukwata mijimba yavo yakufwako.
9 “Kuvyuma vyakuyoya vyosena vili mumeya munahase kulyako evi: vyeshovyo vyuma vili navitendo namavanda munahase kuvilya.+
10 Oloze kanda mukalya vize vyakuzeneka vitendo namavandako. Vinapu vyavipi kuli enu.
11 “Tujila vosena vaze vanatomo, munahase kuvalya tuhu.
12 Oloze kanda mulya tujila vanoko: ngonga, nakwaze, nakumumu,+
13 naviselele mwaya miyachi yavo, navihungu mwaya miyachi yavo,
14 namakololo mwaya miyachi yavo,
15 nanyamalanda, natule, nakahuluwiji, natumbembe mwaya miyachi yavo,
16 nakapongesa, nachikungulu, nalishishi,
17 nalimbondo, nalikuvi, nakombwe,
18 nandalangimbu, navanyange mwaya miyachi yavo, napepetenu, nachinguzu.
19 Vyeshovyo vyuma vyamavava vize vyeji kutambukanga mumayongomena vinapu vyavipi kuli enu. Kanda mukavilyako.
20 Vyuma vyakutuka mwilu vize vinatomo, munahase kuvilya tuhu.
21 “Kanda mukalya kanyama wakulifwilako.+ Kamuhanenu tuhu kuli mwiza uze ali nakutwama mujinganda* jenu akalye, chipwe kumulanjisa kuli muka-lifuchi lyeka. Mwomwo enu munapu muvatu vajila kuli Yehova Kalunga kenu.
“Kanda mukateleka mwanapembe mumavele anayeko.+
22 “Kujimbuto jenu namukaha mumande enu mwaka himwaka kahanenuko vyakusokesa mumakumi.+
23 Kaha vyakusokesa mumakumi vyamanona enu, navinyo vyenu vyavihya, namaji, navatwatwa vavangombe jenu namikoko jenu, kavililenu kumeso aYehova Kalunga kenu, kuchihela chize mwakasakula, kuze navakavulukilanga lijina lyenyi,+ mangana mukalinangule kumwivwa Yehova Kalunga kenu woma lwola lwosena.+
24 “Kachi nge kuchihela chize mwakasakula Yehova Kalunga kenu, kuze nakukapwa lijina lyenyi+ kwakusuku, kaha vize vyakusokesa mumakumi nawa vinavulu, (mwomwo Yehova Kalunga kenu namikisula), kaha kamweshi kuhasa kuvimbata nakuya navyoko mwomwo kunasuhu,
25 kavilanjisenu, kaha jimbongo mukaye najo kuchihela chize mwakasakula Yehova Kalunga kenu.
26 Jimbongo kana kajilandenu vyeshovyo munasake, vyakufwana nge vangombe, namikoko, navapembe, navinyo, nawala weka, chipwe vyuma vyeka munazange. Kaha mukavilile kuchihela chize, kumeso aYehova Kalunga kenu, mukawahilile navaze vakujizuvo jenu.+
27 Kanda mukasuvilila vaLevi vaze vali mujinganda jenuko,+ mwomwo kaveshi nachazano chipwe uswana muli enuko.+
28 “Kusongo yamwaka himwaka wamuchitatu, mukalovola vyosena vize vyakusokesa mumakumi vyakujimbuto jenu jamumwaka uze, mukavitulika mujinganda jenu.+
29 Kaha vaLevi vaze vazeneka chazano chipwe uswana muli enu, navamwiza, navana vakuzeneka masevo,* navatuliwe, vaze vali mujinganda jenu, navakalya nakwikuta+ mangana Yehova Kalunga kenu akamikisulenga mumilimo yenu yosena.+
Kwinyikila Chamwishi
^ Chipwe “mupwenga muluheto lwenyi azanga.”
^ Hepe., “muvikolo.”
^ Chipwe “navanginga.”
