Lushimbi lwamuchivali 15:1-23
15 “Kusongo yamwaka himwaka wakusokesa 7, mukakonekela vaze vali namikuli yenu.+
2 Omu mukiko namukakonekela vaze munalevanyisa: Mutu himutu uze nalevanyisa mukwavo akamukonekele mukuli wenyi. Kanda akakala mukuli kuli mukwavo chipwe kuli ndumbwenyiko mwomwo Yehova netavisa kukonekela mikuli yavatu.+
3 Kakalenu mikuli yenu kuli vaka-mafuchi eka.+ Oloze vandumbwenunyi kavakonekelenu vyeshovyo vanalevana kuli enu.
4 Yehova mwakamikisula+ mulifuchi lize mwakamihana Yehova Kalunga kenu kupwa uswana wenu, kaha kuli enu kakweshi kukapwa muka-kuhutwako,
5 chikalu kaha kumunevwilila mulizu lyaYehova Kalunga kenu nakulama jishimbi joseneji nguli nakumilweza likumbi lyalelo.+
6 Yehova Kalunga kenu mwakamikisula ngana muze namishiki. Namukalevanyisanga vaka-mafuchi vavavulu, oloze enu kamweshi kukalevanako.+ Namukayulanga vaka-mafuchi vavavulu, oloze vakiko kaveshi kukamiyulako.+
7 “Kachi nge ndumbwenu umwe mujinganda jamulifuchi lyenu lize mwamihana Yehova Kalunga kenu mwahutwa, kanda namukakaluhwisa michima yenu, chipwe kupwa nalifwi kuli ndumbwenu uze nahutuko.+
8 Oloze kasuulukenu nakumulevanyisa vyeshovyo nasake,+ chipwe vize nahono.
9 Lilamenunga kuchina namukashinganyeka mwamupi mumichima yenu ngwenu, ‘Mwaka wakusokesa 7, wakukonekela, uli hakamwihi,’+ nakukana kulevanyisa ndumbwenu uze nahutu, chipwe kukana kumuhana vyuma. Kachi nge mwakayayavala kuli Yehova hali enu, kaha nachikapwa shili kuli enu.+
10 Kamuhanenu namichima yenu yosena.+ Kanda namukamuhana nakunyengetelako, mwomwo hachuma kana hakiko Yehova Kalunga kenu mwakakiswila milimo yenu yosena.+
11 Mulifuchi lyenu namupwanga lika vaka-kuhutwa.+ Shikaho nguli nakumilweza ngwami, ‘Kapwenu namuchima wakuhananga vandumbwenu vaze vanakalikiza, navaze vanahutu mulifuchi lyenu.’+
12 “Kachi nge ndumbwenu wakaHepeleu, lunga chipwe pwevo, vanamulanjisa kuli enu, kaha namizachila myaka 6, kamusuulenu mumwaka wakusokesa 7 akaliyile kwenyi.+
13 Omu namukamusuula, kanda namukamwecha akaye mavokovokoko.
14 Kamuhanenuko vimuna vamwe vakuutanga wenu, najimbuto mweji kuzungulanga kuchizungwilo, namaji, navinyo. Kamuhanenu kweseka nomu namikiswila Yehova Kalunga kenu.
15 Kanukenu ngwenu nayenu mwapwile muvandungo mulifuchi lyaEjipitu, kaha Yehova Kalunga kenu amisokwelemo. Shikaho nguli nakumilweza vyumevi likumbi lyalelo.
16 “Oloze nge mwakamba ngwenyi, ‘Kangweshi kumisezako’ mwomwo amizanga navaze vakuzuvo yenu, hakuwana nge nawahililanga omu natwamenga nayenu,+
17 kaha kamutwalenu kuchikolo chazuvo yenu nakumutuva kumatwitwi enyi namukumbo mangana akapwenga ndungo yenu myaka yosena. Kalingenu ngocho nakuli ndungo yenu wapwevo.
18 Kanda namukevwa kupihya omu namukasuula ndungo yenu akayeko, mwomwo milimo namizachila hamyaka 6, ndando yayo yinatoho mapapa kavali hakuyesekesa namilimo yangamba wakukamba. Kaha Yehova Kalunga kenu namikisula muvyuma vyenu vyosena munazate.
19 “Vatwatwa vavilunga vosena vakumautanga enu avangombe nawawa amikoko mujilikilenuvo Yehova Kalunga kenu.+ Kanda namukazachisanga vatwatwa vavangombe jenu, chipwe kutewula vatwatwa vamikoko jenuko.
20 Vimuna kanava mukavalye mwaka himwaka navaze vakuzuvo yenu, mukavalila kuchihela chize mwakasakula Yehova, kumeso aYehova Kalunga kenu.+
21 Oloze nge vali nakumbilikita, chipwe vanafu meso, chipwe vali natutenga tweka twatunene, kanda namukavahana kuli Yehova Kalunga kenuko.+
22 Vimuna kanava mukavalila mujinganda* jenu. Namutu uze napihi nauze natomo nahase kulyako tuhu nge omu mweji kulyanga kayi chipwe kapaji.+
23 Oloze kanda namukalya manyingako.+ Mukawamwange hamavu nge meya.+
Kwinyikila Chamwishi
^ Hepe., “muvikolo.”
