Lushimbi lwamuchivali 16:1-22
16 “Kanukenunga kakweji waAvive,* mukalingile Yehova Kalunga kenu+ Paseka, mwomwo mukakweji kana mukiko Yehova Kalunga kenu amilowele muEjipitu naufuku.+
2 Mukamuvatwila Yehova Kalunga kenu+ vimuna vaPaseka vakumautanga enu amikoko navangombe,+ kuchihela chize mwakasakula Yehova, kuze navakavulukilanga lijina lyenyi.+
3 Nyama yavo kanda namukayilya navyuma vyachimbalwilako.+ Kalyenu mbolo yakuzeneka chimbalwila hamakumbi 7, mbolo yaluyando, mwomwo mwalovokele mulifuchi lyaEjipitu mukapachapacha.+ Kalingenunga ngocho hamakumbi osena aze namukayoyanga mangana mukanuke likumbi lize mwalovokele mulifuchi lyaEjipitu.+
4 Mungalila yenu yosena kanda vakawanamo muunga wachimbalwila hamakumbi 7 koko.+ Kaha nawa nyama yavimuna namukajiha halikumbi lyakavanga nachingoloshi kanda nayikasavala ufuku wosena palanga nakuchimeneko.+
5 Kanda namukajihila vimuna vaPaseka mujinganda jize mwakamihana Yehova Kalunga kenuko.
6 Oloze kavajihilenu kuchihela chize mwakasakula Yehova Kalunga kenu, kuze navakavulukilanga lijina lyenyi. Mukajiha vimuna vaPaseka nachingoloshi hakulauka chalikumbi,+ halwola vene luze mwalovokele muEjipitu.
7 Mukocha nyama yavo nakuyilila+ kuchihela chize mwakasakula Yehova Kalunga kenu.+ Kaha kuchimene mukakinduluka kujimbalaka jenu.
8 Mukalya mbolo yakuzeneka chimbalwila hamakumbi 6. Kaha likumbi lyakusokesa 7 likapwe likumbi lyakukunguluka chajila kuli Yehova Kalunga kenu. Halikumbi kana kanda namukazata milimoko.+
9 “Mukalava vyalumingo 7, mukavilava kufuma halwola namukaputuka kwaha jimbuto mumande enu.+
10 Kaha mukalinga Chiwanyino chaVyalumingo kuli Yehova Kalunga kenu,+ nakuhana mawana akulisakila kweseka nomu namikiswila Yehova Kalunga kenu.+
11 Mukawahilila kumeso aYehova Kalunga kenu, kuchihela chize mwakasakula Yehova Kalunga kenu, kuze navakavulukilanga lijina lyenyi. Mukawahilila navana venu vamalunga navava vamapwevo, navandungo jenu vamalunga navava vamapwevo, navaLevi vaze vali mujinganda* jenu, navamwiza, navana vakuzeneka masevo,* navatuliwe vaze vali muli enu.+
12 Kanukenu ngwenu nayenu mwapwile muvandungo mulifuchi lyaEjipitu,+ kaha kalamenu jindongi josena eji nakujikavangiza.
13 “Mukalinga Chiwanyino chaVisakila+ hamakumbi 7 omu namukalinga himunakungulula lyehi manona akuvizungwilo vyenu, namaji navinyo vyakuvikamwino vyenu.
14 Mukawahilila hachiwanyino chenu,+ navana venu vamalunga navava vamapwevo, navandungo jenu vamalunga navava vamapwevo, navaLevi, navamwiza, navana vakuzeneka masevo, navatuliwe vaze vali mujinganda jenu.
15 Mukalinga chiwanyino+ kuli Yehova Kalunga kenu hamakumbi 7, kuchihela chize mwakasakula Yehova. Ngocho kawahililenu,+ mwomwo Yehova Kalunga kenu mwakamikisula hakumihana jimbuto jajivulu, nakumikisula nawa mumilimo yenu yosena.+
16 “Malunga vosena vakasoloke kumeso aYehova Kalunga kenu mapapa katatu mumwaka, kuchihela chize mwakasakula. Vakasoloke kumeso enyi kuChiwanyino chaJimbolo Jakuzeneka Chimbalwila,+ nakuChiwanyino chaVyalumingo,+ nakuChiwanyino chaVisakila.+ Kanda vakasoloka mavokovoko kumeso aYehovako.
17 Mutu himutu akahane wana nganomu vanamukiswila kuli Yehova Kalunga kenyi.+
18 “Mukatongola vaka-kuyula+ navakulwane kumuyachi himuyachi mujinganda josena* mwakamihana Yehova Kalunga kenu, kaha vakayulenga vatu mwaya chiyulo chakwoloka.
19 Kanda namukahengesa chiyuloko.+ Kanda namukatala vatu kumesoko,+ chipwe kutambula maswekeza, mwomwo maswekeza eji kulingisa vaka-mangana+ vazeneke kusopa mwakwoloka, nakulingisa nawa muka-kwoloka ahingike mazu enyi.
20 Kalingenu mwaya chiyulo mangana mukayoyenga lika,+ mukatwamenga mulifuchi lize mwamihana Yehova Kalunga kenu.
21 “Kanda namukatumba mutondo kulijiko lyakulumbila lyaYehova Kalunga kenu nakuutenga kupwa panda yajilako.*+
22 “Kanda namukajika panda yajila yamalolwako,+ vyuma vize ahunga Yehova Kalunga kenu.
Kwinyikila Chamwishi
^ Tala Chihande B15.
^ Chipwe “navanginga.”
^ Hepe., “muvikolo.”
^ Hepe., “mukachi kavikolo vyenu vyosena.”
^ Tala Mukana waMazu.
