Lushimbi lwamuchivali 17:1-20
17 “Kanda namukavatwila Yehova Kalunga kenu ngombe chipwe mukoko ali nakatengako, mwomwo napu waunyengwe kumeso aYehova Kalunga kenu.+
2 “Kachi nge mujinganda jenu jize mwamihana Yehova Kalunga kenu namukapwa lunga chipwe pwevo mwakalinga vyuma vyavipi kumeso aYehova Kalunga kenu, nakuzomboka lushiko+ lwenyi,
3 kaha himwapyapumuka nakulemesa tulunga veka nakulifukula kuvakiko, chipwe kulikumbi, chipwe kukakweji, chipwe kumayongomena amwilu osena,+ vyuma vize kangwamilwezele kulingako,+
4 kachi nge chihande kanechi vanamilwezecho, chipwe munachivu, kaha kachihehwojolenu kanawa.+ Nge namukawana ngwavo chuma kanechi chaunyengwe chinalingiwa muIsalele,
5 kaha uze lunga chipwe pwevo nalingi chuma kanechi chachipi, kamutwalenu kuchikolo changanda, mukamwase malolwa akafwe.+
6 Mutunwa twavinjiho vavali, chipwe vatatu,+ mutu kana vakamujihe. Oloze mukanwa kachinjiho umwe, kanda navakamujihako.+
7 Vaze vinjiho vakalivange kumwasa malolwa numbanyi vatu vosena vakamwase malolwa nakumujiha. Kafumisenu mutu kana wamupi muli enu.+
8 “Kachi nge mujinganda jenu namukepuka chihande chachikalu kusopa, numba chipwa chihande chakumwanga manyinga,+ chipwe chihande chakuhakwila mutu, chipwe chaulyanyi, chipwe chihande chavatu vali nakulikokojwesa, kaha kachitwalenu kuchihela chize mwakasakula Yehova Kalunga kenu.+
9 Kachilwezenu vapilishitu vavaLevi, navaka-kuyula+ vaze navakapwako halwola luze, kaha navakamilweza muze navakakasa.+
10 Mukalinga mwosena muze navakakasa kuchihela chize mwakasakula Yehova. Kaha mukalinga mweshomwo navakamilweza.
11 Mukakavangiza jishimbi jize navakamilweza, namuze navakakasa.+ Kanda namukaseza kulinga muze navakamilweza nakulilingila vyenuko.+
12 Mutu uze mwakalikanga nakukana kwivwilila kapilishitu uze eji kuzachilanga kumeso aYehova Kalunga kenu, chipwe kukana kwivwilila muka-kuyula, vakamujihe.+ Kafumisenu mutu kana wamupi muli vaIsalele.+
13 Vatu vosena vaze navakachivwa navakevwa woma, kaha kaveshi kukalikanga chekako.+
14 “Omu namulinga himunengila lyehi mulifuchi lize mwamihana Yehova Kalunga kenu mangana mulihete nakutwamangamo, kaha hinamwamba ngwenu, ‘Tulitongwelenu mwangana ngana mwavaka-mafuchi eka vaze vanatujingilika,’+
15 kaha mukatongola mwangana uze navakasakula kuli Yehova Kalunga kenu.+ Mukamutongola muli vandumbwenu. Kanda namukatongola muka-lifuchi lyeka uze kapwa ndumbwenuko.
16 Kanda akalivulishila tuvalu,+ chipwe kukindulwisa vatu kuEjipitu mangana vakalikungulwile tuvalu vavavuluko,+ mwomwo Yehova amilwezele ngwenyi, ‘Kanda namukakinduluka cheka kuEjipituko.’
17 Kanda akalivulishila mapwevoko, kuchina muchima wenyi naukamupyapumuna.+ Kanda akalivulishila nawa palata nauluko.+
18 Omu mwakatwama halitanda lyawangana, akanungulule Jishimbi kufumisa kumukanda* uze valama vapilishitu vavaLevi+ nakujisoneka mumukanda wenyi.
19 “Akatwamenga nawo, akautangenga makumbi osena mwayoyanga,+ mangana akalinangule kumwivwanga Yehova Kalunga kenyi woma, nakulamanga mazu aJishimbi osena najindongi josena.+
20 Ngocho keshi kukalizundula helu lyavandumbwenyiko. Kaha nawa keshi kukapyapumuka kujishimbi nakulilingila vyenyiko, mangana ikiye navana venyi vakayule myaka yayivulu muIsalele.
Kwinyikila Chamwishi
^ Chipwe “kumukanda wakuvunga.”