Lushimbi lwamuchivali 19:1-21
19 “Omu Yehova Kalunga kenu mwakanongesa vatu vamulifuchi lize mwamihana Yehova Kalunga kenu, kahomu namukalinga himunalihete lyehi nakutwama mujinganda javo namujizuvo javo,+
2 mukasakula jinganda jitatu mulifuchi lize mwamihana Yehova Kalunga kenu.+
3 Lifuchi lize mwamihana Yehova Kalunga kenu mukalipula mujingalila jitatu, kaha ngalila hingalila yikapwe nanganda yayo. Mukawahisa nawa jijila jakuya kujinganda kana mangana mutu uze najihi mukwavo akachinyineko.
4 “Omu mukiko munachikapwa kumutu uze mwakajiha mukwavo kaha himwachinyina kujinganda kana mangana akayoye. Kachi nge mutu keshi nachijindo namukwavoko, kaha himwamujiha chakuzeneka kuchisakula,+
5 chipwe nge mutu ayanga namukwavo muchipapa nakuchava jikunyi, jino hakuteta lukunyi ngimbu hinayisokokela mukwavo kaha himwafwa, mutu kana akachinyine kunganda yimwe hajinganda eji mangana akayoye.+
6 Akachinyine kuze, mokomoko muka-kulinga sambanjinga+ mwakapihilila,* kaha mwakamuhangasana nakumuwana mwomwo tunda yakuya kunganda yayisuku, ngocho mwakamujiha. Uze najihi mukwavo katelanga kufwako mwomwo keshi nenyi nachijindoko.+
7 Shikaho nguli nakumilwezela ngwami, ‘Kasakulenu jinganda jitatu.’
8 “Omu Yehova Kalunga kenu mwakalinga hanatohwesa lyehi jingalila jenu ngana muze alishingile kuli vakakuluka jenu,+ nakumihana lifuchi lize avashikile,+
9 mwomwo munalame jishimbi joseneji nguli nakumilweza, jakuzanga Yehova Kalunga kenu, nakutambuka mujijila jenyi shimbu yosena,+ mukahakilako jinganda jikwavo jitatu kuli jize jitatu jakavanga.+
10 Ngocho manyinga amutu mwakajiha mukwavo chakuzeneka kuchisakula kaveshi kukawamwanga+ mulifuchi lize mwakamihana Yehova Kalunga kenu kupwa uswana wenuko. Kahenu nawa kamweshi kukapwa namulonga wamanyingako.+
11 “Oloze nge mutu mwahunga mukwavo,+ jino himwamuvandamina mangana amulukuke, kaha himwamuvulumuna, ngocho himwafwa, nakuchinyina kunganda yimwe hajinganda kaneji,
12 vakulwane vamunganda kana vakamumbate nakumuhana mumavoko amuka-kulinga sambanjinga mangana akamujihe.+
13 Enu* kanda namukamutetelako, oloze kafumisenu uze namwange manyinga amutu nazeneka mulonga muli vaIsalele+ mangana vyuma vimiwahilenga.
14 “Omu namukatambula uswana wenu mulifuchi lize mwamihana Yehova Kalunga kenu mangana mulihete, ngiza yamutu uze namukalihata nenyi+ kanda namukayinungulula kuze navakayipulila vakakuluka jenyiko.
15 “Chinjiho umwe kaha kanda apayisa* mukwavo hamulonga chipwe hashili nalingiko.+ Oloze haunjiho wavatu* vavali, chipwe vatatu chihande chosena chizame mbe.+
16 Kachi nge chinjiho wamakuli mwavangijikila mukwavo mulonga wakuzomboka jishimbi,+
17 kaha ava vatu vavali vakemane kumeso aYehova, kuli vapilishitu navaka-kuyula vaze navakapwako hamakumbi aze.+
18 Vaka-kuyula vakahehwojole kanawa chihande kana.+ Nge navakawana ngwavo mutu kana hichinjiho wamakuli, avangijikilanga ndumbwenyi vyuma vyamakuli,
19 kaha mukamulinga ngana muze asakanga kulinga ndumbwenyi,+ kafumisenu upi kana mukachi kenu.+
20 Vosena vaze navakachivwa navakevwa woma, kaha kaveshi kukalinga cheka chuma chachipi chakufwana ngana mukachi kenuko.+
21 Enu* kanda namukamutetelako.+ Mukalinga mwono namwono ndwa, liso naliso ndwa, livoko nalivoko ndwa, lihinji nalihinji ndwa.+
Kwinyikila Chamwishi
^ Hepe., “mwakevwa kumuchima hyangu.”
^ Hepe., “Meso enu.”
^ Hepe., “akatukila.”
^ Hepe., “Oloze mutunwa twavinjiho.”
^ Hepe., “Meso enu.”