Lushimbi lwamuchivali 2:1-37
2 “Twakatukile nakuya mupambo kuzachisa jila yakuKalungalwiji Uchila, nge muze Yehova angulwezele,+ kaha twakulishile Pili yaSeile makumbi amavulu.
2 Jino Yehova ambile kuli ami ngwenyi,
3 ‘Munakulisa pili yino makumbi amavulu. Mingulukenu jino mutalise kunote.
4 Lweza vatu ngwove: “Namuhita kungiza yalifuchi lyavandumbwenu, vana vaEsau+ vaze vali nakutwama kuSeile.+ Vakiko navamivwa woma,+ ngocho lilamenu.
5 Kanda namuvazungisako, mwomwo kangweshi kumihana mavu mulifuchi lyavo, chipwe vene kamusuka kakulyata mahinji enuko, mwomwo Pili yaSeile ngunayihane kuli Esau kupwa luheto lwenyi.+
6 Kavahanenu jimbongo javyakulya namukalya, nakuvafweta nawa jimbongo jameya namukanwa.+
7 Mwomwo Yehova Kalunga kenu namikisula mumilimo yenu yosena. Natachikiza kanawa ungeji wenu munatambuka mupambo kaneyi yayinene. Yehova Kalunga kenu napunga nayenu hamyaka yoseneyi 40, kaha kamwazenekele chuma numba chimweko.”’+
8 Ngocho twahichile kungiza yalifuchi lyavandumbwetu, vana vaEsau+ vaze vatwaminenga kuSeile. Kaha katwahichile jila yaAlava, naElate naEjone-ngeveleko.+
“Kufumaho twamingulukile, twayile jila yakuhita mupambo yaMowave.+
9 Yehova ambile jino kuli ami ngwenyi, ‘Kanda namuzungisa vaMowave chipwe kulwa navo jitako, mwomwo kangweshi kumihana mavu mulifuchi lyavo kupwa luheto lwenuko hakuwana nge Ale ngunayihane kuli vana vaLote kupwa luheto lwavo.+
10 (Hakavanga vaEme+ vakiko vatwaminenga kuze, kaha vapwile vatu vavavulu, vangolo, vakutaluka nge vaAnake.
11 VaLefwaime+ navakiko vavamwene nge vaAnake,+ kaha vavavulukilenga kuli vaMowave ngwavo vaEme.
12 Hakavanga vaHole+ vakiko vatwaminenga muSeile, oloze vavafungulwile kuli vana vaEsau nakuvanongesa.+ Kaha vana vaEsau vatwaminenga mulifuchi lize, nge muze vaIsalele navakalinga kulifuchi lize mwakavahana Yehova kupwa luheto lwavo.)
13 Katukenu jino, hitenu muChinema* chaZelete.’ Ngocho twakatukile nakuhita muChinema* chaZelete.+
14 Myaka twatambukile kufuma kuKateshe-mbalaneya palanga nomu twahichile muChinema* chaZelete yapwile 38. Kaha chisemunwino chamalunga vaka-jita chosena chanongele muchilombo ngana muze Yehova alishingile kuli vakiko.+
15 Yehova avanongeselenga muchilombo palanga nomu valalile vosena.+
16 “Omu vaka-jita vosena valingile hivanafu lyehi mulizavu,+
17 Yehova ambile cheka kuli ami ngwenyi,
18 ‘Lelo namuhita mungalila yaMowave chipwe ngwavo Ale.
19 Omu namupandama kuli vaAmone, kanda namuvayanjisa chipwe kuvasowangizako, mwomwo kangweshi kumihana mavu mulifuchi lyavaAmone kupwa luheto lwenuko hakuwana nge ngunalihane lyehi kuli vana vaLote kupwa luheto lwavo.+
20 Eli lifuchi nalikiko valimwenenga kupwa hilifuchi lyavaLefwaime.+ (Hakavanga vaLefwaime vakiko vatwaminengamo, kaha vaAmone vavulukilenga vaLefwaime ngwavo vaZamazume.
21 VaZamazume vapwile vatu vavavulu, vangolo, vakutaluka nge vaAnake.+ Oloze Yehova avanongesele kumeso avaAmone, kaha vavafungulwile mulifuchi lyavo, nakutwamamo vakiko.
22 Omu mukiko avalingilile vana vaEsau vaze vali nakutwama jino kuSeile.+ Anongesele vaHole+ kumeso avo, nakuvafungulula, kaha vanatwamemo palanga nakulikumbi lyalelo.
23 Kaha vaAvime vatwaminenga kumembo akwakamwihi naNgaza+ palanga nomu vavanongesele kuli vaKafwatole+ vaze vafumine kuKafwatole,* kaha vatwaminengamo vakiko.)
24 “‘Katukenu, yenu muhite muChinema chaAlanone.*+ Talenu! Ngunamihane Shihone+ mwangana wavaAmole wakuHeshevone. Ngocho hetenu lifuchi lyenyi, lwenu nenyi jita.
25 Likumbi lyalelo, vatu vosena vahamavu vaze navevwa mujimbu wenu nanguvalingisa valizuzukile nakumivwa woma. Navalizakamina nakulichikimina.’*+
26 “Kaha ngwatumine valuwa kufuma mupambo yaKetemote+ vayenga kuli Shihone mwangana wakuHeshevone, vakamulweze mujimbu ou wakuunda ngwami,+
27 ‘Ngwitavise nguhite mulifuchi lyove. Nanguhita kaha mujila, kangweshi kuchekunukila kuchilyo chipwe kuchimosweko.+
28 Nangulya kaha vyakulya nakunwa meya mungulanjisa. Ngwitavise nguhite tuhu mulifuchi lyove.
29 Omu mukiko vangulingile vana vaEsau vaze vatwama muSeile, navaMowave vaze vatwama muAle. Nanguhita mulifuchi lyove swi nomu nanguzauka Yotau nakuheta mulifuchi lize mwatuhana Yehova Kalunga ketu.’
30 Oloze Shihone mwangana wakuHeshevone katwitavishile kuhita mulifuchi lyenyiko, mwomwo Yehova Kalunga ketu akaluhwishile muchima+ wamwangana, mangana amuhane mumavoko etu nge omu chili.+
31 “Kaha Yehova ambile kuli ami ngwenyi, ‘Tala! Ngunakuhane lyehi Shihone nalifuchi lyenyi hamwe. Heta jino lifuchi lyenyi.’+
32 Omu Shihone ejile navatu jenyi vosena nakulwa jita nayetu kuYahaze,+
33 Yehova Kalunga ketu amuhanyine mumavoko etu, kaha twamufungulwile navana venyi, navatu jenyi vosena.
34 Halwola luze twatambwile jinganda jenyi josena nakujinongesa. Twanongesele malunga, namapwevo navana vavo vosena. Katwaselemo mutu numba umweko.+
35 Vimuna javo vakiko kaha twakwachile nakuvambata kupwa vetu, navyuma vize twapukwile mujinganda twatambwile.
36 Kufuma kuAlowele,+ nganda yize yapwila kukulo yaChinema chaAlanone* (nanganda yize yili muchinema kana) palanga nakuNgileyate, kakweshi nganda twahonene kutambulako. Yehova Kalunga ketu atuhanyinejo josena.+
37 Oloze katwapandamine kulifuchi lyavaAmone,+ kukulo yosena yaChinema* chaYavoke,+ nakujinganda jakungalila yajipili, nakweshokwo atukanjile Yehova Kalunga ketuko.
Kwinyikila Chamwishi
^ Chipwe “muMwanakalwiji.”
^ Chipwe “muMwanakalwiji.”
^ Chipwe “muMwanakalwiji.”
^ Kukiko kuKelete.
^ Chipwe “muMwanakalwiji Alanone.”
^ Chipwe “Navakapwa namisongo nge yize yakusema.”
^ Chipwe “yaMwanakalwiji Alanone.”
^ Chipwe “yaMwanakalwiji.”
