Lushimbi lwamuchivali 21:1-23
21 “Kachi nge namukawana mutu nafu muchipapa mulifuchi lize mwamihana Yehova Kalunga kenu mulihete, kahenu kamwatachikijile ou namujihiko,
2 vakulwane navaka-kuyula+ vakaye nakulava tunda yakufuma haze nafwila mutu nakuheta kujinganda jize jinahateko.
3 Vakulwane vamunganda yili hakamwihi nahaze nafwila uze mutu vakambate mwanangombe uze kanda vazachisengaho lyehi, uze kanda vakasengaho lyehi toka.
4 Vakatwale uze mwanangombe kukalwiji, kuze kanda valimengako lyehi chipwe kutumbako jimbuto. Kaha vakahokole shingo yauze mwanangombe nakumujiha.+
5 “Vapilishitu vaze vapwa vaLevi, vakapandameko, mwomwo Yehova Kalunga kenu avasakula vamuzachilenga,+ vakisulenga vatu mulijina lyaYehova.+ Vakiko vaka-kuvatula vihande vyakutalisa kuulyanyi.+
6 Vakulwane vamunganda yili hakamwihi nakuze nafwila mutu, vakasanyine mavoko avo+ hali mwanangombe uze vanahokwela shingo kuze kukalwiji.
7 Kaha vakambe ngwavo, ‘Mavoko etu kawamwangile manyinga amutu kanako, meso etu nawa kawamwene ou nawamwangeko.
8 Ove Yehova, kanda uhana mulonga vatu jove vaIsalele vaze wasokweleko.+ Kanda wechelela nawa mulonga wamanyinga amutu kanou wize hali vatu jove vaIsaleleko.’+ Ngocho mulonga wamanyinga kaveshi kukavahanawoko.
9 Kachi nge namukalinga ngocho, kaha mulonga wamanyinga ayou mutu naukafuma hali enu mwomwo munalingi mwakwoloka kumeso aYehova.
10 “Omu namukaya nakulwa jita navaka-kole jenu, kaha Yehova Kalunga kenu nawa namifungulwilavo nakuvakwata jino ufunge,+
11 nge hali vaze vafunge mutu umwe mwakamonaho pwevo wamwaza uze nazange nakusaka kumumbata kupwa pwevo lyenyi,
12 kaha akamunehe kuzuvo yenyi. Uze pwevo akateule jikambu kumutwe wenyi nakutenda nawa vyala vyenyi.
13 Akazule nawa uvwalo wenyi waufunge numbanyi akatwame muzuvo yauze lunga. Kaha akalile ise nanaye kakweji wamuundu,+ kufumaho akalisavale nauze lunga. Mwakapwa jino pwevo lyenyi kaha ikiye nawa mwakapwa lunga lyenyi.
14 Oloze nge kasuulukile nenyiko, kaha akamweche akaliyile tuhu+ kweshokwo nasake. Kanda akamulanjisa jimbongo chipwe kumuyanjisako mwomwo namusaula lyehi.
15 “Kachi nge lunga ali namapwevo vavali, kaha himwazangaho umwe kuhambakana mukwavo,* jino vosena hinavasema nenyi vana vamalunga, kaha mwana watwatwa mwasemuka kupwevo uze ahunga,+
16 halikumbi mwakapangila uswana kuli vana venyi, kanda akambata uswana uze watela mwana watwatwa wayauze pwevo ahunga, nakuuhana kuli mwana wayauze pwevo azangako.
17 Mwana watwatwa wayauze pwevo ahunga akamuhane vyazano vivali kuvyuma vyosena ali navyo, mwomwo mwana kana ikiye kuputuka changolo jenyi jakusema. Vyuma vyatela mwana watwatwa vyosena vinapu vyenyi.+
18 “Kachi nge lunga ali namwana wakunjinjavala, wakulikanga, uze keshi kwononoka ise chipwe nayeko,+ kaha vanesejeka kumwolola oloze kate kuvevwilila,+
19 ise nanaye vakamukwate nakumutwala kuli vakulwane kuchikolo changanda.
20 Vakambe kuli vakulwane vanganda ngwavo, ‘Ou mwanetu apwa wakunjinjavala, wakulikanga, keshi kutwononokako. Afwa hakulya,+ apwa nawa muka-kupenda.’+
21 Kaha vatu vosena vamuze munganda vakamwase malolwa nakumujiha. Kafumisenu mutu kanou wamupi muli enu, kaha vaIsalele vosena vaze navakevwa chihande kana navakevwa woma.+
22 “Kachi nge mutu mwakalinga shili yakutela kufwa,+ kaha hinamumujiha nakumusukika hachitondo,+
23 mujimba wenyi kanda ukasavala hachitondo ufuku wosenako.+ Oloze mukaufunda likumbi vene lize mwomwo mutu uze vanasukika napu wakwangula kuli Kalunga.+ Kalingenu ngocho kuchina namukapihisa lifuchi lyenu lize mwamihana Yehova Kalunga kenu kupwa uswana wenu.+
Kwinyikila Chamwishi
^ Hepe., “ali namapwevo vavali, umwe amuzanga, mukwavo amuhunga.”
