Lushimbi lwamuchivali 22:1-30
22 “Kachi nge ngombe chipwe mukoko wandumbwenu nalaluka, kanda namukamwechelelako,+ kamukindulwisenu kuli ndumbwenu.
2 Kachi nge ndumbwenu katwama hakamwihi nayenuko, chipwe nge kamwamutachikizako, kaha kayenu nauze kanyama kuzuvo yenu. Akapwe lika kuli enu palanga noho mwakamuwanyina ndumbwenu, kaha kamuhanenuyo.+
3 Mukalinga ngocho nakuli chimbulu chenyi, nauvwalo wenyi, nacheshocho chuma chenyi chinajimbala chize munawane. Kanda kukavisezako.
4 “Kachi nge namukawana chimbulu chandumbwenu chipwe ngombe yenyi nalimbuka mujila, kanda kukamusezako. Kakafwenu ndumbwenu kukatula uze kanyama.+
5 “Pwevo kanda akavwala uvwalo wamalungako, kaha lunga nawa kanda akavwala uvwalo wamapwevoko. Weshowo mwakalinga vyumevi napu waunyengwe kumeso aYehova Kalunga kenu.
6 “Kachi nge namukamona uswa wakajila kumutondo chipwe hamavu kujila, kaha hinamuwanamo kajila nautama hamaulu chipwe havana venyi, kanda namukambata naye navana venyi hamweko.+
7 Mukaseza naye oloze kambatenu vana venyi. Kalingenu ngocho mangana vyuma vikamiwahilenga, mukatwamenga myaka yayivulu.
8 “Omu namukatunga jizuvo jenu, katungenu navipato hamilungu yajizuvo+ kuchina namukalinehela mulonga wamanyinga nge hanaholoka mutu.
9 “Kanda namukatumba jimbuto jamiyachi yivali mumande enu amivinyoko,+ kuchina jimbuto kana navinyo vize namukahamo navakavitambula nakuvitwala kuchihela chajila.
10 “Kanda namukalimisa ngombe nachimbulu hamweko.+
11 “Kanda namukavwala uvwalo wakutunga namangona amikoko nawanda hamweko.+
12 “Mukajingulwisa jizombo kusongo yauvwalo wenu namukavwalanga.+
13 “Kachi nge lunga mwakambata pwevo nakulisavala nenyi, kaha kufumaho himwamuhunga,*
14 nakumuvulukila vilinga vyasonyi nakumupihisa lijina lyenyi hakwamba ngwenyi, ‘Ngwambatanga ou pwevo, oloze omu ngwalisavalanga nenyi kangwawananga unjiho wakusolola nge kanda achilisavaleho lyehi nalungako,’
15 kaha visemi jayou mwanapwevo vakahane unjiho kuli vakulwane kuchikolo changanda wakusolola nge mwanavo kanda achilisavaleho lyehi nalunga.
16 Ise yayou mwanapwevo akahanjike kuli vakulwane ngwenyi, ‘Ngwasombwesanga mwanami kuli ou lunga kupwa pwevo lyenyi, oloze namuhungu,*
17 nakumuvulukila vilinga vyasonyi ngwenyi: “Ngunawane nge kakweshi unjiho wakusolola nge mwanove kanda achilisavaleho lyehi nalungako.” Shikaho ou ukiko unjiho wakusolola nge mwanami kanda achilisavaleho lyehi nalunga.’ Kaha vakale lihina hamavu kumeso avaze vakulwane vanganda.
18 Vakulwane vanganda+ vakamuzangamise uze lunga.+
19 Kaha vakamukukise jimbongo jakuheta kujishekele* 100 nakujihana kuli ise yapwevo, mwomwo nasaula pwevo wamuIsalele uze kanda achilisavaleho lyehi nalunga.+ Kaha akapwenga lika pwevo lyenyi, kanda akamulukulula mukuyoya chenyi chosenako.
20 “Oloze nge vyuma avulukanga uze lunga vyamuchano, kakweshi unjiho wakusolola nge uze pwevo kanda achilisavaleho lyehi nalungako,
21 uze mwanapwevo vakamutwale kuchikolo chazuvo yaise, kaha malunga vamunganda kana vakamwase malolwa akafwe, mwomwo nalingi chuma chasonyi+ muIsalele hakulinga ujila muzuvo yaise.+ Kafumisenu mutu kanou wamupi muli enu.+
22 “Kachi nge namukawana lunga nalisavala napwevo lyambala, kaha vosena vavali, nalunga napwevo vakavajihe.+ Kafumisenu vatu kanava vavapi muIsalele.
23 “Kachi nge mwanapwevo uze vanahuhu lyehi, uze nawa kanda achilisavaleho lyehi nalunga navamukwata nakumusavala kuli lunga weka munganda,
24 vosena vavali vakavatwale kuchikolo changanda nakuvasa malolwa vafwenga. Uze mwanapwevo vakamujihe mwomwo katwanga kawelele vamukafweko. Nalunga nawa vakamujihe mwomwo nasaula pwevo lyamukwavo.+ Kafumisenu vatu kana ava vavapi muli enu.
25 “Oloze nge lunga mwakawana mwanapwevo muchipapa uze vanahuhu lyehi, kaha himwamukwata nakumusavala, uze lunga vakamujihe uka wenyi,
26 oloze uze mwanapwevo kanda vakamujihako, mwomwo kalingile shili yakutela kumujihilako. Mulonga kanou unalifwane namulonga wamutu uze mwalukuka mukwavo nakumujiha.*+
27 Mwomwo ou mwanapwevo vanahuhu lyehi vamuwananga muchipapa kuli uze lunga, kaha atwanga kawelele oloze kakwapwanga mutu wakumulwilako.
28 “Kachi nge lunga mwakawana pwevo wakuzeneka kuhuhwa uze nawa kanda achilisavaleho lyehi nalunga, kaha himwamukwata nakumusavala, kaha chihande kana hinavachivwa,+
29 uze lunga akafwete ise yayauze pwevo jimbongo jakuheta kujishekele 50, kaha mwapwanga lika pwevo lyenyi.+ Kanda akamulukulula mukuyoya chenyi chosenako.
30 “Mwana kanda akambata pwevo lyaiseko, kuchina mwakasaula ise.*+
Kwinyikila Chamwishi
^ Chipwe “himwamukana.”
^ Chipwe “namukane.”
^ Shekele yimwe yapwile jingalamu 11.4. Tala Chihande B14.
^ Chipwe “nakujiha mwono wenyi.”
^ Hepe., “kuchina mwakazula chifunga chaise.”
