Lushimbi lwamuchivali 25:1-19
25 “Kachi nge malunga vavali navalikokojwesa, vakatwale chihande chavo kuli vaka-kuyula,+ kaha vaka-kuyula vakasambise mutu uze noloka, oloze vakapayise uze nahengesa.+
2 Nge uze nahengesa mwakasakiwa kumuveta vikote,+ muka-kuyula akamufulumanyise, vakamuvetele hameso amukwavo. Vikote navakamuveta vikalite navilinga vyenyi vyakuhuka.
3 Vakamuvete kaha vikote 40.+ Kachi nge navakamuveta vikote vyakuhambakana ha 40, uze ndumbwenu vanavete mwakasauka kumeso enu.
4 “Kanda namukakasa ngombe kukanwa hakuzungula manonako.+
5 “Kachi nge malunga vamujimo limwe navatwama hamwe, kaha umwe mwafwa nakuseza pwevo lyenyi chakuzeneka kusema vana, pwevo lyauze nafu kanda akasomboka kulunga wakutanga yekako. Uze nyalyenyi walunga akamuswane kupwa pwevo lyenyi.+
6 Mwana watwatwa uze mwakasema akamuluke lijina lyandumbwenyi uze wakufwa,+ kuchina lijina lyenyi nalikajimbangana muli vaIsalele.+
7 “Oloze nge uze lunga kate kumbata pwevo lyandumbwenyi, uze pwevo lyandumbwenyi akaye kuli vakulwane kuchikolo changanda nakuvalweza ngwenyi, ‘Ndumbwalunga lyami nakane kulama lijina lyandumbwenyi muli vaIsalele. Kate kunguswana ngupwenga ngupwevo lyenyi.’
8 Vakulwane vanganda vakasanyike uze lunga nakuhanjika nenyi. Kachi nge mwakakana ngwenyi, ‘Kangute kumumbata kupwa pwevo lyami,’
9 kaha uze pwevo lyandumbwenyi akapandame kuli ikiye kumeso avakulwane, akamuzule mendelo kumahinji enyi+ nakumufwijila maleji kumeso enyi nakumwamba ngwenyi, ‘Omu mukiko munavalinganga kuli lunga uze mwakana kusemena ndumbwenyi vana.’
10 Kaha tanga yenyi* navakayivuluka muli vaIsalele ngwavo, ‘Tanga yayauze vazulile mendelo.’
11 “Kachi nge malunga vavali navalizungisa, kaha pwevo lyalunga umwe mweza nakukinga lunga lyenyi hakukwata kuusonyi walunga uze ali nakuzunga nalunga lyenyi,
12 mukamuvatule uze pwevo mavoko enyi. Kanda namukamutetelako.
13 “Kanda namukapwa namalolwa akupezalisa nawo avali mujinjeke jenuko,+ neli lyalinene neli lyalindende.
14 Kanda namukapwa navyesekelo vivali mujizuvo jenuko,*+ nechi chachinene nechi chachindende.
15 Mukapwa navipezaliso vyakwoloka, vyakutamo, navyesekelo vyakwoloka vyakutamo, mangana mukayoyenga myaka yayivulu mulifuchi lize mwamihana Yehova Kalunga kenu.+
16 Mwomwo weshowo mwakapwa navipezaliso vyakuhenga napu waunyengwe kumeso aYehova Kalunga kenu.+
17 “Anukenu muze vamilingile vaAmaleke mujila hakulovoka muEjipitu,+
18 halwola vamiwanyine nakulukuka vaze vasalile munyima yenu omu mwazeyele. Kavevwile Kalunga womako.
19 Omu mwakalinga Yehova Kalunga kenu hanamitwamisa lyehi mukuunda chakuzeneka kumizungisa kuli vaka-kole jenu vosena vaze vanamijingilika mulifuchi lize mwamihana Yehova Kalunga kenu mulihete kupwa uswana wenu,+ mukanongesa vaAmaleke mangana vakazeneke kuvanuka hamavu hosena.+ Kanda namukavulyamako.
Kwinyikila Chamwishi
^ Chipwe “Kaha lijina lyatanga yenyi.” Hepe., “lijina lyenyi.”
^ Hepe., “Kanda namukapwa nalifwa nalifwa mujizuvo jenuko.” Tala Chihande B14.
