Lushimbi lwamuchivali 26:1-19
26 “Omu namukalinga himunengila lyehi mulifuchi lize mwamihana Yehova Kalunga kenu kupwa uswana wenu, kaha nawa himunalihete lyehi nakutwamamo,
2 kujimbuto* jenu jakulivanga jize namukaha mulifuchi lize mwamihana Yehova Kalunga kenu, mukambatako jimwe, mukajihake mumitonga nakuya najo kuchihela chize mwakasakula Yehova Kalunga kenu, kuze navakavulukilanga lijina lyenyi.+
3 Mukaye kuli kapilishitu uze mwakapwako hamakumbi aze, kaha mutu himutu akamulweze ngwenyi, ‘Likumbi lyalelo nguneza nakuhanjika kumeso aYehova Kalunga kove ngwami ngunengila mulifuchi lize alishingile Yehova kuli vakakuluka jetu kutuhanalyo.’+
4 “Kaha kapilishitu akatambule yize mitonga mumavoko enu nakuyihaka kulijiko lyakulumbila lize lili kumeso aYehova Kalunga kenu.
5 Jino mukahanjika mutu himutu kumeso aYehova Kalunga kenu ngwenu, ‘Kakuluka yetu apwile kaAlame+ muka-kulumbwangila.* Ayile kuEjipitu+ kuze akatwamine mwamwiza, kaha vatu vakuzuvo yenyi vapwile vavandende.+ Oloze vakavulile chikuma nakupwa himuyachi waunene, wangolo.+
6 VaEjipitu vatuyanjishile, vatushinyinyikile, nakutukwata undungo.+
7 Twatetele kuli Yehova Kalunga kavakakuluka jetu, kaha Yehova evwile miteto yetu nakumona makava etu, naluyando lwetu, nomu vapwile nakutushinyinyika.+
8 Ngocho Yehova atulowele muEjipitu nalivoko lyenyi lyangolo, lyaundume,+ navyuma vyakwivwisa woma, navinjikizo, navyuma vyakukomwesa.+
9 Kaha natunehe kuno nakutuhana lifuchi lino lyakumbwambumuka mavele nauchi.+
10 Ngocho ngunanehe jimbuto jami jakulivanga jize nanguhane Yehova.’+
“Kaha mukajitumbika kumeso aYehova Kalunga kenu, mukalifukule kumeso aYehova Kalunga kenu.
11 Mukawahilila havyuma vyamwaza vize Yehova Kalunga kenu mwakamihanenu navaze vakuzuvo yenu, navaLevi, navamwiza vaze vali nakutwama muli enu.+
12 “Omu namukakumisa kukungulula+ vyosena vize vyakusokesa mumakumi vyakujimbuto jenu mumwaka wamuchitatu, mukavihana kuli vaLevi, navamwiza, navana vakuzeneka masevo,* navatuliwe, kaha navakalya nakwikuta mujinganda* jenu.+
13 Jino mukahanjika mutu himutu kumeso aYehova Kalunga kenu ngwenu, ‘Ngunambate chazano chajila muzuvo yami nakuchihana kuli vaLevi, navamwiza, navana vakuzeneka masevo, navatuliwe+ ngana muze unatulweze. Kangwahokwele jishimbi jove chipwe kujivulyamako.
14 Chazano kana kangwachilile omu ngwapwanga nakulishonako, chipwe kuchikwata halwola ngwapihyangako, chipwe kuchihana kuvafuko. Ngunononoka mumazu aYehova Kalunga kami, nakulinga vyuma vyosena unangulweze.
15 Jino achitale hano hamavu kufuma omwo mwilu, muutwamo wove wajila, ukisule vatu jove vaIsalele, namavu awa unatuhane,+ lifuchi lyakumbwambumuka mavele nauchi,+ nge omu walishingile kuli vakakuluka jetu.’+
16 “Likumbi lyalelo Yehova Kalunga kenu namilweze mulamenga jindongi kaneji, namazu awa akuyula. Muvilamenga nakuvikavangiza namichima yenu yosena+ namyono* yenu yosena.
17 Munevu omu namishiki Yehova ngwenyi mwapwanga Kalunga kenu, kachi nge namutambukanga mujijila jenyi, nakulamanga jindongi jenyi,+ najishimbi jenyi,+ namazu enyi akuyula,+ nakwivwililanga mulizu lyenyi.
18 Yehova nawa nevu omu munamushiki ngwenu namupwanga muvatu jenyi vakulipwila,*+ namulamanga jishimbi jenyi josena, nge muze namishiki naikiye.
19 Kaha mwakamizezula helu lyavaka-mafuchi vosena vaze natenge,+ ngocho navakamyalisanga, nakumihana ulemu, nakumitohwesa omu namukalisolola kupwa muvatu vajila kuli Yehova Kalunga kenu,+ nge muze namishiki.”
Kwinyikila Chamwishi
^ Hepe., “kumihako.”
^ Chipwe pamo, “muka-kunonga.”
^ Hepe., “muvikolo.”
^ Chipwe “navanginga.”
^ Tala Mukana waMazu.
^ Chipwe “namupwanga muluheto lwenyi azanga.”
