Lushimbi lwamuchivali 27:1-26
27 Jino Mose navakulwane javaIsalele vemanyine kumeso avatu. Kaha Mose avambile ngwenyi: “Lamenunga jishimbi josena nguli nakumilweza likumbi lyalelo.
2 Omu namukazauka Yotau nakwingila mulifuchi mwamihana Yehova Kalunga kenu, mukemika malolwa amanene nakuwasalimba.*+
3 Kahomu namukalinga himunazauka lyehi, mukasonekaho mazu aJishimbi eji, mangana mukengile mulifuchi lize mwamihana Yehova Kalunga kenu, lifuchi lyakumbwambumuka mavele nauchi ngana muze namishiki Yehova, Kalunga kavakakuluka jenu.+
4 Omu namukalinga himunazauka lyehi Yotau, mukemika malolwa awa kuPili yaEvale,+ nakuwasalimba* nge muze ngunamilweze likumbi lyalelo.
5 Mukatungako nawa lijiko lyakulumbila lyaYehova Kalunga kenu, lijiko lyakulumbila lyamalolwa. Malolwa kana kanda namukawasonga nachinoma numba chimweko.+
6 Lijiko lyakulumbila lyaYehova Kalunga kenu mukalitunga namalolwa amuundu, akuzeneka kusonga, kaha mukamulumbila Yehova Kalunga kenu mawana akulumba.
7 Mukahana mawana enu akusolola kuunda,+ kaha mukawalila vene kuze+ nakuwahilila kumeso aYehova Kalunga kenu.+
8 Hamalolwa kana mukasonekaho kanawa mazu osena aJishimbi eji.”+
9 Jino Mose navapilishitu vavaLevi vambile kuli vaIsalele vosena ngwavo: “Enu vaIsalele, holenu kulu, ivwililenu. Lelo munapu muvatu jaYehova Kalunga kenu.+
10 Ivwililenu mulizu lyaYehova Kalunga kenu nakulama jishimbi+ najindongi jenyi nguli nakumilweza likumbi lyalelo.”
11 Halikumbi lize, Mose alwezele vatu ngwenyi:
12 “Miyachi yino yikiko nayikemana kuPili yaNgelize+ nakukisula vatu omu namuzauka Yotau: muyachi waShimeyone, nawou waLevi, nawou waYuta, nawou waIsakale, nawou waYosefwe, nawou waMbenjamine.
13 Kaha miyachi yino nawa yikiko nayikemana kuPili yaEvale+ nakwangula vatu: muyachi waLuvene, nawou waNgate, nawou waAshele, nawou waZevulune, nawou waNdane, nawou waNafwatale.
14 VaLevi vakahanjike kuli vaIsalele nalizu lyakukanguka ngwavo:+
15 “‘Mutu uze mwatenga likombelo lyakusonga,+ chipwe likombelo lyakuzuzulula,+ chuma chize chaunyengwe kumeso aYehova,+ chize vanasongo kuli muka-utotombwe* nakuchisweka, apwenga wakwangula.’ (Kaha vatu vosena vakambe ngwavo, ‘Amene!’*)
16 “‘Ou mwasaula ise chipwe naye apwenga, wakwangula.’+ (Kaha vatu vosena vakambe ngwavo, ‘Amene!’)
17 “‘Ou mwasosolola ngiza yamukwavo, apwenga wakwangula.’+ (Kaha vatu vosena vakambe ngwavo, ‘Amene!’)
18 “‘Ou mwahungumwisa kapuputa ayenga mujila yeka,+ apwenga wakwangula.’ (Kaha vatu vosena vakambe ngwavo, ‘Amene!’)
19 “‘Ou mwahengesa chiyulo+ hakusopesa mwiza, chipwe mwana wakuzeneka ise,* chipwe tuliwe, apwenga wakwangula.’+ (Kaha vatu vosena vakambe ngwavo, ‘Amene!’)
20 “‘Ou mwalisavala napwevo lyaise apwenga wakwangula mwomwo nasaula ise.’*+ (Kaha vatu vosena vakambe ngwavo, ‘Amene!’)
21 “‘Ou mwasavala kanyama apwenga wakwangula.’+ (Kaha vatu vosena vakambe ngwavo, ‘Amene!’)
22 “‘Ou mwalisavala nandumbwenyi wapwevo, mwanaise chipwe mwananaye, apwenga wakwangula.’+ (Kaha vatu vosena vakambe ngwavo, ‘Amene!’)
23 “‘Ou mwalisavala nanayewenu apwenga wakwangula.’+ (Kaha vatu vosena vakambe ngwavo, ‘Amene!’)
24 “‘Ou mwaswaminyina mukwavo nakumujiha apwenga wakwangula.’+ (Kaha vatu vosena vakambe ngwavo, ‘Amene!’)
25 “‘Ou mwatambula maswekeza mangana ajihe mutu uze nazeneka mulonga, apwenga wakwangula.’+ (Kaha vatu vosena vakambe ngwavo, ‘Amene!’)
26 “‘Ou mwakana kulama mazu aJishimbi eji, nakuzeneka kuwakavangiza, apwenga wakwangula.’+ (Kaha vatu vosena vakambe ngwavo, ‘Amene!’)
Kwinyikila Chamwishi
^ Chipwe “nakuwakwita pemba.”
^ Chipwe “nakuwakwita pemba.”
^ Chipwe “Chipwenga vene ngocho.”
^ Chipwe “kuli muka-kuzata milimo yakusonga nakufula.”
^ Chipwe “nginga.”
^ Hepe., “mwomwo nazulu chifunga chaise.”
