Lushimbi lwamuchivali 28:1-68
28 “Kachi nge namwivwililanga mulizu lyaYehova Kalunga kenu nakukavangiza jishimbi josena nguli nakumilweza likumbi lyalelo, kaha Yehova Kalunga kenu mwakamizezula helu lyavaka-mafuchi vosena vahamavu.+
2 Jikisu josena jino najikeza hali enu,+ mwomwo munevwililanga mulizu lyaYehova Kalunga kenu:
3 “Navakamikisula mujinganda jenu, namavu enu nawa navakawakisula.+
4 “Navakakisula vana venu,*+ najimbuto jamumande enu, navimuna jenu, navangombe namikoko.+
5 “Navakakisula mitonga yenu,+ naviloso vyenu vyakuchikila unga.+
6 “Navakamikisula mumilimo yenu yosena.
7 “Yehova mwakalingisa vaka-kole jenu vaze navakamikatukila mukavafungulule.+ Navakejila kumutamba umwe nakuminyemukila, oloze navakalimwanga nakuchinyina kumitamba 7.+
8 Yehova mwakakisula visete vyenu,+ namilimo yenu yosena. Yehova Kalunga kenu mwakamikisula mulifuchi lize mwamihana.
9 Kachi nge namulamanga jishimbi jaYehova Kalunga kenu nakutambukanga mujijila jenyi, kaha Yehova mwakamilingisa kupwa muvatu jenyi vajila+ nge muze alishingile kuli enu.+
10 Vatu vahamavu vosena navakatachikiza ngwavo vamivulukila lijina lyaYehova,+ kaha navakamivwanga woma.+
11 “Yehova mwakamihana vana vavavulu, navimuna vavavulu, namavu awilo+ mulifuchi lize alishingile Yehova kuli vakakuluka jenu kumihanalyo.+
12 Yehova mwakasokolola visete vyenyi, akiko melu, kaha mwakanokesa vula mulifuchi lyenu hangonde yayo,+ nakukisula milimo yenu yosena. Namukalevanyisanga vaka-mafuchi vavavulu, oloze enu kamweshi kukalevanako.+
13 Kachi nge namwononokanga jishimbi jaYehova Kalunga kenu, eji nguli nakumihana likumbi lyalelo, nakujikavangizanga, Yehova mwakamitohwesa hali vaka-mafuchi eka, kaha kaveshi kukamiyulangako. Mwakamizezula helu,+ kaha kamweshi kukapwa mwishi yavoko.
14 Kanda namukaseza kulinga mwaya mazu awa nguli nakumilweza likumbi lyaleloko. Kanda namukalilingila+ vyenu nakuzachila tulunga vekako.+
15 “Kachi nge kamweshi kukevwilila mulizu lyaYehova Kalunga kenuko, nakuzeneka kulama jishimbi jenyi josena nguli nakumilweza likumbi lyalelo, kaha vyangu vino navikeza hali enu:+
16 “Navakamyangula mujinganda jenu, nakwangula nawa mavu enu.+
17 “Navakangula mitonga yenu,+ naviloso vyenu vyakuchikila unga.+
18 “Navakangula vana venu,*+ najimbuto jamumande enu, navangombe jenu namikoko jenu.+
19 “Navakamyangula mumilimo yenu yosena.
20 “Yehova mwakamitumina vyangu, mwakamiluwanganyisa, nakumizangamisa muvyuma vyosena namukalinga palanga nomu namukanonga ndolokoto, havilinga vyenu vyavipi, mwomwo munamuseze.*+
21 Yehova mwakamiveta namusongo palanga nomu mwakamilalisa mulifuchi lize namwingila mangana mulihete.+
22 Yehova mwakamiveta namusongo watulo,* nachishikashika,+ navijimbo, musongo waliyena, najipoko jamikwale,+ namusana wakaza, nakambukungulu,+ kaha navikamiyanjisa palanga nomu namukanonga.
23 Melu nawakapwa nge unengu, kaha mavu nawakapwa nge fwelu.+
24 Yehova mwakanokesa usekeseke nalukungu muchishishisa chavula palanga nomu namukanonga.
25 Yehova mwakalingisa vaka-kole jenu vakamifungulule.+ Namukejila kumutamba umwe nakuvanyemukila, oloze namukalimwanga nakuchinyina kumitamba 7. Kaha namukakomowesa mawangana ahamavu osena.+
26 Mijimba yenu yakufwa nayikapwa kulya chatujila vakutuka mwilu, natunyama vahamavu, kaha naumwe wauchi mwakavevwisa woma.+
27 “Yehova mwakamiveta namahute akuEjipitu, namusongo wavitomba, nakumiveta namukule, najimbandu, kaha kamweshi kukayoyako.
28 Yehova mwakamizalwisa, nakumiveta naupuputa,+ mwakamiluwanganyisa.*
29 Namukapupuchilanga musana weye, nge muze eji kupupuchilanga kapuputa.+ Kamweshi kukafukila muvyuma vyosena namukalingako. Navakamilyapulanga shimbu yosena nakumipupa, kaha kakweshi mutu mwakamilwilako.+
30 Namukahuhwa mapwevo, oloze malunga veka navakavapika. Namukatunga jizuvo, oloze kamweshi kukatwamamoko.+ Namukalima mande amivinyo, oloze kamweshi kukalya mihako yawoko.+
31 Vangombe jenu navakavajihila hameso enu, oloze kamweshi kukalya nyama yavoko. Vimbulu jenu navakavevila hameso enu, oloze kamweshi kukavawanako. Mikoko jenu navakalimbachilavo kuli vaka-kole jenu, oloze kamweshi kukapwa nayou wakumilwilako.
32 Vana venu vamalunga navava vamapwevo navakavahana kuvatu veka+ hameso enu, kaha namukasaka kuvamona cheka, oloze kamweshi kukapwa nomu mwakulingilako.
33 Jimbuto jenu, navyakulya vyenu vyosena navakavilyanga kuvatu kamwatachikizako,+ kaha navakamilyapulanga nakumiyanjisa shimbu yosena.
34 Namukevwanga kupihya havyuma namukamonanga nameso enu.
35 “Yehova mwakamiveta namahute amapi, akuzeneka kuka, kufuma kuvilyachilo vyenu swi nakumitwe yenu.
36 Enu, namwangana uze namukalisakwila, navakamihanga kuli Yehova. Mwakamihangila kulifuchi lyeka lize munazeneka enu kutachikiza chipwe vakakuluka jenu.+ Kuze kukiko namukazachilanga tulunga veka vamitondo namalolwa.+
37 Vatu navakamikomokanga nakumisaula,* kaha navakamitolekanga kuli vatu veka naveka vakuze mwakamihangila Yehova.+
38 “Namukatumbanga jimbuto jajivulu mumande enu, oloze namukaha jajindende+ mwomwo vambimba navakajilya.
39 Namukalima mande amivinyo, oloze kamweshi kukahamo mihako nakukanwa vinyo vyayoko,+ mwomwo tututu navakayilya.
40 Namukapwa namilive yayivulu mungalila yenu yosena, oloze kamweshi kukalikwita maji akumiliveko, mwomwo jilive najikalukumuka.
41 Namukasema vana vamalunga navava vamapwevo, oloze kamweshi kukatwama navoko, mwomwo navakavakwata undungo.+
42 Tututu* navakenyeka mitondo, namihako yamulifuchi lyenu.
43 Vamwiza vaze vali nakutwama nayenu navakakwatanga lika ngolo, oloze enu namukazeyelangako lika.
44 Navakamilevanyisanga, oloze enu kamweshi kukavalevanyisako.+ Navakapwa vavalemu, oloze enu namukapwa muvamokomoko.+
45 “Kachi nge namukakana kwivwilila mulizu lyaYehova Kalunga kenu, nakuzeneka kulama jishimbi jenyi josena jize namilweze,+ kaha vyangu vyosenevi+ navikeza kuli enu nakumiwana palanga nomu namukanonga muvosena.+
46 Navikeza hali enu, nahali vana venu kupwa hichinjikizo, hichuma chakumihuhumuna haya myaka namyaka,+
47 mwomwo munazeneka kuzachila Yehova Kalunga kenu namuchima wakuwahilila, wakusuuluka halwola munapunga navyuma vyavivulu.+
48 Yehova mwakamitumina vaka-kole jenu, kaha namukavazachila+ nazala,+ nalipwila, nauvu, nakukalikiza. Mwakamihaka toka yafwelu hajishingo jenu palanga nomu mwakamilalisa muvosena.
49 “Yehova mwakaminehela vaka-lifuchi lyakwakusuku vakamilukuke,+ kaha navakaminyemukila nge ngonga.+ Mwakaminehela vaka-lifuchi vaze vahanjika lilimi lize kamwatachikizako,+
50 vaka-lifuchi lyakwivwisa woma vaze kaveshi kukatetela tushinakaji, chipwe vanyikeko.+
51 Navakalya vana vavimuna jenu, najimbuto jamulifuchi lyenu palanga nomu navakamilalisa. Kaveshi kukaseza jimbuto numba jimweko, chipwe vinyo vyavihya, chipwe maji, chipwe mavuvu javangombe, chipwe mikoko jenuko.+
52 Navakamihaka muchingombela, navakamikuchikila mukachi kajinganda* jamulifuchi lyenu, palanga nomu najikaholoka jikembwe jenu jajisuku, jakukola, jize mwafwelela. Navakamihaka muchingombela mujinganda jenu josena jamulifuchi lize namihane Yehova Kalunga kenu.+
53 Namukalya nyama yavana venu,* nyama yavana venu vamalunga, navava vamapwevo+ vaze namihane Yehova Kalunga kenu, mwomwo yakusuhwa chalwola navakamihaka muchingombela naluyando luze navakamimwenesa vaka-kole jenu.
54 “Nalunga wakeke chikuma, muka-kutetela muli enu keshi kukevwila keke ndumbwenyi, chipwe pwevo lyenyi azanga, chipwe vana venyi vaze vachili nakuyoyako.
55 Keshi kukavahanako nyama yavana venyi vamwe yize mwakalya, mwomwo kayeshi kukatamoko hakutwama chikuma muchingombela, naluyando luze navakamimwenesa vaka-kole mujinganda jenu.+
56 Kaha pwevo wakeke chikuma, muka-kutetela muli enu uze kalyachilenga vilyachilo vyenyi hamavu mwomwo yauhando,+ keshi kukevwila keke lunga lyenyi, chipwe mwanenyi walunga, chipwe wapwevoko.
57 Mwakalya nakemba uze mwakasema, navize navikamufuma mujimo lyenyi hakusapuluka, mwomwo yakusuhwa chalwola navakamihaka muchingombela, naluyando luze navakamimwenesa vaka-kole mujinganda jenu.
58 “Kachi nge kamweshi kukavangiza nakulama mazu osena awa vanasoneka muJishimbi jili mumukanda uno,+ nakuzeneka kwivwa woma lijina+ lyaKalunga kenu Yehova,+ lyaupahu, lyakwivwisa womako,
59 kaha Yehova mwakaminehelenu navana venu vipupu vyavinene,+ vyangolo vize navikashimbula, namisongo yayinene yize nayikashimbula.
60 Mwakaminehela misongo yosena yakuEjipitu yize yamivwishilenga woma, kaha namukayivizanga lika.
61 Yehova mwakaminehela nawa misongo navipupu vize vanazeneka kusoneka mumukanda uno waJishimbi palanga nomu navakamilalisa muvosena.
62 Numba tuhu munavulu chikuma nge vatanganyika vamwilu,+ oloze hali enu nahakasala vavandende kaha,+ mwomwo yakuzeneka kwivwilila mulizu lyaYehova Kalunga kenu.
63 “Ngana muze Yehova amivwililile kuwaha kumikisula nakumivulisa, mukiko nawa Yehova mwakamivwila kuwaha kuminongesa palanga nomu mwakamilalisa muvosena nakumifumisa mulifuchi lize muli hakamwihi nakuliheta.
64 “Yehova mwakamimwangila muli vaka-mafuchi eka kufuma kusongo yamavu mbwe nakusongo yikwavo,+ kaha namukazachila tulunga vamitondo, navava vamalolwa vaze kamwatachikijile enu navakakuluka jenuko.+
65 Kamweshi kukatwama mukuunda muli vaka-mafuchi kanako,+ chipwe kuwana chihela chakulyata mahinji enu mangana munokeko. Oloze Yehova mwakazakamisa michima yenu,+ nakumifuvalalisa meso enu, nakumivwisa chiwomawoma.+
66 Kuyoya chenu nachikapwanga chakulyonyinga, namukapwa nachiwomawoma ufuku namusana, kaha kamweshi kukatachikiza numba nge namuyoya nyi chiku.
67 Nachimene namukambanga ngwenu, ‘Kachi chapwanga chingoloshi.’ kaha nachingoloshi nawa namukambanga ngwenu, ‘Kachi chapwanga chimene.’ mwomwo yawoma namukevwa navyuma namukamona.
68 Yehova mwakamikindulwisa kuEjipitu namato kuzachisa jila yize ngwamilwezele ngwami, ‘Kamweshi kukahitamo chekako.’ Kaha namukasaka kulilanjisa enu vavene kuli vaka-kole jenu kupwa muvandungo vamalunga navava vamapwevo, oloze kakweshi kukapwa nou mwakamilandako.”
Kwinyikila Chamwishi
^ Hepe., “mihako yamumajimo enu.”
^ Hepe., “mihako yamumajimo enu.”
^ Hepe., “munanguseze.”
^ Musongo waTB.
^ Chipwe “mwakamitanganyisa mumichima.”
^ Hepe., “nakumivuluka mutushimutwiji.”
^ Chipwe “Tututu vavyema.”
^ Hepe., “kavikolo.”
^ Hepe., “yamihako yamumajimo enu.”
