Lushimbi lwamuchivali 3:1-29
3 “Kaha twamingulukile, twayile jila yakuya kuMbashane. Jino Onge mwangana wakuMbashane atukikililile navatu jenyi vosena mangana alwenga jita nayetu kuEtelei.+
2 Yehova ambile kuli ami ngwenyi, ‘Kanda namumwivwa womako, mwomwo nangumuhana mumavoko enu, navatu jenyi vosena, nalifuchi lyenyi. Namumulinga nge muze mwalingile Shihone mwangana wavaAmole uze atwaminenga muHeshevone.’
3 Ngocho Yehova Kalunga ketu atuhanyine Onge mwangana waMbashane mumavoko etu navatu jenyi vosena. Kaha twavajihile, kakwasalile mutu wenyi numba umweko.
4 Twatambwile jinganda javo josena. Kakwapwile nganda numba yimwe twazenekele kutambulako. Japwile jinganda 60, jamungalila yaAlangove yosena, muwangana waOnge muMbashane.+
5 Jinganda joseneji japwile najikembwe jajisuku, navikolo natupachiso. Twatambwile najinganda jajivulu jakuzeneka jikembwe.
6 Kaha twajinongesele josena navatu hamwe,+ nge muze twalingile kuli Shihone mwangana waHeshevone hakunongesa jinganda jenyi josena, namalunga, namapwevo, navana vavandende.+
7 Oloze twambachile vimuna javo vosena, navyuma twapukwile mujinganda kana.
8 “Twatambwile lifuchi lyavamyangana javaAmole+ vavali vaze vatwaminenga mungalila yaYotau, kufuma kuChinema chaAlanone* swi nakuPili yaHelemone.+
9 (Vaka-Shitone vavulukilenga Pili yaHelemone ngwavo Shilyone, kaha vaAmole vayivulukilenga ngwavo Senyile.)
10 Twatambwile jinganda jakuchihela chakusalama josena, nangalila yaNgileyate yosena, naMbashane yosena swi nakuSaleka naEtelei,+ jinganda jamuwangana waOnge muMbashane.
11 Mwomwo Onge mwangana waMbashane ikiye kaha alitulileho kuli vaLefwaime. Musela* wenyi wapwile wakutunga nafwelu,* kaha noholili uchili muLava, nganda yavaAmone. Kusuhwa chawo chapwile jikuvite* 9, kaha kutohwa chawo chapwile jikuvite 4 kweseka nakuvite vatachikiza vatu.
12 Twahetele lifuchi kaneli. Nganda yaAlowele+ yize yapwile kuChinema chaAlanone* nachimbwa changalila yajipili yaNgileyate najinganda jayo ngunavihane kuli vaLuvene navaNgate.+
13 Kaha chimbwa chaNgileyate chikwavo, nangalila yaMbashane yosena yamuwangana waOnge, ngunavihane kuchimbwa chamuyachi waManase.+ Kaha ngalila yosena yaAlangove yize yatwama muMbashane vayivulukilenga ngwavo lifuchi lyavaLefwaime.
14 “Yaile+ mwanaManase ambachile ngalila yaAlangove+ swi nakungiza yavaNgeshule navaMakate,+ kaha membo ajimbalaka amuMbashane awalukile lijina lyenyi lyaHavote-yaile*+ nakulikumbi lyalelo.
15 Makile ngunamuhane Ngileyate.+
16 Kaha vaLuvene navaNgate+ ngunavahane ngalila yakufuma kuNgileyate swi nakuChinema* chaAlanone. Hakachi kachinema kana hakiko hali ngiza yavo. Ngalila yavo yinahete nawa nakuYavoke, chinema chize chapwa ngiza yavaAmone.
17 Ngunavahane nawa Alava naYotau nachikulo chayo, kuputukila kuKinelete swi nakuKalungalwiji wakuAlava, Kalungalwiji waMungwa* uze atwama kumukandu waPishinga kumututuko.+
18 “Ngwamilwezele ngwami, ‘Yehova Kalunga kenu namihane lifuchi eli mangana mulihete. Ngocho vingazule vamalunga vosena muli enu valipakate vitwa, vakatuke kumeso avandumbwavo vaIsalele nakuzauka.+
19 Mapwevo jenu navana venu, navimuna jenu (ngunatachikiza ngwami, muli navimuna vavavulu chikuma) vakiko navasala mujinganda eji ngunamihane,
20 palanga nomu Yehova mwahana vandumbwenu kunoka, omu navaheta lifuchi lize mwavahana Yehova Kalunga kenu musali yaYotau. Kufumaho numba mukakinduluke, mutu himutu kuluheto lwenyi ngunamuhane.’+
21 “Ngwalwezele Yoshuwa+ halwola luze ngwami, ‘Unalimwena nameso ove omu Yehova Kalunga kove nalingi kuli ava vamyangana vavali. Ngocho Yehova mwalinga mwomumwe kuvamyangana vosena vaze vali musali.+
22 Kanda namuvevwa womako, mwomwo Yehova Kalunga kenu ikiye mwamyashila jita.’+
23 “Jino ngwalembelelele Yehova ngwami,
24 ‘Ove Mwata Wakulitulaho Yehova, unaputuka kungusolwela ami ngamba yove unene wove nangolo jalivoko lyove,+ kaha kalunga weka mukaze, mwilu chipwe hamavu mwahasa kulinga vyuma kanevi vyangolo unalingi?+
25 Ngocho, ngwitavise nguzauke nakumona lifuchi lyamwaza lize lili musali yaYotau, ngalila yamwaza yajipili, naLevanone nawa.’+
26 Oloze Yehova achipwile namatoto hali ami mwomwo yayenu,+ kaha kangwivwililileko. Yehova ambile kuli ami ngwenyi, ‘Kunahu. Kanda ukahanjika cheka nayami hachihande kanechiko.
27 Yako helu lyapili yaPishinga,+ wandule meso ove kumulauko, nakunote, nakusulo, nakumututuko, utale lifuchi kana, mwomwo ove kaweshi kuzauka Yotauko.+
28 Tongola Yoshuwa,+ mukolezeze nakumuzamisa, mwomwo ikiye mwakapwa kulutwe lwavatu ava hakuzauka kalwiji,+ kaha ikiye nawa mwakavatwaminyina vakaswane lifuchi eli mumona.’
29 Vyuma vyosenevi vyasolokele omu twapwile muchinema, kuze kwakulitalasana naMbete-peyole.+
Kwinyikila Chamwishi
^ Chipwe “kuMwanakalwiji Alanone.”
^ Chipwe “Kashote; Pongishi.”
^ Kuvite yimwe yapwile jisendimita 44.5. Tala Chihande B14.
^ Chipwe pamo, “namalolwa elava.”
^ Chipwe “kuMwanakalwiji Alanone.”
^ Ulumbunwiso, “Membo aYaile aJimbalaka.”
^ Chipwe “nakuMwanakalwiji Alanone.”
^ Ikiye Kalungalwiji waKufwa.
