Lushimbi lwamuchivali 30:1-20
30 “Omu nawakatesamo mazu osena awa kuli enu, mazu akukisula nawawa akwangula, awa ngunahanjika kumeso enu,+ kaha hinamukawanuka*+ kumafuchi osena aze mwakamimwangila Yehova Kalunga kenu,+
2 kachi nge namukakinduluka kuli Yehova Kalunga kenu+ nakwivwilila mulizu lyenyi namichima yenu yosena namyono*+ yenu yosena kweseka navyuma vyosena nguli nakumilweza enu navana venu likumbi lyalelo,
3 Yehova Kalunga kenu mwakamisokola muufunge+ nakumivwila keke,+ kaha mwakamikungulwila hamwe kufuma kuvatu veka naveka kuze mwakamimwangila+ Yehova Kalunga kenu.
4 Numba tuhu vakwenu vamwe navakavamwangila kusongosongo yamavu, Yehova Kalunga kenu mwakavafumisako nakuvaneha kuli enu.+
5 Yehova Kalunga kenu mwakamineha mulifuchi lize ahanyine vakakuluka jenu kupwa luheto lwavo, kaha namukaliheta. Ngocho mwakamifukisa nakumivulisa kuhambakana vakakuluka jenu.+
6 Yehova Kalunga kenu mwakatomesa* michima yenu neyi yavana venu,+ mangana mukazange Yehova Kalunga kenu namichima yenu yosena namyono* yenu yosena, kaha namukayoyanga.+
7 Yehova Kalunga kenu mwakaneha vyangu vyosenevi hali vaka-kole jenu vaze navakamihunga nakumiyanjisa.+
8 “Namukevwilila mulizu lyaYehova nakulama jishimbi jenyi josena nangumilweza likumbi lyalelo.
9 Yehova Kalunga kenu mwakamifukisa chikuma mumilimo yenu yosena,+ mwakavulisa vana venu, navimuna jenu, najimbuto jenu, mwomwo Yehova mwakevwa cheka kuwaha kumifukisa nge muze evwililile kuwaha kufukisa vakakuluka jenu.+
10 Mwomwo namukevwilila mulizu lyaYehova Kalunga kenu nakulama jishimbi jenyi vanasoneka mumukanda uno waJishimbi, kaha namukakinduluka kuli Yehova Kalunga kenu namichima yenu yosena namyono*+ yenu yosena.
11 “Jishimbi eji nangumihana likumbi lyalelo kajeshi jajikaluko, kaha nawa kajeshi kwakusuku nayenuko.+
12 Kajeshi mwiluko, numba mwambe ngwenu, ‘Iyaze mwaya mwilu akatumbachilejo mangana tujivwe nakujikavangiza?’+
13 Kaha nawa kajeshi musali yakalungalwijiko, numba mwambe ngwenu, ‘Iyaze mwazauka musali yakalungalwiji akatumbachilejo mangana tujivwe nakujikavangiza?’
14 Mwomwo mazu ajishimbi eji, ali hakamwihi nayenu, mutunwa twenu vene namumichima+ yenu mangana muwakavangize.+
15 “Talenu! Likumbi lyalelo ngunahake kuyoya nakuwaha, kufwa nakupihya kumeso enu.+
16 Kachi nge namwononoka jishimbi jaYehova Kalunga kenu nangumilweza likumbi lyalelo, nakuzanganga Yehova Kalunga kenu,+ nakutambukanga mujijila jenyi, nakulamanga jishimbi jenyi, namazu enyi akuyula, kaha namuyoyanga+ nakuvula. Ngocho Yehova Kalunga kenu mwamikisula mulifuchi lize namwingila mangana mulihete.+
17 “Oloze nge michima yenu nayikalumuka+ nakukana kungwivwilila, kaha hinayimizondola mulifukule kutulunga veka nakuvazachila,+
18 kaha nangumilweza likumbi lyalelo ngwami namukanonga.+ Kamweshi kukatwama myaka yayivulu mulifuchi lize namuzauka Yotau mangana muliheteko.
19 Ngunalishingi melu namavu kupwa unjiho kuli enu likumbi lyalelo ngwami, ngunahake kuyoya nakufwa, najikisu navyangu+ kumeso enu. Sakulenuho kuyoya mangana enu navana venu+ muyoyenga,+
20 muzangenga Yehova Kalunga kenu,+ nakwivwilila mulizu lyenyi, nakulipanjika nenyi.+ Mwomwo ikiye kuyoya chenu, kaha namukatwama myaka yayivulu mulifuchi lize alishingile Yehova kuhana kuli vakakuluka jenu vaApalahama, naIsaka, naYakova.”+
Kwinyikila Chamwishi
^ Hepe., “kaha hinamukawakindulwisa cheka kumichima yenu.”
^ Tala Mukana waMazu.
^ Hepe., “mwakajihana.”
^ Tala Mukana waMazu.
^ Tala Mukana waMazu.