Lushimbi lwamuchivali 31:1-30
31 Mose ayile kuli vaIsalele vosena nakuvalweza mazu awa
2 ngwenyi: “Nguli jino namyaka yakusemuka 120.+ Ngocho kangweshi kumitwaminyina chekako,* mwomwo Yehova nambe kuli ami ngwenyi, ‘Kaweshi kuzauka Yotauko.’+
3 Yehova Kalunga kenu ikiye mwazauka kumeso enu, ikiye mwanongesa vaka-mafuchi awa kumeso enu nakuvafumisamo.+ Yoshuwa ikiye mwamitwaminyina muzauke musali+ nge omu nahanjika Yehova.
4 Yehova mwavanongesa nge muze anongesele Shihone+ naOnge,+ vamyangana javaAmole, namafuchi avo hamwe.+
5 Yehova mwakamifungulwilavo, kaha mukavalinga nge omu mwaya jishimbi eji ngunamihane.+
6 Komikenu, kajikizenu.+ Kanda namukevwa woma chipwe kulizuzukila kumeso avoko,+ mwomwo Yehova Kalunga kenu mwaya kulutwe lwenu. Keshi kukamimbila chipwe kumisezako.”+
7 Jino Mose asanyikile Yoshuwa, amulwezele kumeso avaIsalele vosena ngwenyi: “Umika, jikiza,+ mwomwo ove yove nawingisa ava vatu mulifuchi lize Yehova alishingile kuli vakakuluka javo kuvahanalyo. Kaha ukavahana lifuchi kana kupwa uswana wavo.+
8 Yehova mwaya kulutwe lwove, kaha mwapwanga lika nayove.+ Keshi kukakumbila chipwe kukusezako. Kanda nawivwa woma chipwe kulizuzukilako.”+
9 Mose asonekele Jishimbi+ eji, kaha ajihanyine kuli vapilishitu vaze vapwa vaLevi, vaka-kumbata chikasha chalushiko lwaYehova, nakuli vakulwane javaIsalele vosena.
10 Jino Mose avalwezele ngwenyi: “Kusongo yamwaka himwaka wakusokesa 7, halwola vatongola lwamumwaka wakukonekela,+ lwaChiwanyino chaVisakila,+
11 omu vaIsalele vosena navakeza kumeso aYehova+ Kalunga kenu kuchihela chize mwakasakula, mukavatangila Jishimbi eji mangana vakajivwe.+
12 Mukakungulula vatu,+ malunga namapwevo, navanyike,* navamwiza vaze vali nakutwama mujinganda* jenu, mangana vakevwilile, nakulinangula, nakumwivwa Yehova Kalunga kenu woma, vakalingenga mwaya mazu osena aJishimbi eji.
13 Kaha vana vavo vaze navakazeneka kutachikiza Jishimbi eji, navakevwilila+ nakulinangula kumwivwa Yehova Kalunga kenu woma hamakumbi osena aze namukatwama mulifuchi eli namutambula mulihete+ omu namuzauka Yotau.”
14 Kaha Yehova ambile kuli Mose ngwenyi: “Tala! Ove uli kwakamwihi nakufwa.+ Sanyika Yoshuwa, mwizenga* mumbalaka yakuliwanyina mangana ngumuhane utwamina.”+ Ngocho Mose naYoshuwa vayile mumbalaka yakuliwanyina.
15 Jino Yehova asolokele mupanda yalivwi muze mumbalaka, kaha yize panda yalivwi yemanyine kuchikolo chambalaka.+
16 Kaha Yehova ambile kuli Mose ngwenyi: “Tala! Ove kalinwomu ufwenga.* Vatu kana navakaputuka kulinga ujila wakushipilitu natulunga veka vamulifuchi eli navengila.+ Navakanguseza+ nakuhokola lushiko ngunalishiki navo.+
17 Kaha matoto ami nawakeza hali vakiko,+ nangukavaseza+ nakulisweka kuli vakiko+ palanga nomu navakanonga vosena.+ Kahomu navakamona vihuli vyavivulu namakava, navakamba ngwavo, ‘Kalunga natuseze shikaho tuli nakumona vihuli kanevi.’+
18 Oloze nangukalisweka lika kuli vakiko mwomwo vanalingi mwamupi hakwalumukila kutulunga veka.+
19 “Ngocho sonekenu mwaso uno,+ muunangule vaIsalele.+ Vanangulenuwo* mangana ukapwenga unjiho wami wakuvanukisa vyuma navikasoloka kachi nge navalikanga kuli ami.+
20 Omu nangulinga hingunavatwale lyehi mulifuchi lize ngwalishingile kuli vakakuluka javo,+ lifuchi lyakumbwambumuka mavele nauchi,+ kaha hivanali nakwikuta nakufukila,*+ navakalumukila kutulunga veka nakuvazachila. Navakangusaula nakuhokola lushiko lwami.+
21 Kahomu navakamona vihuli vyavivulu namakava,+ ou mwaso naukapwa unjiho kuli vakiko, (vana vavo kanda vakauvulyamako) mwomwo ngunatachikiza lyehi vyuma vanajinyinga mumichima yavo+ shimbu kanda nguvengise mulifuchi eli ngunalishingi kuvahana.”
22 Ngocho Mose asonekele mwaso ou halikumbi lize, kaha aunangwile vaIsalele.
23 Kalunga ahanyine nawa Yoshuwa+ mwanaNune utwamina, nakumulweza ngwenyi: “Umika, jikiza,+ mwomwo ove yove nawingisa vaIsalele mulifuchi eli ngunalishingi kuli vakiko,+ kaha nangupwanga lika nayove.”
24 Omu Mose akumishile kusoneka mazu osena aJishimbi mumukanda,+
25 alwezele vaLevi vaka-kumbata chikasha chalushiko lwaYehova ngwenyi:
26 “Mbatenu mukanda kanou waJishimbi+ muuhake muchikasha+ chalushiko lwaYehova Kalunga kenu, ukapwenga unjiho kuli enu.
27 Mwomwo ami ngunatachikiza kulikanga+ chenu nakukakama chamichima*+ yenu. Kachi nge munalikangenga kuli Yehova omu ngunapunga nayenu, kahanyi namukahambakanamo omu nangulinga hingunafu lyehi.
28 Ngukungulwilenu vakulwane jamiyachi yenu vosena, navilolo jenu vosena, mangana nguhanjike mazu ano kuli vakiko, ngulishinge melu namavu kupwa unjiho kuli vakiko.+
29 Mwomwo ngunatachikiza ngwami omu nangulinga hingunafu lyehi, namukahuka+ nakuseza kulinga muze ngunamilweze. Kaha kulutwe namukamona vihuli+ mwomwo namukalinga vyuma vyavipi kumeso aYehova, nakumwivwisa kupihya navilinga vyenu.”
30 Ngocho Mose atangile mazu amwaso ou kufuma kusongo nakusongo hameso achikungulwilo chavaIsalele chosena:+
Kwinyikila Chamwishi
^ Hepe., “kangweshi kulovoka nakwingilako.”
^ Hepe., “navana vavandende.”
^ Hepe., “muvikolo.”
^ Chipwe “mwimane muvihela vyenu.”
^ Hepe., “usavale navakakuluka jove.”
^ Hepe., “Vahakenuwo mutunwa twavo.”
^ Hepe., “nakutohwa.”
^ Hepe., “nakukakama chajishingo.”
