Lushimbi lwamuchivali 32:1-52
32 “Ove lilu, ivwilila, mangana nguhanjike.Kaha mavu evwilile mazu amukanwa kami.
2 Jindongi jami najinoka nge vula,Mazu ami nawawila nge lyume,Nawanoka nge vula yakazevezeve hamwila wachimbeteNge vula yamungole havyuma vituta.
3 Mwomwo nanguvilika lijina lyaYehova.+Ambululenu unene waKalunga ketu.+
4 Ikiye Lilolwa, milimo yenyi yapwa yakukupuka mwosena,+Jijila jenyi josena jakwoloka.+Apwa Kalunga wakushishika+ uze keshi kuhengesa chiyuloko.+Apwa wakwoloka, wakusungama.+
5 Vanalyenyeka vavene.+Vakiko kaveshi vana venyiko, tutenga tunapu twavo.+Vanapu vaka-chisemunwino chakuhenga, chakuhingama.+
6 Enu vatu vakuzeneka mangana, vakuhulama,+ omu mukiko munamumulinganga Yehova+ tahi?
Kumana keshi ikiye senu amisemeneko tahi?+
Keshi ikiye amitengele nakumizamisako tahi?
7 Anukenunga makumbi akushikulu,Shinganyekenu myaka yavaka-visemunwino vyakushikulu.Ihulenu vakakuluka jenu, kaha navamilweza.+Ihulenu vakulwane jenu, kaha navamyambulila.
8 Omu Muka-Kulitulaho Chikuma ahanyine vaka-mafuchi uswana,+Omu ahandunwine vana vaAlama* kuli umwe namukwavo,+Apulile jingiza javatu+Ajipulile kweseka nakuvula chavana vaIsalele.+
9 Mwomwo vatu jaYehova vakiko chazano chenyi.+Vatu jaYakova vakiko uswana wenyi.+
10 Avawanyine mupambo,+Avawanyine mulikundu lyanganavene, lyamupolongwa.+Avajingilikile mangana avakinge, avazakamine,+Avakingile nge katutu kahaliso lyenyi.+
11 Nge muze ngonga eji kusunganga uswa wenyi,Nakutengenya helu lyavana venyi,Nakuzajika mavava enyi mangana avaveleke,Nakuvambata hamapulwa enyi,+
12 Mukiko Yehova avatwaminyinyinenga uka wenyi,+Kakwapwile kalunga wekako.+
13 Avatambukishilenga havihela vyakulunduka vyahamavu,+Ngocho valilenga vize vyakusoka hamavu.+Avalishile uchi wakulilolwa,Namaji akulilolwa lyakukola.
14 Avalishilenga mateka akufuma kuvangombe, namavele amikokoNamikoko vamwaza,*Navizamba jamikoko vakuMbashane, navizamba javapembeNatiliku yakuhambakana kuwaha,+Kaha vanwine vinyo vyakufuma kumwemwe yamihako.
15 Omu vaYeshulune* vatohwele, vapipukile nakulikanga.Vanatoho, vanakanyama, vanataluka.+Vanaseze Kalunga uze avatengele,+Vanalumbilisa Lilolwa lyaulwilo wavo.
16 Vamwivwishile lisungu hakukava tulunga veka.+Vamwivwishile kupihya hakulinga vyuma vyaunyengwe.+
17 Vavatwilile vimuna javo kuli vandemone keshi kuli Kalungako,+Kutulunga vaze vazenekele kutachikiza,Kutulunga vakalinwomu,Vaze vazenekele kutachikiza kuli vakakuluka jenu.
18 Mwavulyamine Lilolwa+ lize lyamilelele,Kamwanukile Kalunga uze amisemeneko.+
19 Omu Yehova amwene ngocho amikanyine,+Mwomwo vana venyi vamalunga navava vamapwevo vamwivwishile kupihya.
20 Kaha ambile ngwenyi, ‘Nangulisweka kuli vakiko,+Nangumona omu munavapwa.Mwomwo vanapu vaka-chisemunwino chachipi,+Vana vakuzeneka kashishi.+
21 Vanangwivwisa lisungu hakulemesa tulunga vamokomoko.+Vanangwivwisa kupihya hakulemesa makombelo.+Ngocho nangukavevwisa lisungu hakwitavila vatu vamokomoko.+Nangukavevwisa kupihya hakusakula muyachi wakuhulama.+
22 Matoto ami anepula kakahya+Kaze nakengila nakwishi yaFuka,*+Kaha nakocha mavu navyuma vyakusokahoNakocha navihela vyajipili.
23 Nangukavulisa vihuli vyavo.Mivwi yami nayikahwila hali vakiko.
24 Navakazeya nazala,+Navakafwa nachishikashika, nakunonga ndolokoto.+Nangukavatumina visuma vamazo akuvambuka,+Navaka-kuhalala hamavu vaulembe.
25 Jipoko jamikwale najikavalya kuweluka,+Kaha mukachi navakafwa namuzuzu,+Vyumevi navikalya navakweze jamalunga navana vamapwevo vaze kanda valisavaleho lyehi namalunga,Navikalya navakemba navakulwane vakwechi jivwi.+
26 Ngwambile ngwami: “Kachi nguvasande,Kachi nguvalingise vavavulyame muli vatu,”
27 Oloze ngwalizakaminyine hamazu akasautu vanahase kuhanjika vaka-kole,+Mwomwo vaka-kole vanahase kukukulula mwakuhenga,+Vanahase kwamba ngwavo: “Tunavafungulula mungolo jetu,+Yehova keshi ikiye natukafweko.”
28 Mwomwo vaIsalele vanapu muyachi wakuhona mangana,*Kavapwa vatu vakunangakanako.+
29 Kachi nge vapwanga vatu vamangana,+ kachi vanahunanana hachumechi.+Kachi vanashinganyeka havyuma navifumamo.+
30 Vatu 1,000 navavahangasana ngachilihi kuli mutu umwe?Chipwe vatu 10,000 navavahanga ngachilihi kuli vatu vavali?+Kuvanganyi pamo Lilolwa lyavo avalandulule+Kuvanga Yehova navaseze.
31 Mwomwo lilolwa lyavo kalyeshi nge Lilolwa lyetuko,+Navaka-kole jetu vanatachikiza chuma kanechi.+
32 Mwomwo mivinyo yavo yafuma kumivinyo yakuSotomeYafuma nawa kumande akuNgomola.+Mihako yamivinyo yavo yinapu mihako yaulembe,Misusu yavo yavinyo yayisasu.+
33 Vinyo vyavo vinapu nge ulembe wamanokaUkenya wavo unapu nge ulembe wafwiji.
34 Uno vyuma kanevi kangwavilamineko tahi?Kangwavitulikile muchisete chamiko tahi?+
35 Kulinga sambanjinga chinapu chami, nakushishishilamo nawa chinapu chami,+Nangukavilinga halwola nawakasenunuka mahinji avo,+Mwomwo likumbi lyaluyando lwavo lili hakamwihi,Vyuma navivawana navyanguhwa kwiza.’
36 Yehova mwakasopesa vatu jenyi+Oloze mwakatetela vangamba jenyi,+Omu mwakamona ngwenyi ngolo javo jinavahuNgwenyi kunasale vatu vakuzeya, vakuzeneka mutu wakuvakafwa.
37 Jino mwakamba ngwenyi, ‘Tulunga twavo vali kulihi,+Vaze vapwile lilolwa lyavo mwachinyinyine,
38 Vaze valilenga maji avimuna javo vakuvatula,*Vaze vanwinenga wana wavo wavinyo?+Vezenga vamikafwe.Vapwenga uchinyino wenu.
39 Talenu jino! Ami yami+ KalungaKakweshi tulunga vekako, shina yami kaha.+Ngweji kujihanga nakuyoyesa.+Ngweji kulemekanga+ nakuhindula,+Kakweshi umwe nahase kupululula mukwavo mulivoko lyamiko.+
40 Ngunolola livoko lyami mwilu,Nakulishinga ngwami: “Omu ngwayoya myaka yosena tu,”+
41 Kachi nge nanguhotola poko yami yakuvyakuma yamukwale,Nakulizanga ngusopese,+Nangukalinga sambanjinga kuli vaka-kole jami,+Nakushishishilamo vaze vanguhunga.
42 Nangukapendesa mivwi yami namanyinga,Kaha poko yami nayikalya nyama,Namanyinga avaze vanajihi nawawa avafunge,Namitwe yavatwamina javaka-kole.’
43 Enu vaka-mafuchi, wahililenunga navatu jenyi hamwe,+Mwomwo mwakalinga sambanjinga hamanyinga avangamba jenyi,+Kaha mwakashishishilamo vaka-kole jenyi+Mwakatomesa lifuchi lyavatu jenyi.”
44 Ngocho Mose ejile nakuhanjika mazu osena amwaso ou kumeso avatu.+ Apwile hamwe naHosheya*+ mwanaNune.
45 Omu Mose akumishile kuhanjika mazu osena awa kuli vaIsalele,
46 ambile kuli vakiko ngwenyi: “Lamenunga mazu osena awa ngunamihuhumuna likumbi lyalelo,+ mangana mulwezenga vana venu valingenga mwaya mazu aJishimbi eji.+
47 Awa kaweshi himazu amokomokoko, oloze anapu kuyoya chenu.+ Alamenunga mangana mukatwame myaka yayivulu mulifuchi eli namutambula mulihete omu namuzauka Yotau.”
48 Yehova ahanjikile kuli Mose halikumbi vene eli ngwenyi:
49 “Kanduka kupili yaAvalime,+ Pili yaNevo+ yize yili mulifuchi lyaMowave, yize yalitalasana naYeliko, mangana ukatalileko lifuchi lyaKanane lize nanguhana vaIsalele kupwa luheto lwavo.+
50 Naukafwila hapili yize naukanduka, kaha naukatoka ngana mwavatu jove,* nge muze nawa afwile ndumbwove Alone hapili yaHole,+ kaha atokele ngana mwavatu jenyi.
51 Mwomwo muvosena muvavali kamwashishikile kuli ami kumeso avaIsaleleko, kumeya aze akuMeliva+ kuKateshe mupambo yaJine. Kaha kamwangumwene kupwa nguwajila kumeso avaIsaleleko.+
52 Lifuchi eli nanguhana vaIsalele,+ naulimwena hahasuku, oloze ove kaweshi kwingilamoko.”
Kwinyikila Chamwishi
^ Chipwe pamo, “muyachi wavatu.”
^ Hepe., “vamaji.”
^ Ulumbunwiso, “Mutu Wakwoloka,” hivulukiso yayilemu yavaIsalele.
^ Chipwe “yaSheyole,” kulumbununa fuka yavatu vosena. Tala Mukana waMazu.
^ Chipwe pamo, “wakuhona kwivwilila kumazu navavakafwa.”
^ Chipwe “Vaze valilenga vimuna javo vamwaza vakuvatula.”
^ Eli hilijina livene lyaYoshuwa. Hosheya hilijina lyaHoshayiya mukavatu lize lyalumbununa “Vamulwila kuli Ya; Ya Namulwili.”
^ Eyi hindangwishi yize yalumbununa kufwa.