Lushimbi lwamuchivali 5:1-33
5 Jino Mose asanyikile vaIsalele vosena, kaha ambile kuli vakiko ngwenyi: “Enu vaIsalele ivwililenu kujindongi namazu akuyula aze nangumilweza likumbi lyalelo. Linangulenuwo nakuwalama.
2 Yehova Kalunga ketu alishikile lushiko nayetu kuHoleve.+
3 Yehova alishikile lushiko kana nayetu tuvosena tuli hano likumbi lyalelo, keshi navakakuluka jetuko.
4 Yehova ahanjikile nayenu meso nameso kupili mukakahya.+
5 Ami ngwemanyine mukachi kenu naYehova+ mangana ngumilweze mazu aYehova mwomwo enu mwevwile woma wakakahya, kamwakandukile kuze kupiliko.+ Ambile ngwenyi:
6 “‘Ami yami Yehova Kalunga kenu uze amilowele mulifuchi lyaEjipitu, muzuvo yaundungo.+
7 Kanda namukapwa natulunga vekako shina yami kaha.*+
8 “‘Kanda mukalitengela kaponya chipwe chuma chakufwana chuma chamwilu,+ chipwe chahamavu, chipwe chamumeyako.
9 Kanda mukalifukula kuvikiko chipwe kuvizachilako,+ mwomwo ami Yehova Kalunga kenu ngwapwa nguKalunga asaka vatu valihane kuli ami namichima yavo yosena,+ kaha ngweji kuzangamisanga vana, navazukulu, natukwatambuli, hakuhenga chamasevo vaze vanguhunga.+
10 Oloze ngweji kusololanga zangi yakwilila* kumakombakaji avisemunwino vyavaze vanguzanga nakulama jishimbi jami.
11 “‘Kanda mukazachisa lijina lyaYehova Kalunga kenu mujila yakuhengako,+ mwomwo Yehova mwakazangamisa vaze navakazachisa lijina lyenyi mujila yakuhenga.+
12 “‘Lamenu likumbi lyaSambata nakulimona kupwa lyajila nge omu amilwezele Yehova Kalunga kenu.+
13 Milimo yenu yosena mukayizatenga hamakumbi 6.+
14 Oloze likumbi lyakusokesa 7 likapwe sambata yaYehova Kalunga kenu.+ Kanda mukazata milimoko,+ chipwe enu, chipwe vana venu vamalunga navava vamapwevo, chipwe vandungo jenu vamalunga navava vamapwevo, chipwe vangombe jenu, chipwe vimbulu jenu, chipwe vimuna jenu veka, chipwe vamwiza vaze vali nakutwama mujinganda jenu,*+ mangana enu navandungo jenu vamalunga navava vamapwevo mukanokenga kumilimo yenu.+
15 Kanukenu ngwenu nayenu mwapwile muvandungo mulifuchi lyaEjipitu, kaha Yehova Kalunga kenu amilowelemo nalivoko lyenyi lyaundume, lyangolo.+ Shikaho Yehova Kalunga kenu amilwezele mulamenga likumbi lyaSambata.
16 “‘Vumbikenunga masenu namanenu+ nganomu amilwezele Yehova Kalunga kenu, mangana muyoyenga myaka yayivulu nakufukila mulifuchi lize mwamihana Yehova Kalunga kenu.+
17 “‘Kanda mukajiha mutuko.+
18 “‘Kanda mukalinga ukojiko.+
19 “‘Kanda mukevako.+
20 “‘Kanda mukambulula unjiho wamakuli wakupayisa mukwenuko.+
21 “‘Kanda mukevwila lwiso pwevo lyamukwenu,+ chipwe zuvo yenyi, chipwe wande wenyi, chipwe ndungo yenyi walunga, chipwe ndungo yenyi wapwevo, chipwe ngombe yenyi, chipwe chimbulu chenyi, chipwe cheshocho chuma ali nachoko.’+
22 “Yehova ahanyine jishimbi* eji kulizavu lyenu lyosena kupili nalizu lyakukanguka lyakufuma mukakahya, namulivwi lilava,+ kaha kahakilileko jishimbi jekako. Kufumaho ajisonekele hamalolwa avali akuya muuhanda kaha anguhanyinewo.+
23 “Omu mwevwile lizu muze mumilima, kupili yize yapwile nakuwema nakakahya,+ vatwamina jamiyachi yenu vosena navakulwane jenu vapandamine kuli ami.
24 Kaha mwangwambile ngwenu, ‘Tala! Yehova Kalunga ketu natusolwela upahu wenyi naunene wenyi, kaha tunevu lizu lyenyi nalihanjika mukakahya.+ Lelo tunamono ngwetu Kalunga nahase kuhanjika namutu, kaha mutu nahase kuyoya lika.+
25 Uno ika natufwila? Mwomwo kakahya aka kakanene kanahase kutunongesa. Kachi nge natwivwa lika lizu lyaYehova Kalunga ketu, kaha chikupu vene natufwa.
26 Mutu muka evwaho lyehi lizu lyaKalunga ou ayoya nalihanjika mukakahya nge omu tunalivu etu nakuyoya lika?
27 Ove yove watela kuya nakwivwilila kuvyuma vyosena mwahanjika Yehova Kalunga ketu, kaha mutulweza vyuma vyosena mwahanjika Yehova Kalunga ketu kuli ove, ngocho etu natwivwilila nakuvilinga.’+
28 “Ngocho Yehova evwile mazu mwahanjikile kuli ami, kaha Yehova ambile kuli ami ngwenyi, ‘Ngunevu mazu vanahanjika ava vatu kuli ove. Vyosena vanahanjika vinawahe.+
29 Kachi nge navapwa namuchima wakungwivwa woma+ nakulama jishimbi jami josena,+ kaha vyuma navikavawahilanga navana vavo haya myaka yosena.+
30 Yako uvalweze ngwove: “Kindulukenu kujimbalaka jenu.”
31 Oloze ove achisale kuno nayami ngukulweze jishimbi, najindongi, namazu akuyula muvanangula, vize navakalama nawa mulifuchi lize nanguvahana mangana valihete.’
32 Ngocho lingenunga vyuma vyosena vize namilweze Yehova Kalunga kenu.+ Kanda namuhandunukila kuchilyo chipwe kuchimosweko.+
33 Kavangizenunga vyuma vyosena vize namilweze Yehova Kalunga kenu,+ mangana muyoye, mufukile nakutwama myaka yayivulu mulifuchi lize mwamihana mulihete.+
Kwinyikila Chamwishi
^ Chipwe “natulunga vekako mangana mungukane ami.” Hepe., “nakulikanga kumeso amiko.”
^ Chipwe “likoji lyakwilila.”
^ Hepe., “muvikolo vyenu.”
^ Hepe., “mazu.”
