Lushimbi lwamuchivali 6:1-25
6 “Eji jikiko jishimbi, najindongi, namazu akuyula nangulweze Yehova Kalunga kenu nguminangule, mangana mukavilamenga omu namwingila mulifuchi lize mwamihana kupwa luheto lwenu.
2 Mangana mukamwivwenga Yehova Kalunga kenu woma hamakumbi osena aze namukayoya. Mukalamenga jishimbi jenyi josena jize ngunamihane enu, navana venu, navazukulu jenu+ mangana mukayoyenga myaka yayivulu.+
3 Ivwililenu enu vaIsalele, lamenunga jishimbi jenyi josena mangana mufukilenga nakuvula mulifuchi lyakumbwambumuka mavele nauchi ngana muze namishiki Yehova, Kalunga kavakakuluka jenu.
4 “Ivwililenu enu vaIsalele, Yehova Kalunga ketu ikiye Yehova umwe kaha.+
5 Zangenunga Yehova Kalunga kenu namichima yenu yosena, namyono*+ yenu yosena, nangolo jenu josena.+
6 Mazu awa nguli nakumilweza likumbi lyalelo alamenunga mumichima yenu.
7 Muwanangulenga* vana venu,+ muwahanjikenga hakutwama mujizuvo jenu, nahakutambuka mujila, nahakusavala, nahakuhinduka.+
8 Mukawakasa kumavoko enu kupwa chinjikizo chakumyanukisa, apwenga akukashila hajiholo jenu.*+
9 Kawasonekenu havipamba nahavikolo vyajizuvo jenu.
10 “Omu Yehova Kalunga kenu mwamitwala mulifuchi lize alishingile kuli vakakuluka jenu vaApalahama, naIsaka, naYakova,+ lifuchi likwechi jinganda jajinene jamwaza jize mwazenekele kutunga,+
11 najizuvo jakuzala navyuma vyamwaza vize kamwazachilileko, namashima akutota mumalolwa aze mwazenekele kutota, namande amivinyo namilive aze mwazenekele kulima, kahomu namukalya nakwikuta,+
12 mukalilame kuchina namukavulyama Yehova+ uze amilowele mulifuchi lyaEjipitu, muzuvo yaundungo.
13 Mwivwenunga Yehova Kalunga kenu woma,+ muzachilenunga ikiye,+ lishingenunga halijina lyenyi.+
14 Kanda namukazachila tulunga twavatu vaze namukalihata navoko.+
15 Mwomwo Yehova Kalunga kenu uze ali muli enu, apwa hiKalunga asaka mulihane kuli ikiye namichima yenu yosena.+ Kachi nge kamweshi kukalinga ngochoko,+ kaha utenu waYehova Kalunga kenu naukeza hali enu nakuminongesa.+
16 “Kanda namukeseka Yehova Kalunga kenu+ ngana muze mwamwesekele kuMasako.+
17 Lamenunga jishimbi jaYehova Kalunga kenu namazu akumyanukisa najindongi jize amilwezele.
18 Lingenunga mwamwaza, mwakwoloka kumeso aYehova mangana mufukilenga, mukahete lifuchi lyamwaza lize alishingile Yehova kuli vakakuluka jenu.+
19 Mukahangemo vaka-kole jenu vosena nge muze namishiki Yehova.+
20 “Omu vana venu navakamihulisa kulutwe ngwavo, ‘Uno mazu akwanukisa, najindongi, namazu akuyula aze amilwezele Yehova Kalunga ketu alumbunukila mulihi?’
21 Mukavalweza ngwenu, ‘Twapwile tuvandungo jaFwalo muEjipitu, oloze Yehova atulowelemo nalivoko lyenyi lyangolo.
22 Yehova alingilenga vinjikizo, navyuma vyavinene vyakukomwesa, vyakwivwisa woma hali vaEjipitu,+ nahali Fwalo, nahali vakuzuvo yenyi, kaha twavimwene.+
23 Atulowele mulifuchi kana mangana atunehe mulifuchi lino alishingile kuhana kuli vakakuluka jetu.+
24 Ngocho Yehova atulwezele tukavangize jindongi josena eji, nakwivwa Yehova Kalunga ketu woma, mangana tumonenga kuwaha,+ nakuyoya lika nganomu tuli likumbi lyalelo.+
25 Kachi nge natulyononona kuli Yehova Kalunga ketu hakulamanga jishimbi josena eji natulweze, kaha mwatuvulukila kwoloka.’+
Kwinyikila Chamwishi
^ Tala Mukana waMazu.
^ Chipwe “Muwahilukilahilukila kuli; Muwashindakanyanga kuli.”
^ Hepe., “akukashila mukachi kameso enu.”
